صاحبة تمثال "صلاح" ترد على انتقادات "السوشيال ميديا" في حوار مع "ذا جلوكال"

04/11/2018

تمثال محمد صلاح اللي ظهر النهاردة في منتدى شباب العالم في شرم الشيخ، عمل جدل كتير وواجهته انتقادات بسبب لونه الغريب.. "ذا جلوكال" اتكلمت مع صاحبة التمثال مي عبدالله، وهي نحاتة من محافظة المنيا، عن بداية الفكرة وتنفيذها والمواد المستخدمة فيها ومدى رضاها عن التمثال.

ومي خريجة فنون جميلة المنيا 2017، وحققت شهرة كبيرة السنة اللي فاتت بسبب مشروع تخرجها اللي لقى صدى واسع على السوشيال ميديا، وهو كان عبارة عن 8 قطع تماثيل لماري منيب وإسماعيل يس وعبد الفتاح القصري ومجموعة من الفنانين.

لما سألنا مي عن إيه الدافع ورا إنها تشارك في المنتدى السنة دي، قالت إن بعد مشروع التخرج بتاعها السنة اللي فاتت، جالها تليفون إن القائمين على منتدى شباب العالم، في نسخته الأولى، حابين إنها تشارك بتمثال من شغلها، وفعلا مي شاركت بتمثال بيعبر عن فكرة المؤتمر الأساسية، وكان عبارة عن هرم بيحاوطه 8 أشخاص من مختلف قارات العالم، وفوق الهرم كرة أرضية، وفعلا التمثال عجب الرئيس عبدالفتاح السيسي جدا واصطحبه معاه قصر الاتحادية، ولما سألناها عن مين اللي شجعها تشارك في منتدى الشباب من السنة اللي فاتت قالت لنا إن اللي شجعها هي شركة "Creative Arab Talent" وعمرو قورة رئيس مجلس إدارة الشركة، واللي قرر يتبنى موهبتها.

مي قالت كمان إن فكرة نحت تمثال لمحمد صلاح كانت في دماغها من زمان، لأنه بقى من أهم لاعبي العالم وحصل على أكتر من جايزة مهمة، "ودي حاجة بسيطة نقدمها له".

وقالت كمان إن المواد الخام اللي استخدمتها في التمثال هي البوليستر والبرونز، البوليستر هي اللي عملته بإيديها أما البرونز فمش هي اللي صبته بنفسها، وقالت إن النسخة اللي باللون الأبيض اللي موجودة على صفحتها على "فيس بوك" كان أحسن لكن لونه بالبرونز للأسف "مش عاجبها ولا راضية عنه لإنه قبل البرونز أحلى بكتير واللي صب البرونز هو اللي ظلم التمثال"، وأضافت "بس كل الفنانين بيحصل معاهم كده بيودوا تماثيلهم باللون الأبيض أو بالبوليستر وبيتصب برونز بره فوارد جدا إن يحصل غلط غير مقصود يعني".

وردت مي على الانتقادات اللي اتوجهت للتمثال على السوشيال ميديا "كده كده الانتقادات موجودة ومش هنبص لها، بس إحنا هنبص للجانب الإيجابي"، وقالت إنها مش راضية عن النسخة الأخيرة اللي ظهر بيها تمثال محمد صلاح في المنتدى، لكن التمثال بلونه الأبيض مفيش عليه أي انتقادات، أما بالنسبة للشكل فالتمثال هو عبارة عن شكل كاريكاتيري زي التمثايل اللي عملتها للفنانين السنة اللي فاتت".

وأخيرا، عرفنا من مي إنها بتحضر لمعرض في آخر شهر نوفمبر واللي كان المفروض يبقى في أول نوفمبر بس اتأجل بسبب المنتدى، وهتعرض فيه 22 قطعة فنية لتماثيل لفنانين مصريين أثروا في حياتنا بشكل عام، بين مطربين وممثلين.

Comments: