أعياد ممكن يخترعها المصريين زي ما اخترعوا الفالنتين المصري

04/11/2018

بمناسبة إن النهاردة 4 نوفمبر، عيد الحب أو الفالنتين في نسختة المصرية، لكن غالبا المصريين ماكنوش محتاجين عيد حب تاني غير العيد الأساسي المعروف في 14 فبراير، لكن محتاجين أعياد تانية يحتفلوا فيها بحاجات لا تقل أهمية في حياتنا عن الحب، ومن ضمن الأعياد دي:

1- عيد الهلس:

إحنا محتاجين عيد كامل يطلع طاقة الهلس اللي جوانا، والهلس طبعا كلمة عامة بتشمل معاني كتير تحتها سواء كان رقص أو غنا أو قعاد على القهوة أو ضحك على إيفيهات عادية أو إيفيهات قبيحة، أيا كان فده كله ممكن يتحط تحت بند واحد كده ويبقي اسمه عيد الهلس، وكل اللي بيحب نوع معين من الهلس ده يحتفل بيه مع الهلاسين اللي مصاحبهم، واللي مايعرفش هلاسين يروح يتعرف على هلاسين من أي مجتمع ويهلس معاهم.

2- عيد المحشي:

بالنسبة لناس كتير المحشي هو الوجبة الأساسية في الأعياد والمناسبات الرسمية، محدش عنده فكرة ليه المحشي وجبة مهمة كده في حياة المصريين مع إنه صعب وخطواته كتير، ومحدش عنده فكرة الناس بتحبه ليه وهو بيبوظ القولون وبيتخن من كمية الرز اللي فيه!! فعشان الإخلاص ده بالرغم من كل التعب والمتاعب لازم نعمله عيد مخصوص.

3- عيد المرقعة:

المرقعة مهمة، سواء في الشغل أو في الحياة بصفة عامة، الموضوع بدأ بالمرقعة في الشغل، ومنها تطورت للمرقعة في الحياة عموما وبقى الموضوع أسلوب حياة، زي المرقعة في العلاقات والمرقعة في القرارات والمرقعة في الصحة والأكل وغيرهم، كل اللي فات ده بيؤكد إنه لازم يبقى فيه عيد مرقعة مصري يلم شمل مرقعتنا كلنا.

4- عيد كوبري أكتوبر روالدائري:

المصريين بيقضوا على كوبري أكتوبر أو الدائري نص يومهم تقريبا، عشان أغلب مشاويرهم بتسدعي يطلعوا كوبري أكتوبر أو الدائري، اللي هما غالبا بيبقوا زحمة وواقفين، وطبعا تخليداً لوفائهم ووجودهم جنب المصريين في أغلب مواقف حياتهم، يستاهلوا عيد.

5- عيد الـ"يخربيتك":

أهم كلمة في تاريخ المصريين هي "يخربيتك" أو "يخربيت عقلك" أو "يخربيت أي حاجة مش عجباهم" فهي الكلمة اللي بتوضح المشاعر السيئة اللي هما وصلوا لها، فليه نعمل عيد للحب وننسي كلمة يخربيتك، وكل واحد متضايق من حاجة أو من حد يروح يقول له "يخربيتك".

6- عيد إيفيهات الأفلام:

يعني تقريبا إحنا بنتكلم مع بعض بإيفيهات الأفلام والميمز اللي بتتعمل على إيفيهات الأفلام، وإيفيهات الأفلام شيء مقدس بالنسبة لنا، مش شرط يعني فيلم معين أو إفيه معين بس ممكن يعني يبقي شعار العيد ده فيلم "الناظر"، العيد ده هيبقى مفيد أكتر من عيد الحب و أهو على الأقل حاجة تضحكنا وتعرف الناس اللي مابيفهموش الإيفيهات دي بدل ما نقعد نشرح لهم الإيفيه.

7-عيد الأجازات البريدج:

هيبقي عيد مسلي جدا هناخد فيه إجازة من لا شيء كده، ونحتفل بيه بكل الأجازات اللي خدناها "بريدج" طول السنة زي الإجازة اللي بتخلص يوم الأربع مثلا فلا لازم تاخد الخميس كمان معاها ونرجع نشتغل بقي الأحد من أول الأسبوع كده.

8- عيد المزايدات:

عيد المزايدات سواء كانت المزايدات السلبية أو الإيجابية، ونعلي ونزايد كلنا على بعض في اليوم ده، زي مثلا أنا مبسوط إني شوفتك النهارده، فهتقوله "لا أنا اللي مبسوط أكتر"، فهيقولك "لا أنا مبسوط من انبساطك"، فتقوله "انبساطك بيبسطني"، وهكذا طول اليوم.


 

Comments: