قصور أثرية وحدائق ينفع تعمل فيهم "فوتوسيشن"

27/08/2018



ليستة جمعنا فيها قصور وحدائق بتتميز بالمناظر الطبيعية أو المعمار الجذاب، ودي لكل حد بيدور على مكان مناسب لـ "photo session".
كل الأماكن اللي هتتعرف عليها دلوقتي بتسمح  بالتصوير و عمل جلسة تصوير فيها مقابل مبلغ معين بيختلف  من مكان للتاني.

1- جزيرة المعادي



مكان مناسب لـ "الفوتوسيشن" لأنه هادي جدًا وفيه مناظر طبيعية كتيرة، هو عبارة عن جزر صغيرة فيها مساحات خضرا كبيرة  بتطل على كورنيش المعادي، بيوصل بين كل جزيرة كوبري صغير..
جزيرة المعادي  موجودة على كورنيش المعادي بالظبط أمام المجمع الطبي للقوات المسلحة.



2- قصر الأمير محمد علي



قصر ليه طابع معماري خاص باعتباره أحد أهم القصور الملكية في مصر، القصر حاليًا متحف يعني تقدر تزوره وتعمل جلسة تصوير هناك.
المكان عبارة عن 3 سرايا وهما  سراي الإقامة، وسراي الاستقبال، وسراي العرش، بالإضافة للمسجد، والمتحف الخاص، ومتحف الصيد، وبرج الساعة.
لو إنت من الأشخاص اللي بتحب المعمار الإسلامي فالمكان ده هيكون مناسب ليك علشان تعمل جلسة تصوير هناك.
قصر الأمير محمد علي موجود في شارع السرايا بالمنيل.


3- حديقة الأندلس

مكانها في الزمالك آخر كوبري قصر النيل يمين
الحديقة عبارة عن جزئين.. جزء طرازه أندلسي والجزء التاني فرعوني.. الحديقة بسيطة جدًا لأنها عبارة عن مساحات خضرة بتطل على النيل لكن الطراز الأندلسي والفرعوني هو اللي بيميزها عن غيرها من الحدائق.


 

4- حديقة الأسرة أو family park



المكان متنوع جدًا يعني ينفع تبقى خروجة وكمان فوتوسيشن، وده لأنه عبارة عن حديقة حيوان وسفاري ومتحف مفتوح، ده غير عرض النافورة الراقصة.
المكان موجود عند مدخل الرحاب بالظبط عند الكيلو 26 طريق القاهرة - السويس الصحراوي.


5- الحديقة الدولية



في مدينة نصر بشارع عباس العقاد.. موجودة الحديقة الدولية.. أهم حاجة بتميز المكان ده هو أن فيها معمار لكذا دولة وعلان كده اسمها الدولية.

 

6- حديقة الأزهر



من أشهر الأماكن المعروفة عند الناس بالمناظر الطبيعية والمساحات الخضرا والبحيرات هي حديقة الأزهر..
الحديقة موجودة على صلاح سالم بالدرب الأحمر بجوار قلعة صلاح الدين.


7- قرية تونس


سحر المكان ده في البحيرات الموجودة فيها والناظر الطبيعية.. كمان أغلب البيوت والفنادق الموجودة هناك مصممة على الطراز البدوي البسيط.
عنوان المكان ده .. عند  بحيرة قارون - على بعد 55 كيلو من  الفيوم



















 

Comments: