ليه الشتاء مرتبط بالاكتئاب؟ وإيه هي المشاعر المشتركة عند الناس فيه!

مرة واحدة كده السنة دي الجو اتغير من صيف وحر أوي لساقعة وبرد وبقينا محتاجين نتقل هدومنا وماعدناش بفصل الخريف زي كل سنة اللي كان بيمهدلنا دخلة الشتاء.. فطبيعي لما نتصدم بالجو الساقعة ده كده مرة واحدة والأيام تبقى أقصر ونشوف الشمس عدد ساعات أقل والجو يبقى برد أكتر ده ممكن يعمل تأثير على الصحة النفسية والمزاجية لكل واحد فينا

مع تغيرات المواسم بيحصل حاجة اسمها الاضطراب العاطفي الموسمي اللي هو “SAD” وبيعتبر نوع فرعي من أنواع الاكتئاب وعشان كده أعراض الاضطراب ده بتبقي مشابهة شوية للاكتئاب ولكن بيكون في نفس الوقت تقريبًأ من كل سنة، واللي غالبا بيكون في الخريف أو الشتا وبيقل في الربيع والصيف.

لكن مش لازم تكون بتعاني من الاضطراب ده عشان تعاني من أعراض تغير طاقتك ودوافعك وأنماط نومك ومزاجك مع دخول فصل الشتاء.. وعشان كده فيه شوية مشاعر أغلب الناس بتعاني منها في فصل الشتاء وزي ما قال موقع “strategicpsychology” في أحد مقالاته هم:

1- النرفزة السريعة

2- الإحساس بالاكتئاب معظم اليوم أو يوميًا 

3- صعوبات في النوم أو زيادة في النوم 

4- تغيرات في الشهية أو الوزن 

5- صعوبة في التركيز 

6- إحساس باليأس وعدم القيمة 

7- فقد الاهتمام بالأنشطة اللي كنت بتستمتع بيها قبل كده 

8- الشعور بالتعب وانخفاض الطاقة 

9- الانسحاب الاجتماعي 

10- قلق 

ويمكن السبب المباشر في كل الأعراض دي غير واضح أو مؤكد بنسبة 100% لكن فيه شوية عوامل بيعتقدوا إنها بتساهم في ظهور المشاعر دي وهي زي:

1- قلة ضوء الشمس اللي بيأثر على ساعة الجسم البيولوجية وده بيأدي للشعور بالاكتئاب

2- وممكن كمان قلة التعرض لضوء الشمس بيخفض مستويات السيروتونين وده بيخليك تحس بالاكتئاب، السيروتونين هو عبارة عن ناقل عصبي بيأثر على الحالة المزاجية

3- اضطرابات في مستويات الميلاتونين وهو نوع من الهرمونات اللي ممكن يأثر على أنماط النوم والمزاج

وعشان كده قلة ضوء الشمس هو عامل كبير في أغلب المشاعر اللي بتحسسك باكتئاب الشتاء أو المشاعر اللي بتضايقك دي لكن مش الجو الساقعه هو السبب، غير كمان إن لما بيكون الجو ساقعة بتلاقي نفسك تلقائيا مش عايز تخرج وقعدة البيت مغرية بالنسبة لك أكتر.. لكن مع الأسف هو ده تقسيم السنة إن الشتاء لازم يجي 3 شهور على الأقل كل سنة فمش منطقي تسيب نفسك تستسلم لكل المشاعر السلبية دي.. فتعالي نقولك شوية نصايح تعملها 

حسب ما قالت جمعية علم النفس الاسترالية (2005) لحد ما الصيف أو الربيع يجوا تاني بالسلامة:

1- حاول على الأقل كل يوم تاخد ساعة واحدة بس في الشمس على الأقل أو في الضوء الخارجي يعني

2- حاول تيجي على نفسك شوية وتعمل مجهود عشان تواصل حياتك الاجتماعية 

3- حاول ماتكسلش ولو بتلعب أي رياضة أو بتمارس أي تمارين تكمل فيها باستمرار وتحافظ على نشاطك البدني

وبالرغم إن الحاجات دي كنت بتعملها وأنت مغمض عينك وبتبقى روتينك اليومي في الأيام الدافية أو الحر لكن هتلاقي نفسك بتعملها بشوية مجهود أكبر شوية بس حاول تعملها من خلال شوية خطط بسيطة بتعملها يوميًا 

فيه مثل نرويجي أو سويدي قديم بيقول إن مفيش حاجة اسمها جو وحش فيه بس هدوم وحشة، عشان كده أنت محتاج تدفي نفسك كويس أوي وتلبس هدوم مناسبة للجو وتخطط للأنشطة اللي هتساعدك تتحرك لإن كل ما تتحرك وتحاول تعمل النصايح دي كل ما إحساسك بأعراض اكتئاب الشتاء اللي بتحس بيها دي هتقل ومزاجك هيبقى أحسن.