٩ أساطير محدش يفهمها غير المصريين

06/11/2018

مصر دايما بتبهر العالم بالحضارة اللي عندها والآثار والأماكن السياحية وغيرهم، بس المصريين بقى نفسهم بيبهروا العالم بحاجات مختلفة خالص عن الحضارة والسياحة والكلام ده، زي بعض العادات اللي طالعة من اللامكان واللامنطق زي:

1- شهقة الملوخية:

معروف طبعا إن مش نوع الملوخية هو اللي بيكون السبب عشان الملوخية تطلع حلوة أو وحشة وإن الشخص اللي بيعمل الملوخية هو السبب في حلاوتها، ومش هو لوحده هو وشهقته، شهقة الملوخية هي اللي بتخلي طبعا الملوخية طعمها حلو زي ما كلنا عارفين.

2- كوبايات العصير اللي ماخلصتش:

معروف برضه من معتقدات المصريين إن لو الضيوف ماخلصوش كوباية العصير اللي اتقدمت لهم معناه كده إن فيه بنت في البيت ده هتبور أو هتعنس يعني "إذا صح اللفظ أصلا"، وممكن المعتقد ده له سبب شوية إن معنى كده العصير مش حلو فالبنات اللي في البيت مابيعرفوش يطبخوا أو يعملوا أكل كويس وده "على حد قولهم" سبب كافي يخلي البنت ماتتجوزش.

3- خطي برجلك اليمين:

لما تدخل لأي مكان جديد وخصوصا لو بيت جديد أو عروسة هي اللي داخله بيتها، فهي لازم تدخل برجلها اليمين وده عشان بيجلب الحظ والسعادة والخير للبيت اللي هتدخل فيه.

4- التشاؤم من الغراب والبومة:

غالبا كل المصريين مابيحبوش يشوفوا غراب أسود أو بومة وخصوصا لو الصبح لإن ده بيقفلهم يومهم، أو بيعتبروا صوت البومة على البيت علامة إن ممكن تحصل مصيبة في البيت أو هيموت حد من أهل البيت.

5- العين الشمال لما ترف:

في الغالب العين لما بترف بيكون ده بسبب الإرهاق أو مشكلة في الأعصاب، بس المصريين بيعتبروا إن العين لما بترف ده فال وحش، وخصوصا لو العين الشمال، بيعتبروا دي علامة عن إنهم هيسمعوا خبر وحش أو هيقابلوا أحداث سيئة في يومهم.

6- دلق القهوة:

القهوة والشاي من أهم مشروبات المصريين عموما ومع ذلك بيعتبروا إن دلق القهوة اللي وارد جدا بسبب إنه مشروب يومي، لكن لو حد اتدلق منه القهوة هنلاقي اللي حواليه بيقولوا له إن دلق القهوة خير وإن أكيد فيه حاجة كويسة هتحصل.

7- وقوع الشعر على الأرض:

كل البنات بيحبوا شعرهم مهما ادعوا عكس ده، وأكيد البنات المصريات منهم يعني، لكن فيه معتقد عند المصريين إن لو شعر البنت وقع على الأرض وحد بيقصوا ليها، ده ممكن يبقى سبب كبير عشان شعرها مايطولش تاني.

8- الشبشب المقلوب:

لو حد قلب الشبشب أو لو الشبشب فضل مقلوب ده لازم حد يعدله على طول لإن ده معناه إن الشبشب لو فضل مقلوب كده هيتحول لشيطان.

9- خلفة البنات بتجيب الرزق:

على الرغم من إن أغلب المصريين بيعتقدوا إن خلفة الولاد أهم من خلفة البنات عشان هيبقوا سند ليهم لما يكبروا وهيشيلوا اسم العيلة والكلام ده، إلا إن فيه اعتقاد تاني عند المصريين خلفة البنات بتجيب الحظ والرزق والفلوس للعيلة كلها.

Comments: