إزاي تتعامل مع رسايل الابتزاز والتنمر على صراحة و Curious Cat؟

08/11/2018

الزهق والملل بيخلينا نعمل شير لأبليكيشنز زي صراحة وCurious Cat عشان نلعب والناس تبعت لنا عليهم وهما مجهولين ويقولولنا رأيهم فينا مثلا أو يسألونا أسئلة مختلفة، لكن مش كل الناس بتسأل أو بتبعت على الأبليكيشنز دي عشان يقولوا كلام إيجابي أو فضولي فعلا، فيه ناس بتبعت كلام سلبي وآراء سخيفة أو بتستخدم الموضوع للابتزاز اللي بيبقى له أنواع كتير، يعني ممكن يكون ابتزاز عاطفي أو جنسي أو معنوي زي مثلا إن حد يبعتلك تهديد إنه يكشف صور ليك أو فيديوهات أو معلومات عنك، وقتها مابنعرفش نرد نقول إيه، ده طبعا غير المشاعر السلبية اللي بتنعكس علينا، هنقولك خطوات ممكن تتعامل بيها مع الموقف عشان يعدي بسلام:

1- أول حاجة ممكن ترد بيها على الشخص إنك تطلب منه إنه يبطل يضايقك أو يبتزك وخصوصا لو عارفه، ممكن تتكلم معاه على الحقيقة وتقوله إنك عرفته وتطلب منه إنه يبطل يعمل ده.

2- لو حاسس نفسك مش هتقدر تواجه، تجنب الرسايل دي تماما، وماتردش عليها بأي شكل زي رسايل التهديد أو التوعد أو الشتايم.

3- احتفظ بـ"سكرين شوت" للرسالة اللي جتلك، ولو فيه أكتر من رسالة احتفظ بيهم كلهم لإن ده هيساعدك تجمع معلومات عن الشخص اللي بيضايقك، وممكن كمان توري الرسايل دي لشخص ذو سلطة وتوضح له إنك بتتعرض لتنمر أو ابتزاز.

4- لو ينفع تعمل "بلوك" للشخص ده أصلا اعمل كده طبعا، لكن لو ماتعرفش هو مين حاول تبطل تستخدم الأبليكيشن ده، المهم تتأكد إن مش هيوصل لك أي رسايل تضايقك من الشخص ده تاني.

5- قول لشخص من صحابك أو من أهلك إنك بتتعرض لتنمر أو ابتزاز لإنه ممكن يقدملك مساعدة ازاي تتصرف مع الشخص ده.

6- الابتزاز اللي من النوع ده بيندرج تحت التنمر الإلكتروني، عشان كده لو وصلت للشخص ده ممكن ببساطة جدا تقدم بلاغ عنه لمباحث الإنترنت.

7- من النصايح المهمة برضه إنك لازم تتجنب إنك تنشر على السوشيال ميديا صور أو فيديوهات حساسة ليك وممكن تبقى ليها طابع مثير أو جنسي، وبلاش تكتب كلام خاص بيك على السوشيال ميديا من الأساس.
 

Comments: