دليل ذا جلوكال للمزيكا اللى تسمعها فى الشغل

08/01/2017

تنويه: المقال ده متصمم بحيث فى آخره هـ تكتشف إنك هتفضل فاتحه أى وقت أنت ناوى تشتغل فيه، وأيا كان اللى هتعمله والمزيكا اللى عايز تسمعها وأنت شغال هـ تقدر تشغلها على طول من هنا … انبسط!

لو بتقرا المقال ده وأنت فى الشغل. بنسبة كبيرة أصلا بـ تقراه وفيه سماعات فى ودنك (أكتر من ٥٠% من اللى بـ يشتغلوا وسنهم بين ٢٠-٣٥ بـ يسمعوا مزيكا وهم بـ يشتغلوا حسب آخر الإحصائيات).

بالذات بقى لو شغال فى شركة كبيرة، قاعد فى Cubicle أو فى مكتب فيه أكتر من حد بـ يشاركك نفس المساحة. بـ ترزع سماعات فى ودهنك علشان تعرف تركز وتفصل نفسك عن الأجواء اللى حواليك، وتشغل تراك بـ تحبه وتنطلق. لكن مش كل المزيكا زى بعضها، خاصة لما يكون هدفك منها إنك تشتغل أو تخلص مهمة ما. إزاى تختار المزيكا المناسبة للشغلانة اللى بتعملها؟ أنهى أغنية أحسن لو بـ تعمل حاجة محتاجة إبداع؟ محتاجة تركيز؟ أو حاجة مملة مفيهاش تفكير ومحتاجة بس تتحمس وتنجز؟

المزيكا بتعمل إيه فدماغك؟

حسب نوع المزيكا اللى بـ تشغلها مراكز مختلفة فى المخ ممكن تنور. المراكز دى بتعتمد على حاجات كتيرة: المزيكا مألوفة ولا جديدة؟ حزينة ولا سعيدة؟ فى أنهى سلم موسيقى؟ مزيكا بس ولا أغنية فيها كلام؟

كلها حاجات مهمة وبتفرق فى تأثير المزيكا على دماغك وعلى قدرتك على الإنجاز.

سماع المزيكا بـ يخلى الشغل أسهل؟

دراسة مهمة ومشهورة اتعملت فى ١٩٧٢ (لينكات المصادر تحت)، بـ تقول إن أعظم تأثير للمزيكا فى تخليص الشغل هو لو بتعمل حاجة محتاجة تركيز عالى، لكن مش محتاجة مجهود إدراكى كبير ولا إبداع. شغلانة روتينية زى إنك تملى شيت Excel مثلا أو تخلص حسابات، أو معاملات ورقية، أو طبعا لو مجهود بدنى زى التمرين. الدراسة دى كانت بتقول مثلا إن عمال المناجم أدائهم كان أعلى بكتير لما كانوا بـ يشغلوا مزيكا ليها إيقاع عالى وسريع وأغانى مفرحة وترقص فى الخلفية.

هل سماع المزيكا دائما مفيد فى الشغل؟

لأ. لأن فى النهاية سماع للمزيكا معناه إنك بتعمل أكتر من حاجة فوقت واحد. يعنى قدرات عقلك الإدراكية جزء منها بـ يروح فى محاولة إستيعاب كلمات الأغنية، محاولة إنك تفتكر سمعت الأغنية دى فين، أو الأغنية بتفكرك بإيه (أو بمين)، وده ممكن يبقى فيه تأثير سلبى لو بـ تحاول تخلص مهمة محتاجة "فهم" أو "حفظ" أو "تفكير إبداعى" ما. وفيه دراسة مهمة من جامعة كارديف بـ تتكلم عن أد إيه الهدوء والصمت مثلا مفيدين جدا لو بـ تحاول "تحفظ" حاجة.

ومهم جدا تعرف إن سماع المزيكا طول الوقت بـ يقلل من فوايدها وإيجابيتها. والدراسات بـ تقول إنك لو بـ تعمل شغلانة معقدة عايز تستخدم فيها كل خلايا مخك، الهدوء هو أحسن مساعد ليك مش المزيكا خالص.

يعنى أسمع ولا ما أسمعش؟

خليك متوازن وذكى فى التعامل مع المزيكا. اعرف كويس الحاجة اللى هـ تعملها، والخدعة فى إنك تختار المزيكا المناسبة للمهمة اللى هتنفذها، خلينى أقولك إزاى.


لو هتعمل مهمة إبداعية أو محتاجة تفكير زى التفكير فى مقالة مثلا أو تحليل أرقام علشان تعمل ريبوت أو بتفكر فى ديزاين:

هـ تحتاج حاجه ما تشغلش دماغك، مزيكا Instrumental من غير كلام علشان مخك ما يستهلكش نفسه فى محاولة فهم اللى بـ يتقال. كمان حاول تلاقى حاجة إيقاعها ثابت ومتكرر. لأن مخك عبارة عن ماكينة توقع، طول الوقت بـ يحاول يخمن إيه اللى هـ يحصل اللحظة الجاية. فما تخليهوش طول الوقت يحاول يكتشف التغيير اللى هـ يحصل فى ريتم المزيكا. الدراسات العلمية حوالين ده بـ تقول إن المزيكا الهادية اللى رتمها بسيط ومتكرر ومفيهاش إرتفاعات ولا إنخفاضات عنيفة فى المود بتحسن عملية الإدراك والإبداع. التراك ده مثلا من التراكات المشهورة أوى للتدليل على الموضوع ده:

ومن تجربتى الشخصية بقى أحسن مزيكا تسمعها ينطبق عليها القواعد دى وأنت بتنفذ شغل إبداعى (بسمعها دلوقتى وأنا بكتب المقال ده): المزيكا الكلاسيك، وبالتحديد شوبان وموزارت وباخ.

ودى البلاى ليست اللى أنا بسمعها دلوقتى وبسمعها عادة وأنا بشتغل:

ومن حبة كمان اكتشفت موقع عظيم اسمه focusmusic.fm. بـ يشغل مزيكا بتاعت شغل وتركيز بس. والموقع زرار واحد هوب تدوس عليه وتبدأ شغل، مش محتاج حتى تفتحه الزرار أهو دوس عليه واشتغل:

وفيه نوع كمان من المزيكا اللى بـ يسموه الضوضاء البيضاء أو White noise، ودى الأصوات اللى زى صوت الطبيعة مثلا: المطر والرياح، أو أصوات الدوشة والهمهمة بتاعت الناس فى كافيه زحمة، أو صوت التكييف. باختصار هى الأصوات اللى مخك متعود عليها ومتعود يفلترها أوتوماتيك من غير تفكير. ممكن تفتكر إن دى أصلا أصوات دوشة لكن الفكرة فى إنها علشان دوشة مألوفة فمش بتأثر على مخك وفنفس الوقت بتغطى على الدوشة التانية اللى حواليك فبتساعدك تركز. لو ده النوع اللى بتفضله أنت، جرب موقع Coffitivity. ده موقع بـ يشغل صوت دوشة White noise متنوعة، مش محتاج برضه تفتح حاجة يا ريس دوس هنا هـ يشتغل:

أقولك خدعة لطيفة كنت بعملها؟ كنت بشغل تراك مزيكا وفنفس الوقت White noise من Coffitivity وأوطيها وأعيش فى جو إنى قاعد أشتغل فى كافيه.

لو مهمة عايزة تركيز وعايز تخلص منها بس مش محتاجة تفكير، زى إنك بتملى Time sheet أو بتملى Template مثلا:

القواعد هنا مختلفة شوية، أنت دلوقتى مش فارق أوى إستهلاك مخك مع المزيكا، لكن عايز حاجة تحسن مودك، وتخلى أداءك أعلى وأسرع. زى ما قلنا فوق هنا أنت عايز حاجة رتمها سريع وفيها إيقاع لطيف وتكون تبسط وترقص. حاجة زى :

أقولك خدعة كمان: إدى نفسك شحنة دوبامين بزرار Shuffle. مخك بـ يتحمس بمحاولات توقع المستقبل. فإنك توصل له إنه الأغنية الجاية عشوائية وتخليه مستنى اللحظة اللى جاية حسب دراسة من هارفارد بـ يدى شحنة دوبامين بتبسطك وتحسن أداءك فى الشغل.

استخدم خاصية الراديو مثلا فحاجات زى Spotify أو Pandora والخدمات المشابهة علشان تستفيد من الموضوع ده.

دى ليسته مناسبة جدا لنوع زى ده من الشغل وتقدر تشغلها من هنا علطول:

حمس نفسك قبل الإجتماع

داخل بقى على إجتماع مهم؟ أو عايز تكافئ نفسك على مهمة خلصتها بكفاءة؟  هنا أنت بتدور على مزيكا تثير حماستك وتستغل التأثير العاطفى القوى للمزيكا. جرب rock anthem قوى وحماسى أو ساوند تراك فيلم أكشن علشان تزق مودك وتتنطط وتحمس فريقك. جرب كده تسمع دى قبل الميتنج الجاى:

الأغانى الحماسية دى أحسن حاجة ترفع المود، ودى ليستة ممكن تجربها لما تحب تجرب النوع ده من المزيكا:

خلى المقال عندك بقى مفتوح وعيش كل ما تحب تشتغل.

المصادر:

http://qz.com/185337/the-complete-guide-to-listening-to-music-at-work/

http://www.remotenation.co/blog/cant-focus-while-working-from-home-music-might-help

http://www.independent.co.uk/student/student-life/Studies/classical-music-and-studying-the-top-10-pieces-to-listen-to-for-exam-success-a7037841.html

https://medium.com/@WriterLionel/sound-advice-what-to-listen-to-while-working-601af736846#.ydxzd4rva

http://nawarny.com/%E2%80%AB%D8%A5%D8%B2%D8%A7%D9%8A-%D8%AA%D8%B9%D8%B1%D9%81-%D8%AA%D8%B1%D9%83%D8%B2-%D9%81%D9%8A-%D8%A7%D9%84%D8%AF%D9%88%D8%B4%D8%A9-%D8%A8%D8%A7%D8%B3%D8%AA%D8%AE%D8%AF%D8%A7%D9%85-%D8%A7%D9%84white/

http://www.theatlantic.com/technology/archive/2012/05/how-headphones-changed-the-world/257830

Comments: