١٠ سيناريوهات مرعبة لنهاية العالم

31/10/2018

غالبا مفيش حاجة ممكن تخوف أكتر من نهاية العالم، وإنت لسه عايش وبتتفرج على المشهد ده مهما كان السيناريو اللي ممكن يحصل فهو شيء مخيف، بالرغم من اختلاف السيناريوهات اللي اتقالت زي إن الكواكب ممكن تدمر الأرض أو ييجي فيروس أو وباء يقضي على البشرية كلها أو غيرهم من السيناريوهات اللي توقعها العلماء.. موقع List 25 قدم أغرب 10 سيناريوهات لنهاية العالم، حبينا نشارككم بيها بمناسبة الهالوين

1- مؤخرا الأمم المتحدة أصدرت بيان بتقول فيه إننا لازم يبقى عندنا وعي ونحاول نقلل نسبة ثاني أكسيد الكربون في الجو قبل ما تحصل كوارث طبيعية مش هنقدر نتحكم فيها، لإن بسبب زيادة نسبة ثاني أكسيد الكربون درجة الحرارة هتعلى وهيبقى فيه فيضانات من القطبين وكوارث هتزود نسبة المجاعات في الأرض، وده اللي هيسبب الفقر وزيادة نسب الوفيات في العالم.

2- مع أول قنبلة نووية هتنفجر هيتوالي انفجار القنابل النووية وده اللي هيسبب خساير كبيرة في الأرواح، وهتسبب كمان كوارث طبيعية.

3- اكتشف العلماء اللي شغالين في CERN (المنظمة الأوروبية للأبحاث النووية)، على إن ممكن "مصادم هادرون" (بيشتغل على تسريع تصادم الجسيمات)،  بينتج ثقب أسود بالرغم من إن فيه ناس بتقو ل إنه آمن جدا، وبالرغم من كده فلو حصل فعلا وبقى فيه ثقب أسود فهو ممكن يبتلع الأرض كلها.

4- فيه علماء قالوا إن ممكن نواة الأرض المنصهرة تهدا وتتماسك بشكل كبير وده اللي هيسبب انهيار في الغلاف الجوي، والأرض مش هيبقى مكان صالح للسكان، وبيعتقدوا إن نفس الشيء حصل للمريخ من مليارات السنين.

5- في سيناريو تاني تنبأ بيه الحاخام موسى إسرائيل بنيامين في كتاب نشره سنة 1894، إن هيكون فيه كسوف للشمس في شهر أيلول العبري، وده هيسبب عواصف وضرر كبير لممالك الشرق وهيكون بداية لنهاية العالم، وقال إنها علامة سيئة بالنسبة لدول معينة.

6- من حوالي حوالي 780 ألف سنة، انقلبت أقطاب الأرض، وتوقع العلماء إن نفس الشيء هيحصل تاني، وده اللي هيأثر تأثير كبير على شبكات الكهرباء والأقمار الصناعية، وهتزعزع استقرار العالم.

7- فيه بعض العلماء شيفين إن هيكون فيه ثقوب سودا في السما هتبتلعنا، والسيء في الموضوع إنهم عارفين ده ومفيش في إيدهم حاجة يقدموها، ولقوا كمان تقريبا 60 ثقب أسود.

8- توقع مجموعة من العلماء إننا بعد سنين هيكون فيه اتصال بينا وبين الكائنات الفضائية، وتوقع ستيفن هوكينج إن اللقاء ده مش هيكون لقاء سعيد أبدا وقارنها بمقابلة الأمريكان الأصليين لـ كولومبوس، وحسب العلماء المقابلة دي ممكن تمحي كل اللي على الأرض.

9-  الكتب المقدسة بقى توقعت إن وقت انتهاء العالم هيكون فيه حروب وزلازل ومجاعات ومعاناة للبشر كلهم، هيقودها المسيخ الدجال.

10- بعض العلماء بيعتقدوا إن نهاية العالم هتكون بسبب تصادم كوكبين مع الأرض، وده ممكن يحصل لو كوكب دخل لنظامنا الشمسي واتوجه للأرض مباشرة، وبيعتقدوا إن ده ممكن يحصل بسهولة لأنه حصل مرة قبل كده ونتج عنه تشكيل القمر.

Comments: