إمتى لازم تنسحب من العلاقة؟

23/01/2019

كتب: مرام أبو النجا

في حاجات لما تحصل في أي علاقة ده بيكون معناه إنك في خطر ولازم تمشي من العلاقة أو توضع حد ليها، أي كان طبيعة العلاقة (صداقة، حب، ارتباط)، هنتكلم على شوية حاجات زي

1- لما تبدأ تحس إنك إسنفنجة
وده هيحصل لما  هتلاقي دورك في حياة الشخص التاني هو إنك بمتص كل الطاقة السلبية اللي في حياته
بمرور الوقت الشخص ده بيضمن وجودك أو بياخدك For Granted وبيضغط عليك من غير ما يحس أو ممكن يبقى حاسس، بس هيبقى ساعتها إتعود إن ده دورك في حياته، المشكلة هنا إنك بالوقت طاقتك بتخلص ومش هيبقى عندك حتى طاقة لنفسك

2-"هي لا تحبني... لكنها لا تريد فقدي، نوع من هواية التجميع لا أكثر"
الجملة دي كانت في كتاب للكاتب الراحل "أحمد خالد توفيق" وده لما  هتلاقي ناس بتتمسك بيك في حياتها كمالة عدد، أو لأنك مدخل أو سبب لمصالح أو علاقات تانية، العلاقات دي عادة لتنتهي بزوال السبب، أو إن المصالح اللي عن طريق تتقضى أو يلاقيها سكة غيرك، أو إن وضعه يتحسن فساعتها انت مش هيبقالك لازمة

3-  اللي معاك بيقلل منك/ مش بيحترمك
في ناس بتبرر قلة الاحترام والتجريح ساعات إنه هزار، أو إنه مكانش قصده، بس فعلاً اللي بيحبك هيقدرك وهيحطك في مكانك الصح، وعمره ما هيقلل منك تحت أي ظرف، بالعكس بيبقى احترامه ليك جزء من احترامه لنفسه


4- لما تكون مع شخص نرجسي
العلاقة دي لازم تنهيها فوراً، لأن الشخص النرجسي مبيكونش شايف حد غير نفسه، مبيقدرش مشاعر الناس، والمشكلة الأكبر إنه عمره ما بيشوف نفسه غلطان، وبيتبع أسلوب الضحية أو "قلب الترابيزة" واللي بيكون مرهق جداً نفسياً للشخص اللي قدامه


5- "أنا لا أكذب ولكني أتجمل"
المشكلة مع النوع ده من الناس ده إنهم بيكدبوا الكدب ويصدقوه، وبعدين ينسوا، ويرجعوا يكدبوا تاني وهكذا، ولما هتيجي تواجهه هيكدب تاني ومش هتوصل لحاجة في الآخر لأن الكداب مبيحسش إنه كداب

6-  لما تكون مع شخص اعتمادي
وده بيبان أكتر في علاقات الارتباط، وده اللي بيبقى معتمد بشكل كامل على الشخص اللي معاه، مبيتحملش أي مسؤولية، ولا حتى مسئولية نفسه، ولو إنت تعبت أو وقعت هيبقى عبء عليك مش هيساعدك ولا يسندك

أكيد كل واحد فينا عنده قدرة على تقبل عيوب في الشخص اللي قدامه طول ما هو بيحبه، بس في حالات زي اللي قلناها دي، لو الشخص نفسه مكانش عنده الرغبة في التغيير فإنت لازم تنقذ نفسك، وتمشي !

Comments: