إزاي تتجنب العطش في رمضان؟ موضوع بديهي بس هتحتاجه

09/05/2019

أصعب حاجة في شهر رمضان -خاصة لما يجي في الصيف- بتبقى قلة المياه في جسمنا وقلة الكافيين لمدمني القهوة وقلة النيكوتين للي بيشرب سجاير.

بس خلونا نركز على موضع المياه عشان دي بتحصل لكل الصايمين، تقريبا كل سنة بتشوف مقالات عن إزاي ما تعطش في رمضان ويتكلموا في التلفزيون بس إحنا بننسى كل سنة برضه وبنحتاج حد يفكرنا.


 

الخضار والفاكهة:

بناكل كل أنواع الأكل تقريباً بعد الفطار بس أكتر حاجة بتُهمل هي الخضار والفاكهة،  برغم إنها من أكتر الأطعمة المقاومة للعطش في اليوم اللي بعده.

الخضار والفاكهة بتعمل على تحفيز الجسم إنه يحتفظ بالمايه لفترة أطول، ومن الفاكهة الممتازة في الوظيفة دي هي البطيخ والموز، هم قادرين على تقليل الشعور بالعطش بشكل كبير والجوع برضه.

العصاير:

العصاير بتبقى أول حاجة بنشربها قبل ما ناكل وجبة الفطار، المهم نحاول تبقى عصاير طبيعية مش صناعية ونقلل كمية السكر فيها لأن زيادته بيتبعها طرديا زيادة إحساس بالعطش.

الزبادي:

الزبادي جزء أساسي من "وجبة السحور" عشان من الأكلات اللي بتساعد على الهضم وتقوية المناعة وتقليل الضغط ومستوى الكوليسترول في الدم وطبعا تقليل الإحساس بالعطش.

المياه:

تبدو النقطة دي بديهية! لكن كلنا بنغلط نفس الغلطة كل رمضان وبنشرب كمية مهولة منها قبل الفجر بربع ساعة وبمجرد ما الاذان يأذن بتلاقي نفسك عاوز تدخل الحمام وجسمك بيتخلص من كل الماية إللي شربتها دي مرة واحدة.

الحل إنك تشرب الماية دي بكميات معقولة على مدار الليل من أول أذان المغرب لحد أذان الفجر.


 

Comments: