التطعيم هينقذك.. 6 أمراض ممكن تصيبك لو مربي حيوان أليف

12/11/2018

تربية الحيوانات الأليفة زي الكلاب والقطط متعبة جدا، لإنك بتحس إن معاك طفل في البيت، بس في نفس الوقت ليها مميزات كتير لإنهم بيبقوا صحابك فعلا وماتقدرش تستغنى عنهم، بيحسوا بيك وبيلعبوا معاك، بيبقوا ونس وصحاب وبيعملوا حس وروح في البيت، لكن عشان ده يتم لازم تاخد احتياطاتك وتطعمهم في الأول قبل ما يعيشوا معاك لإنهم ممكن ينقلوا أمراض كتير للإنسان منهم:

1- عدوى كامبيلوباكتر: العدوى دي بتيجي عن طريق بكتيريا الكامبيلوباكتر جيوني، والبكتريا دي بتسبب الإسهال وألم في البطن وحمى عند بعض الناس، وبتكون موجودة في أمعاء القطط والكلاب والهامسترز والطيور وبتتنقل عن طريق المياه وبراز الحيوانات أو اللحم غير جيد النضج، واللبن غير المبستر، من مشاكل البكتيريا دي إنها معدية وممكن تتنتقل بين أفراد الأسرة والأطفال وبعضهم، وبيتم علاجها بالمضادات الحيوية.

2- خربشة القطط

لو القطط مصابة ببكتريا بارتونا هنسيللا، فهتصيبب الإنسان بانتفاخ الغدد اللمفاوية، والحمى، والصداع، وغالبا بتخف لوحدها من غير علاج، أو ممكن الدكتور يوصف لها مضاد حيوي، ونادرا ما بتسبب مضاعفات على المدى البعيد.

3- داء الكلب

هو مرض خطير معروف بيسببه فيروس بيدخل الجسم عن طريق عض ولعاب الحيوانات المصابة، الحيوانات اللي ممكن تسبب في المرض ده: الكلاب والقطط والخفافيش، لكن التطعيمات خلت نسبة الإصابة بالمرض ده تقل، ومصل علاج عضة الكلب بقى متوفر حاليا في المستشفيات لسرعة علاج الأشخاص اللي اتعرضوا لعض من الحيوانات.

4- مرض السعفة

هو عبارة عن مرض أو عدوى جلدية بيسببها أنواع من الفطريات اللي موجودة في التربة وعلى جلد البشر وعلى جلد الحيوانات الأليفة، وممكن الأطفال يجيلهم سعفة عن طريق لمس الحيوانات المصابة زي الكلاب والقطط، وغالبا ما بيكون المرض على هيئة منطقة مستديرة وجافة وحدودها حمرا، وممكن العدوى توصل لفروة الشعر اللي بتسبب جزء من الصلع في الشعر، وبيتم علاجه عن طريق الشامبو والكريم والحبوب.

5- مرض السميات

هو مرض بتسببه الدودة الطفيلية Toxocara اللي بتعيش في أمعاء الكلاب والقطط، وغالبا ما بيتم العدوى عن طريق نقل بيض الديدان من براز القطط والكلاب للرمل أو التربة اللي بيلعب فيها الأطفال، وبتتنقل لأمعاء الأطفال، وأعراضها بتكون حمى وكحة وتضخم الكبد والغدد الليمفاوية والطفح الجلدي، لكن لو اتنقلت اليرقات للعين، بيسبب تسمم العين اللي ممكن يسبب فقد تام للرؤية.

6- مرض المقوسات

هو عدوى أو تلوث بيسببه طفيل أحادي الخلية بينتقل من الحيوانات المصابة بالمرض للبشر، وكمان بييجي للإنسان عن طريق اللحوم اللي مش مستوية بشكل جيد، وأعراضها هو تضخم في الغدد والتعب وألم العضلات والحمى والتهاب الحلق والطفح الجلدي، وللحوامل ممكن يسبب الإجهاض المبكر، والولادة المبكرة، عشان كده المفروض الحوامل مايلمسوش القمامة، والأشخاص اللي اتعرضوا لأمراض زي فيروس نقص المناعة أو السرطان معرضين لمضاعفات أكتر من مرض المقوسات.

Comments: