إزاي في مسلسلات بتخليك تحبها من غير ما تحس؟

في حاجات بتخلينا نحب المسلسلات و نتعلق بيها مش بس قصتها والشخصيات اللي بنتفرج عليهم كل يوم.. والحاجات اللي واضحة قدامنا زي الفنانين اللي بنحبهم وتمثيلهم المختلف لكن في كمان تفاصيل صغيرة قادرة تخليك تحب المسلسل من غير ..ما تاخد بالك واحنا في الموضوع ده جمعنالك شوية تفاصيل صغيرة عملت لمسات مبهرة لمسلسلات السنة دي

-تناسق الألوان:
في المشهد قادر يخليك تتفرج وأنت عينيك مستريحة وحابب تفضل تتفرج على المشهد وقت أطول زي التناسق في الألوان في مشاهد مسلسل إمبراطورية

كمان في مسلسلات بتعمل دعاية غير مباشرة للبلد بإنها تصور في أماكن مختلفة في مصر أو حتى أماكن إحنا نفسنا مشوفنهاش و بالشكل ده قبل كده، زي مسلسل بيت الرفاعي اللي إتصور في أماكن مميزة جداً وخد شوية لقطات كإنها لوّح مرسومة فعلا زي اللقطة دي لقلعة قايتباي في الإسكندرية.

– الإخراج واختيار الكادرات:
قادرة تخلي الصورة تتكلم زي كادرات مسلسل مسار إجباري اللي شوفنا في الكادر فاصل ومسافة بين أحمد داش وعصام عُمر ودي طريقة ذكية جداً علشان الفاصل المادي اللي أنت شايفه بعينك يعبر عن الفاصل المعنوي اللي بين الشخصيتين.. ده غير الكادرات اللي ظهرت جمال وسط البلد طول الحلقات بشكل مميز

-تترات المسلسلات:
وطبعًا كلنا قفشنا نفسنا قبل كده بنغني تترات مسلسلات مش عارفين حفظناها امتى، ودي من أهم التفاصيل الصغيرة اللي قادرة تخلي المسلسل يعلم معاك وتفضل فاكره سنين قدام زي مثلا تتر مسلسل “حضرة المتهم أبي” و”حمادة عزو” وتترات تانية كتير أكيد غنيتها معانا دلوقتي وأنت بتقرأ!
والسنادي تترات كتير برضه جذبت مسامعنا زي تتر مسلسل الحشاشين غناء وائل الفشني اللي قادر يربطك بالمسلسل ويخليك تتأكد إنك لو سمعته بعد سنين بالصدفة هيفكرك بالمسلسل من تاني غير طبعًا تتر مسلسل الكبير اللي معلق معانا طول السنين اللي فاتت وبقى مرتبط بهوية المسلسل نفسه.

ودي شوية تفاصيل صغيرة في المسلسلات مش بتاخد التركيز الأساسي بس بتخليك تحب المسلسل أكتر وتخليه يعلق معاك من غير ما تاخد بالك حتى بكل سلاسة وبتخلي العمل الدرامي يبقى عمل فني بجد.