جولة في الأعمال العالمية لمحمد كريم: فيلم وبرنامج وصور مع النجوم

11/11/2018

الفنان محمد كريم اتشهر بظهوره في أكتر من فيديو على السوشيال ميديا مع الطيارات والعربيات الفخمة، ده غير صوره الكتيرة مع نجوم الصف في هوليوود، زي مورجان فريمان وكيت وينسلت وكيت بلانشيت، وكلامه دايما عن العالمية وإنه هيعمل فيلم مع نيكولاس كيدج، والحقيقة إننا ماشفناش أي أعمال عالمية لـ"كريم"، باستثناء فيلم مع الممثلة لاميتا فرنجية، ناطق بالإنجليزية ومتصور في الأردن اسمه A Facebook Romance وعمل فيه دور اسمه "سمير"، وحسب موقع IMDb فمحمد كريم ملوش أعمال تانية في هوليوود.

ومؤخرا، ظهر محمد كريم في صورة مع النجم نيكولاس كيدج، وانتشرت أخبار على موقع Hollywood عن فيلم النجم "كيدج" الجديد A Score to Settle اللي أكدوا فيها على مشاركة محمد كريم في دور في الفيلم وهو دور "جيمي"، وهو دور صعب وأكشن ومحتاج الفنان يحضر للدور ده وقت طويل، ويمكن دي تكون بداية "كريم" الحقيقية في العالمية.

ورغم تصوير فيلمه في الأردن، إلا إن الفنان محمد كريم صرح قبل كده في برنامج "On screen" على قناة "ON E" إن الشغل في هوليوود منظم جدا وإن الممثل بيكون عارف إن عنده دور قبلها بـ 8 شهور 9 شهور بالتاريخ وبكل حاجة، فده مساعدة جدا لإن هناك الدنيا متظبطة وبيبقى عارف مواعيده كويس جدا، فسهل التنقل وإنه بيروح وييجي، فده شيء بيساعده يبقى متواجد هناك وهنا، بدليل إنه عمل اللي كان عايز يعمله وشارك في reality show واتعرض على قناة VH1، وهو بداية كويسة وكان سعيد بيها، ورجع عشان يعمل مسلسل "أرض جو"، وهو بيعمل ده عشان يعمل حاجة يتبسط فيها، وإنه مش عايز يعمل حاجة وخلاص ومركز إنه يشتغل على حاجات تقدمه بشكل كويس بصفته مصري وعربي.

صور محمد كريم مع نجوم هوليوود، ممكن تكون الحاجة العالمية الحقيقية في مشواره، وبجولة سريعة في أكونت "إنستجرام" بتاعه، بنلاقيه بيتصور مع نجوم كتير عالمين ومصريين وعرب وسياسيين عرب كمان.

محمد كريم له أعمال كتير زي في السينما والتلفزيون المصري من أول مشاركته في مسلسل "أحلام مؤجلة" وفيلم "بدر" ومسلسل "بنات أفكاري" لحد أخر عمل له في مسلسل "أرض جو"، مرورا بـ"قبلات مسروقة" و"الريس عمر حرب" ومسلسل "نونة المأذونة"، لكن للأسف محمد كريم ماعندوش الشعبية الكفاية اللي بتخلي الجمهور يشجعه يوصل للعالمية لإنه لحد دلوقتي لسه مابقاش نجم شباك أو بطل لمسلسل درامي لوحده، لكن مشاركته أخيرا لـ نيكولاس كيدج هتعتبر خطوة لوصوله العالمية زي عمرو الشريف وعمرو واكد وخالد النبوي.

Comments: