١٠ أنواع من الناس في رمضان: إنت مين فيهم؟

12/05/2019

دي مقدمة بسيطة عن أنواع الناس اللي بنقابلها في رمضان واللي هما أصلا أشخاص زينا عادي بس بسبب الصيام بيتحولوا لكائنات أخرى.

١. المريح

 ده اللي هو على طول كده متنح وغايب عن نفسه وعن أي حاجة حواليه، لحد ما يسمع أذان المغرب

٢. المتعصب دائما وأبدا

 ده اللي هو مفيش على لسانه غير جملة واحدة "محدش يكلمني أو ييجي ناحيتي إلا بعد الفطار" وبعد ما يفطر تلاقيه بره علي نفس الحال

٣. أبو تلكيكة

 تلاقيه داخل عليك و يقولك "أنا ينفع أفطر، أصلي واخد دوا بيثير أحماض مش عارف إيه و يعمل إيه ويسوي إيه"، أو تلاقيه بيقولك: يااااه، أنا شربت مياه بالغلط هاكمل بقى وأبقى أصوم  بعد رمضان.

٤. عبد السجارة

ده اللي بيبقى مش مهتم بأكل ولا شرب، أهم حاجة عنده السيجارة أول ما المغرب يأذن، أو ينزل على القهوة عشان الشيشة.

٥. اللي بتبكي على حالها

دي طول رمضان يا عيني عمالة تحضر في سفرة وتشيل و تحط أطباق وكفرانة طول الشهر و محدش بيقدرها بأي كلمة حتى.

٦. البروطة

ده مهمته الوحيدة والأبدية إنه يفضل نايم لحد ميعاد الفطار وبعدها ياكل و يكمل نوم، ومعروف إنه مش بيقول غير جملة واحدة "صحوني على الفطار" وبينام في أي وضع وأي مكان ووسط أي ظروف.

٧. اللهم إني صائم

ده شخص كل ما تقوله أي كلمة سواء كانت كلمة عادية أو شتيمة أو أي حاجة مبيقولش غير اللهم إني صائم.

٨. مش هاتصلي

ده بيبقى شخص عادي جدا ممكن يكون مش بيصلي في الأيام العادية وييجي في رمضان يصلي وده حقه، لكنه ساعات بيبتدي يعمل معاك مشاكل إنك مش بتصلي وإن صيامك مش نافع كده.

٩. على فكرة إنت كده صيامك مش نافع

ده بيبقي واحد غالبا فاضي وموراهوش حاجة وقاعد بس عشان يشوف كل حد بيقول إيه وأول ما حد يقول كلمة مش على مزاجه يقوله "على فكرة إنت كده مش نافعلك صيام"، كأنك بتصوم ليه هو!

١٠. أم حجاب

ببساطة دي بتبقي واحدة عادية زي أي بنت، بس أول ما ييجي رمضان تلبس حجاب و تقلعه عادي بعد رمضان.

Comments: