حوار مع أسماء أبو اليزيد: العين بتفضح الإحساس.. ومابنساش الموقف ده من طفولتي

30/10/2018

عرفها الجمهور في دور "تقى" في مسلسل "هذا المساء" سنة 2017، البنت الهادية المنكسرة اللي عينيها بتطلع شجن ومشاعر مختلطة من الحب والخوف وقلة الحيلة، أثرت في كل اللي شافوها وبقت حديث السوشيال ميديا، شوية عن تمثيلها وشوية عن جمالها المختلف، عشرات الآلاف بيعيدوا نشر صورها وهي بتضحك ومقاطع فيديو ليها من "هذا المساء" وخصوصا المشهد اللي بتقعد فيه جنب سمير في التاكسي والراديو بيقول "حبك مفرحني فرحة طير بطيرانه"، بعد دقايق من الاعتراف بحبها ليه.

أسماء بعد "هذا المساء" أثبتت إنها مش مجرد ظاهرة، لأن خروجها من كاست المسلسل (تامر محسن ومحمد فراج وأحمد داود وإياد ناصر) وشغلها مع فريق تاني، ماغيرش حاجة في جودة أدائها، وقدمت أدوار عجبت الناس في "ليالي أوجيني" و"أنا شهيرة.. أنا الخائن"، ودخلت السينما بأفلام "الكويسيين" و"عيار ناري" والفيلم القصير "ماتعلاش عن الحاجب"، اللي خد جايزة نجمة الجونة الذهبية لأحسن فيلم عربي قصير في الدورة التانية من "الجونة".. "ذا جلوكال" حاور أسماء أبو اليزيد في حاجات كتير، بداياتها وهواياتها وأصعب محطات التمثيل في مشوارها:

- لما كانوا بيسألوكي عايزة تطلعي إيه وإنتي صغيرة.. كنتي بتردي بإيه؟

* كل مرة كنت برد بحاجة مختلة، كل يوم كانت أحلامي بتتغير عن اليوم اللي قبله، كان نفسي أطلع كل حاجة، دكتورة ومهندسة وظابط شرطة ومضيفة طيران وعالمة فضاء.

- إيه أكتر موقف مابتقدريش تنسيه من طفولتك؟

* في حاجات كتيرة، بس في موقف محدد ليه علاقة بالتمثيل لما بفتكره بقول إنه كان دليل على حبي للمهنة دي من وأنا صغيرة، كان عندنا دروس العربي اللي فيها حكايات زي "سعفان الكسلان" مثلا مش فاكرة أوي الأسامي (تضحك)، وكان لما بيبقى فيه شخصيات نقراها كانت المدرسة بتوزع علينا الأدوار وكانت بتنبهر بأدائي في القراية، وإزاي بقراها وبديها أداء تمثيلي، وأنا مش فاهمة أنا بعمل إيه بيبسطها ويخليها تقوللي برافو

- خريجة فنون جميلة.. واخدة الكلية عن حب ولا استكشاف ولا مجموع؟

*  أنا بحب الرسم جدا من وأنا صغيرة وبيتقاللي دايما إني برسم كويس، وخدت الموضوع من بابايا لأنه بيرسم كويس أوي بس مكنش طموحي أكمل في المجال ده لما أكبر، فنون جميلة دخلتها استكشاف بصراحة واتبسطت جدا.

- إيه اللي حبيتيه في "فنون جميلة"؟

* بحب الكلية عموما وبعتز بيها، اكتشفت معاها جوانب كتيرة في شخصيتي وساعدتني أنضج بشكل جيد

- اشتغلتي إيه قبل التمثيل؟

اشتغلت في الدعاية والإعلان واشتغلت شوية Branding واشتغلت Art Instructor

- إمتى بدأت علاقتك بالتمثيل؟

بدأت في الكلية مع فريق أتيليه المسرح، كنت بدور على فريق المسرح في الكلية من ساعة ما دخلت لحد ما اتوفقت إني دخلته، واتبسطت واتعلمت كتير جدا في العروض المسرحية التابعة للجامعة

- إيه حكايتك مع الدوبلاج؟

* أنا بحب أقلد الحاجات من وأنا صغيرة وأعمل أصوات، واستغليت الفرصة لما لقيت إني ممكن أعمل شخصية "هادي" في كارتون عصام والمصباح إخراج أشرف مهدي، وهو ممثل وأستاذي في كلية فنون جميلة، وكان عامل دور صديق سمير في "هذا المساء"، المهم إنه كان بيخرج عصام والمصباح واقترح عليا أعمل شخصية الطفل "هادي"، تحمست جدا وأنا بحب أصلا اللعب والتمثيل بالأصوات لأن الصوت أداة مهمة من أدوات الممثل

- الغنا في "ليالي أوجيني" مكنش أول مرة ليكي، إيه حكاية فريق "بهججة"؟

* بهججة فريق مكون من 5 بنات بيغنوا، رئيس الفرقة والعنصر الأساسي فيها هو أيمن حلمي، وهو برضه ملحن الأغاني، بدأنا من 2015 مع بعض وبنقدم فن المونولوج بشكل معاصر، "بهججة" ليها دور كبير في حتة إني أحب الغنا أو تجيلي الجرأة إني أقف قدام ناس أغني، وأنا مابعتبرش نفسي مطربة، أنا مؤدية بس، وبحب "بهججة" جدا وبحب أشتغل معاهم

- احكي لنا عن أول أعمالك.. فيلم "آخد من وقتك دقيقة"؟

* ده كان فيلم قصير عملناه وإحنا لسه في الجامعة إخراج وفاء أبو الضياء، واللي رشحنا للفيلم أحد الأصدقاء، كنا مجموعة ممثلين في أتيليه المسرح، الفيلم دمه خفيف ومدته قصيرة وكانت كواليسه خفيفة

- إزاي حضرتي لدورك في "هذا المساء"؟

* كانت مسؤولية كبيرة جدا إني أشيل دور كبير ومهم في أول حاجة الناس تشوفني فيها، وكنت بتمنى من ربنا يوم ورا يوم إني أكون قد المسؤولية دي، وبشكر أستاذ تامر محسن (مخرج العمل)، على ثقته وشركة "بي لينك"، وبحمد ربنا إنه مخلانيش أخذلهم

- إزاي الفنان ممكن يمثل بعينه؟

* لأن العين أقرب طريق بنشوف من خلاله الإحساس جوه اللي قدامنا، العين أداة قوية جدا من أدوات الممثل، ده الشباك المفتوح اللي بيطلع الإحساس اللي اللي ممكن أكون مخبياه وبعمل عكسه، طول ما إنت كممثل حاسس أوي بالحوار والحالة اللي بتقدمها، ده بيطلع من عينك بشكل تلقائي

- وإيه أصعب مشهد عدى عليكي في "هذا المساء"؟

* كان فيه أكتر من مشهد صعبين، لكن أصعهم مشهد تحرش "فياض" بـ"تقى"، قد إيه البني آدم ده حاططها في موقف إنها لازم تسكت وهو بيتحرش بيها لأنه ماسك عليها حاجة، وحتة الضعف وقلة الحيلة، هي عايزة تقتله بس مش هتقدر تعمل أي حاجة، كان إحساس صعب جدا

- إيه أكتر جملة بتسمعيها عن جمالك/ شكلك/ مظهرك؟

* أكتر حاجة بسمعها، هي إن ربنا وهبني شيء مختلف، ومبسوطة جدا بالحاجة دي وأنا  مليش أي يد فيها، ربنا وهبها لي زي ما وهب ناس كتيرة حاجات حلوة

- لعبتي بطولة الفيلم القصير "ماتعلاش عن الحاجب" مع مريم الخشت؟، إيه اللي بيخلي الفنان يحب يشارك في فيلم قصير رغم إنه منتشر تجاريا؟

* لأن مفيش تناقض بين كوني بعمل أفلام روائية طويلة ومسلسلات وبين المشاركة في فيلم قصير، الفيلم القصير عمل فني مكتمل فكرته ومحتواه بيوصله لكن في مدة زمنية أقصر

- بتعرفي تعملي أكل؟ وإيه هي أكلتك المفضلة؟

* بعرف أعمل أكل لما بتكون الغزالة رايقة، بدخل المطبخ وبحب أجرب

- وإيه أكلاتك المفضلة؟

* بحب ورق العنب جدا وبحب السوشي بس طبعا عمري ما عملته ومش هجرب أعمله، وبحب المكرونة بالبشاميل

- عندك طريقة مميزة/ اختراع بتعملي بيه أكلة معينة؟

* لما بدخل المطبخ ممكن مماشيش على الخطوات بالظبط، بس بحب وقفة المطبخ وبحب أخترع

Comments: