٢٠ مسلسل معششين في المزاج المصري مهما يعدي عليهم الزمن

07/02/2019



"ارجع يا زمان.. حن يا ماضي" دي أكتر جملة مناسبة لموضوعنا، لإنك بمجرد ما تقرا الموضوع وتفتكر المسلسلات دي هتحس بحنين ليها وللأيام اللي كنت بتشوف فيها المسلسلات حتى لو كانت قديمة جدًا وعدى عليها الزمن وبقت فلكلور ونوستالجيا، ولسة بنحب نتفرج عليها لإنها بقت جزء أصيل من مزاج المصريين.

الضوء الشارد
"رفيع بيه" أشهر اسم وشخصية اتجسدت في المسلسل اللي بيتناول المجتمع الصعيدي وموضوعاته.
رغم إن المسلسل صعيدي إلا إنه مامنعش تكون فيه قصة حب بين رفيع بيه وبيجسد شخصيته  ممدوح عبد العليم اللي معروف بطبعه الصلب وفرح واللي قامت بدورها منى زكي، المسلسل اتعرض أول مرة سنة 1998، ولازال بيتم بثه حتى الآن من حين لآخر على كذا قناة فضائية.

العصيان
مسلسل بيتكلم عن الميراث والعداء اللى بيتكون  بين أفراد الأسرة الواحدة بسببه، بيتمحور المسلسل حوالين شخصية أساسية وهي حامد الغرباوي واللى يجسدها محمود ياسين.
أول حلقة اتذاعت من المسلسل كانت سنة 2001

ذئاب الجبل
مسلسل إنتاجه كان سنة 1992 ومن اسمه واضح إنه بيحكي عن الصعيد المصري وعاداته وتقاليده واللي في بعض الأوقات بتكون شديدة، لكن رغم كده بتقدر شخصية الشيخ بدار كسر صلابة تلك العادات بالخروج عنها ومن هنا بيشتعل الصراع في المسلسل.


التوأم
من الأعمال المميزة للمخرج مجدي أبو عميرة واللي  كان بيتم عرضه في أواخر التسعينات، المسلسل بيلخص قصة توأم، واحدة منهم طيبة والتانية طباعها ميالة للعنف والشر والأنانية، وكان المسلسل بيتكلم عن الصراع الأزلي بين الطيبة والشر.. الجنة والنار.

ليالي الحلمية
منين بيجي الشجن.. من اختلاف الزمن

ومنين بيجي الهوى.. من ائتلاف الهوى
ومنين بيجي السواد.. من الطمع والعناد
ومنين بيجي الرضا ..من الايمان بالقضا

تتر المسلسل علم في أذهان ومزاج ناس كتيرة، لدرجة أن سماعه بيخلي الناس تحن للفرجة مرة تانية على المسلسل، اللى كانت أحداثه بتدور حوالين التاريخ المصري متجسد في حي الحلمية، واللي كان عبارة عن حي راقي بتسكنه العائلات الأرستقراطية وبعدها تحول لحي شعبي أصيل، الجزء الأول من المسلسل اتذاع في 1987، ده غير 4 أجزاء تانية اتعرضت في الفترة من سنة 1988 لحد 1995 وكان فيه جزء سادس سنة 2016  لكنه ماحققش نفس مستوى نجاح باقي الأجزاء.

سوق العصر
مسلسل بيتكلم عن صراع الخير والشر في المجتمع المصري  في إطار الثورات المصرية، متمثلين في شخصية منصور المغازي اللى بيعبر عن الخير والدفاع عن الثورة وبيصادم شخصية محمود ياسين اللى بتجسد الشر والفساد في المجتمع.

ونيس
مسلسل اجتماعي اتعرضت أول حلقة منه سنة 1994، المسلسل لاقى اهتمام من جمهور عريض لإنه كان بيتكلم عن الأسرة المصرية في محاولة لتربية الأبناء على المثل والقيم الخيرة.

 
لن أعيش في جلباب أبي
مسلسل اجتماعي مصري إنتاجه كان سنة 1996، بنبدأ مع المسلسل حكاية كفاح حققها عبد الغفور البرعي لحد ما وصل لمرتبة عالية من المستوى الاجتماعي والمادي، لكن كان فيه صراع في المسلسل بين رغبة الأب ورغبة الابن وده كان محور الحكاية واللي قدر اسم المسلسل إنه يعبر عنها بجدارة.


المال والبنون
مسلسل من جزئين ويعتبر من أهم المسلسلات اللى اتعرضت في بداية التسعينات.. 1993 الجزء الأول أما الجزء التاني كان في سنة 1995، بيناقش موضوع الفقر والغنا بين العائلات.

حديث الصباح والمساء
مسلسل درامي مصري بطولة عبلة كامل وليلى علوي وعدد كبير من النجوم، المسلسل بيتناول حكايات مصرية من الجانب الاجتماعي والسياسي في إطار درامي.

هوانم جاردن سيتي 
المسلسل كان جزئين واحد منهم اتعرض سنة 97 والتاني بعدها بسنة، بيتناول المسلسل قصص حب مختلفة ولكن على خلفية سياسية، بتبدأ القصة من الحكم الملكي في مصر وصولًا لعصر ثورة 1952.

البخيل وأنا
تدور أحداث المسلسل حوالين تاجر مصري شديد البخل مع أسرته ومع كل اللي يعرفهم، هو في الحقيقية  بيملك ثروة كبيرة جدًا لكنه بيحتفظ بيها لنفسه وفي النهاية بيموت من غير ما يتمتع بثروته وهو سايبها لغيره.


العطار والسبع بنات
من اسمه واضح ان المسلسل كان اجتماعي ودرامي يتكلم عن أسرة مكونة من عطار وهو نور الشريف و7 بنات وهم أبنائه، المسلسل خليط بين الحب والمودة المتمثلة في الجو العائلي والكوميديا والدراما.

الحاج متولي
3 على واحد يا دوب 4 على واحد حرااااااااام..  أشهر جملة اتقالت في المسلسل و لازالت بتتردد على ألسنة الناس  للتعبير عن الرجل المزواج اللي بيحب الستات.
حكاية المسلسل كانت بتتكلم عن الحج متولي نور الشريف الراجل اللي بيقدر جمال الست وبيحب يتجوز كتير وفعلا اتجوز 4 ستات وكانوا مستقرين في بيت العيلة  وسط أبنائه، المسلسل بيتميز بجوه العائلي كوميدي ودرامي.

الشهد والدموع
مسلسل درامي اجتماعي بطولة يوسف شعبان، بيصنف العمل ده إنه من أروع الأعمال الدرامية اللي تم إنتاجها وده كان حسب كلام النقاد، وفيه بعض الآراء اللى بتقول إنه ساهم في بناء وتكوين شخصيات مسلسل ليالي الحلمية.
المسلسل بيتكلم عن الظلم واللي بينتج عنه صور  كتيرة للعنف، فهو بيتناول الصراع الأزلي بين الخير والشر.

أرابيسك
اسم المسلسل كان مختار بعناية عن موضوعه واللي بيتمحور  حوالين شخصية فنان الأرابيسك وجسدها الفنان الكبير صلاح السعدني.
المسلسل كان بيتناول شخصية الفنان ده  بعد تعرضه لأحداث كتيرة أفقدته الاهتمام بمجال عمله وكان منها الدخول لدائرة المخدرات والإدمان ومن هنا كانت نقطة التحول.

أوبرا عايدة
"أوبرا عايدة .. وعايدة وأوبراااااااا" بداية تتر المسلسل ده واللي نقدر نصنفه على إنه عمل  مزج بين الدراما والكوميديا.
ويتناول المسلسل قضية من أهم القضايا اللي بيواجها الطبيب في حياته وهي الموت الرحيم أي الموت بدلًا من عذاب المريض..



سنبل بعد المليون
مسلسل درامي تلفزيوني كان من إنتاج سنة 1987، بعد ما جمع سنبل مليون جنيه في الجزء الأول من المسلسل، بدأ يستغلها في الانتقام من شخص سرق كليته، كل ده في إطار كوميدي ودرامي.

فارس بلا جواد
مسلسل تاريخي مصري يدور في حقبة  الاحتلال الإنجليزي لمصر من بطولة محمد صبحي، وطالع في المسلسل بأكتر من شخصية بيغير بينهم بالماسكات اللى بيحطها على وشه والملابس.

رأفت الهجان
مسلسل سياسي بيتكلم عن المخابرات المصرية ودورها في التصدي للعدو  الإسرائيلي متمثلة في شخص اسمه رأفت الهجان، وهو كان الاسم الحركي للمواطن رفعت علي سليمان الجمال  الشخصية الحقيقية.

Comments: