دليلك الكامل لقراية الفنجان

29/09/2016

"أبـين زين وأشوف الودع وأقرا الفال والبخت"

من العادات القديمة المشهورة عند المصريين والأتراك قراية فنجان القهوة، جدتى كانت بـ تقراه، والناس اللى بـ يقروا الودع والفنجان كانوا حاجة منتشرة زمان وإن كانت أقل شوية دلوقتى. الأتراك طبعا أسياد الفن ده ومبـتدعيه، و"الفال" أصلا كلمة تركى معناها الحظ أو النصيب.

قراية الفنجان فن أكتر ما هو علم ليه قواعد جامدة، معتمد فى الأساس على شطارة اللى بـ يقرا وإدراكه وعينه، مفيش ٢ هيقروا نفس الفنجان زى بعض. علشان كده من القواعد الرئيسية لقراية الفنجان إن ممنوع نفس الفنجان يقراه اتنين أبدا (وكمان ما ينفعش إنك تقرا فنجانك، لازم حد يقراهولك).

إزاى تحضر الفنجان للقراية؟

قراية الفنجان بـ تحتاج ترتيب، لو ناوى فنجانك يـ تقرى بـ تبدأ تحضير من قبليها:

  • اعمل فنجان تقيل علشان يفضل تنوة (بواقى القهوة فى لغة اللى بـ يحبوا القهوة) حلوة فى الآخر
  • اشرب فى فنجان طبعا يكون ليه إيد وطبق، الاستكانة (الكباية) ما بـ تـتقريش
  • اشرب دائما من نفس الناحية ما تغيرهاش
  • سيب آخر حبة صغيرين (شفطة) فى آخر الفنجان ما تشربهاش علشان بـ تسهل عملية توزيع التنوة
  • بعد آخر شفطة، غمض عينك وأتمنى أمنية، المفروض اللى هيقرا فنجانك هيقول لك هتـتحقق ولا لأ
  • بعد ما تخلص، أقلب الطبق وحطه فوق الفنجان، وامسك الطقم (الفنجان والطبق المقلوب فوقه وقافله) عند مستوى صدرك كده وحركة مع عقارب الساعة ٣ مرات بالراحة علشان يوزع التنوة على الفنجان كله
  • أقلب بقى الفنجان فى حركة سريعة كده بحيث يبقى مقلوب والطبق معدول واديه للى هيقرالك فنجانك.
  • بعديها المفروض تسيب الفنجان كده ٥-١٠ دقايق يروق وينزل كل القهوة الزيادة علشان التنوة تاخد أشكالها النهائية جوا الفنجان

لو مهتم أكتر تعرف عن العلاقات حط خاتم على ضهر الفنجان، لكن لو مهتم أكتر تعرف عن الفلوس ومستقبلك المادى حط كوين على ضهر الفنجان المقلوب.

إزاى تقرا الفنجان بقى

اللى هيقرا الفنجان بـ يبدأ الأول يشيل الحاحة اللى أنت حاططها على ضهره (لو حاطط حاجة يعني)، وبعدين بالراحة كده يحاول يفصل الفنجان عن الطبق.

  • لو حتة تنوة كبـيرة وقعت من الفنجان فى الطبق، ده فال خير. معاناها إن مشاكل كبـيرة فى حياتك هتسيبك قريب
  • ولو اللى وقع ده عمل كومة، يبقى فيه فلوس كتير جايالك فى الطريق.
  • لو الفنجان والطبق لازقين فى بعض أوى وتقدر ترفعهم كوحدة واحدة من الفنجان من غير ما الطبق يقع، بـ يسموه "فنجان النبى". وده معناه إن كل أمانيك هتـتحقق ومش محتاج تكمل قراية الفنجان.

بعديها اللى هيقرا الفنجان بـ يقلبه ويرجعه للوضع العدل وبـ يمسكه من نفس الناحية اللى الشخص شرب منها ويبدأ يبص على الأشكال اللى جوا ويفسرها.

قواعد النظر للرموز والأشكال

فيه أكتر من مدرسة لقراية الفنجان وتقسيمه نظريا قبل القراية، لكن فيه طريقتين هم الأشهر والمنتشرين أكتر:

التقسيم الخماسي:

بـ تقسم بعينك الفنجان من عند إيده ليمين وشمال:

  • اليمين: المستقبل
  • الشمال: الحاضر
  • حوالين الإيد: حياتك العاطفية
  • قعر الفنجان: البـيت والأسرة
  • مقدمة الفنجان (الحتة المقابلة للإيد): الفلوس والغنى والفقر

والتقسيم الثلاثي:

  • قعر الفنجان: الماضى، وخاصة العيلة والعلاقات
  • وسط الفنجان: الحاضر
  • الجزء العلوي: المستقبل

وفيه ناس مش بـ تقسم وبـ تقرا الرموز بشكل عام وبـ تسيب للى عايز يعرف فاله يحدد ده ماضى ولا حاضر ولا مستقبل. الموضوع كله فى النهاية إنطباع وتفسير مش علم يعنى.

معانى الرموز والأشكال علشان تعرف إزاى تقرا

طبعا الموضوع فيه نقاش واسع يعنى إزاى تقرا ومعانى الرموز، لكن فيه حاجات كتير تعتبر قواعد عامة، وخلى بالك كل واحد بـ يشوف مختلف، اللى أنت شايفه كلب حد تانى ممكن يشوفه نمر، علشان كده اللى بـ يقرا بـ يكون المفروض "متبصر" وكده، بس طبعا الموضوع كله تسلية لطيفة يعنى، بس أهم قاعدتين عامة:

حجم الرمز بـ يفرق، الرموز الكبـيرة الواضحة أهم من الرموز الصغيرة أو الخفيفة اللى مش باينه، فمثلا : رمز كبـير قرب أول الفنجان معناها حاجة مهمة جدا هتحصل لك قريب أوي

الحاجات اللى قريبة أو حوالين إيد الفنجان معناها حاجات هتحصل فى بـيتك أو حياتك العاطفية.

أول حاجة بـ يتبص عليها قعر الفنجان ولونه:

لو لونه خفيف يبقى الأمنية اللى اتمنيتها فى الأول هتحصل، لو تقيل وأسود أوى يبقى مش هتـتحقق

بالنسبة لمعانى الرموز اللى بـ تشوفه وأشكالها، لقيت القاموس الهايل ده متقسم أبجديا هتلاقى جواه معنى كل رمز، وبشكل عام دول أهم وأشهر ١٠ رموز ومعانيهم:

  • خاتم: جواز أو علاقة جديدة
  • طائر: خبر حلو، لكن لو غراب يبقى خبر وحش
  • قمر مكتمل: حب
  • مثلث: تغيير مهم هيحصل فى حياتك
  • الحروف: الحروف الأولى من إسم شخص
  • الأرقام: بـ يبقى مقصود بـيها وقت معين أو سن
  • دايرة: إنجاز مهم هتحققه فى حياتك
  • مقص: خلاف مع شخص بـ تحبه
  • نجمة: نادرة جدا، معناها استثمار مهم هتعمله
  • عين: لو عين شريرة غضبانة يبقى حد بـ يكرهك وبـ يحقد عليك، لو عين تعبـيرها حلو يبقى حد بـ يحبك وبـ يفكر فيك

والبورد دى على Pintrest  عليها أكتر من ١٠٠٠ صورة لأشكال جوا فنجان قهوة فعليا علشان تعرف بـ يطلع شكلها إزاى.

آخر خطوة فى القراية

فى الآخر خالص المتبصر (اللى بـ يقرا) بـ يرجع الفنجان للى طالب يعرفه فاله، وبـ يطلب منه يتمنى أمنية، وبعديها بـ يحط إبهامه جوا الفنجان ويلفه لفه صغيرة كده مع إتجاه الساعة.

بعديها بـ يرجعه للمتبصر تانى، بـ يبص عالمنطقة اللى حرك صباعه فيها وبـ يقرا ويقول له أمنيته هتـتحقق ولا لأ.

كل يوم قهوة وأنتم طيبـين!

Comments: