تفاصيل مشروع قانون حظر ارتداء النقاب.. مع ولا ضد؟

05/11/2018

نائبة برلمانية اسمها دكتورة غادة عجمي، اقترحت مشروع قانون للبرلمان بينص على حظر النقاب أو البرقع أو حاجة بتغطي الوش في الأماكن العامة والحكومية، في أي وقت وتحت أي ظروف، وإن اللي هتلبس النقاب أو هتغطي وشها هتدفع غرامة مالاية ألف جنيه، وهيتم مضاعفة الغرامة في حالة إنها كررت لبس النقاب أو غطت وشها تاني، ورغم انتشار بنود القانون إلا إن المتحدث باسم البرلمان قال إن مفيش حاجة وصلت للمجلس بشكل رسمي.

وحددت الدكتورة غادة عجمي الأماكن العامة المحظور فيها لبس النقاب، زي  المستشفيات والمراكز الصحية والمدارس ودور السينما والمسارح والمكتبات العامة، والمتاحف والمباني الحكومية، وغير الحكومية العامة، ووسائل النقل، وصالات القادمين والمغادرين في المطارات، والملاعب المغلقة وقاعات المحاضرات والحضانات، ورياض الأطفال في القطاعين العام والخاص، وأي مكان تاني وزير الصحة بيعتبره مكان عام.

وكانت مبررات الدكتورة غادة عجمي إن النقاب بقى بيشكل خطر أمني على مصر وخصوصا في الفترة الأخيرة لإن الإرهابيين بيستخدموه للتخفي عشان مابيتمش رصدهم أمنيا، وقالت كمان إن النقاب لا يُعتبر فرض ديني زي ما قال الدكتور على جمعة مفتي مصر السابق، وإنه مش واجب، وقالت كمان إن فيه دول كتير اتحظر فيها لبس النقاب وده لأنه بيشكل خطر أمني، زي النمسا وبلجيكا وفرنسا وسويسرا وهولندا وألمانيا وإسبانيا وإيطاليا وبلغاريا والصين.

و أكدت كمان النائبة إن فيه 60 نائب برلماني بيدعموا مشروع القانون ده، وإن القانون هيتم عرضه على اللجنة التشريعية قريب، وبعدها هيتم عرضه على الجلسة العامة للبرلمان عشان يتم إقراره، وبعدها هيتم تصديقه من رئيس الجمهورية عشان يتم العمل بيه وأضافت كمان إن القانون ده اتأخر كتير.

قول لنا إنت مع ولا ضد القانون؟

Comments: