إزاي تعمل أشهر 6 ستايلات للدقن؟ شوف الشرح بالصور

08/11/2018

الدقن حاجة أساسية في وسامة الراجل، واللي مهتم يعمل "لوك" مختلف أو حتى يحافظ على "لوك" أو ستايل ثابت، بيفكر كتير هيعمل إيه في دقنه.. هيحافظ على طول وستايل معين ولا هيغير فيها، وده بيبقى مرتبط بستايل شعره ولبسه كمان.. في الموضوع ده هنقولك على أشهر وأحسن 6 ستايلات للدقن معروفين عالميا، هنقولك بيتعلموا إزاي وبيليقوا على نوع وشك ولا لأ.
 

1- بالبو

الستايل ده منتشر جدا، سواء عملوه مشاهير أو شباب عاديين، لكن أوضح مثال عليه هي دقن "روبرت داوني جونيور"، نجم Avengers وIron Man، وزي ما هو واضح من وش "داوني جونيور"، الستايل ده بيليق أكتر على اللي دقنهم صغيرة من تحت.

عشان تعمل "بالبو ستايل" محتاج تربي دقنك وشنبك فترة طويلة ماتقلش عن 4 أسابيع، الفترة دي هتخلي دقنك كثيفة كفاية فتقدر تحلق الشعر اللي على جنب الشنب من الناحيتين، وده ممكن تشيله باستخدام ماكينة كهربائية زي ماكينة "براون".

2- باندهولز

اللي طلع الستايل ده هو إيريك باندهولز، صاحب شركة رائدة في منتجات العناية بالدقن من الزيوت وغيرها، الستايل ده مناسب أكتر اللي على شكل مثلث أو على شكل بيضاوي.

الشكل ده محتاج بالك يبقى طويل لأنك هتقعد 4 شهور تقريبا شكلك هيبقى غريب ودقنك مش منتظمة وهايشة، استحمل الشكل ده وخليك بتربي دقنك لحد ما توصل لأقصى طول ممكن ليها، وده محتاج حوالي 7 شهور، بعد المدة دي تقدر تشكل فيها شوية أو تظبطها شوية أو حتى تسيبها زي ما هي، وده بيختلف من رغبة شخص لشخص.

3- الدقن الدائرية

الستايل ده بتبقى الدقن فيه دائرية وموصولة بالشنب، ميزته إنه شكل الوش بيكون منتظم وهو مثالي للناس اللي شغلها محتاج إن شكلهم يبقى مهندم ومن غير ما يقصروا دقنهم أوي، الشكل ده بيليق أكتر حاجة على الناس اللي وشهم بيضاوي أو مدور.

وإنت بتعمل ستايل الدقن الدائرية، اعمل حسابك إنك تربي دقنك وتوصلها لكثافة كافية عشان تاخد راحتك وإنت بتحلق شعر الدقن اللي في الجنبين وبتسيب الجزء الدائري اللي تحت زي اللي باين في الصورة، لأنك لو مش مربي دقنك كفاية ده هيأثر على الجزء اللي تحت اللي إنت عايز تسيبه، التهذيب ده عموما بيكون صع وأحسن تروح لصالون حلاقة يظبطهالك.

56

4- دقن السوالف

مفتاح الشكل ده في السوالف، وأول واحد عمله كان جنرال أمريكي في القرن الـ 9 اسمه Ambrose Everett Burnside، والستايل ده بيليق جدا على الوش المربع والدائري.

عشان تعمل الستايل ده، محتاج تربي الشنب والسوالف والدقن لفترة طويلة لحد ما يتقابلوا وساعتها تحلق شعر الدقن من تحت عند منطقة الشفة السفلية، وتسيب الشعر بس من السوالف للشنب وبطول الخدين طبعا.

5- جاريبالدي

لو معندكش وقت تهتم بدقنك، الشكل ده مناسب جدا ليك، لأن ستايل "جاريبالدي" هو الشكل الأصغر والأسهل من ستايل "باندهولز" الللي اتكلمنا عنه فوق، لأنك بتهذبها وبتظبطها من وقت للتاني.. أكتر وش بيليق عليه هو الوش المستطيل والبيضاوي.

عشان تعمل "جاريبالدي" لازم تسيب دقنك من غير حلاقة أو أي تظبيط لمدة 4 شهور، والمدة دي بتختلف حسب نمو شعر الدقن عندك يعني ممكن تزيد أو تقل، استنى لحد ما يبقى طول الدقن من بدايتها لحد آخرها بين 15 و20 سم، ومن وقت للتاني لازم تخف الجزء اللي تحت خالص عشان تفضل على نفس طولها وتديها من تحت الشكل الدائري أو اللي شبه القوس.

6- فان دايك

الستايل ده متاخد من رسام  أوروبي مشهور اسمه أنتوني فان دايك عاش في القرن الـ 17، وهو لايق على الأشخاص اللي دقنهم صغيرة من تحت.

عشان تعمل ستايل "فان دايك"، ربي دقنك لحد ما توصل لطول متوسط، وبعدين احلق كل الشعر من أول السوالف للخدين للرقبة عشان تسيب المنطقة اللي تحت بس هي اللي طويلة، وبعدين احلق الشعر الزيادة في الدقن من تحت عشان تساويها وفي نفس الوقت تفضل محافظ على شكل V، وسيب شنبك من غير ما تيجي ناحيته.

- الموضوع ده برعاية (Braun (Grooming Kit

Comments: