سلسلة جيهان رسلان على "ذا جلوكال": (1) "ليه مش بنخس رغم الدايت؟"

13/11/2018

* الموضوع ده جزء من سلسلة مقالات بتكتبها الدكتورة جيهان رسلان لـ"ذا جلوكال" كل يوم أربع، عن طرق الدايت والتغذية السليمة

في ناس كتيرة بتشتكي من إنهم بيعملوا "دايت" وبيحرموا نفسهم من الأكل وملتزمين بنظام غذائي صارم، ومع ذلك مش عارفين يخسوا أو وزنهم ثابت أو حتى بيخسوا بس بمعدل بطيء جدا، المقال ده هيفيدهم جدا عشان يعرفوا يعملوا "دايت" صح من غير تضييع وقت ومجهود، ودي الأسباب اللي بتخلي الجسم مش عارف يخس رغم الدايت.

١- عدم شرب كمية مياه كافية للجسم

المياه مهمة جدا للوظائف الحيوية للجسم وبتساعد في نزول الوزن والإحساس بالشبع، وأضمن طريقة نعرف بيها إننا بشرب مياه كفاية هي مراقبة لون البول، كل ما يكون غامق معناه إنك لازم تركز في شرب مياه أكتر، ودي الـ urine color chart اللي بتوضح مدى احتياجك للشرب حسب لون البول.
 

٢- عدم الحصول على عدد ساعات كافية من النوم

الناس بتستهون بأهمية النوم مع إن كل حاجة عايز توصل لها بتحصل أثناء النوم، يعنى لو عايز تخس أو تعمل عضلات أو تجديد للخلايا فكل ده بيحصل وإنت نايم في وقت إفراز الـ Growth Hormone، حاول إنك تمنع شرب الحاجات اللي فيها كافيين قبل النوم على الأقل بخمس ساعات.

٣- الأكل الدايت مش دايت

إنك لما تلاقي حاجة مكتوب عليها كلمه "دايت/لايت" تقوم تاكل منها بأي كمية وتقول دي دايت يعني مش بتتخن، أكل الدايت أقل من الأكل العادي بحوالي ٢٠٪؜ بس فيه سعرات حرارية برضه، لازم نظبط الكميات حتى لو بناكل دايت.

٤- المشاكل الصحية

إنك تكون بتعاني من بعض الأمراض زي نقص هرمونات الغدة الدرقية أوالأنيميا أو تكيس المبايض أو نقص فيتامين "د"، أو بتاخد بعض الأدوية زي الكورتيزون أو مضادات الاكتئاب، الجسم صعب عليه يحارب جبهتين في وقت واحد بدون رعاية طبية متخصصة في الحالات دي، يبقى لازم نروح لطبيب متخصص نعالج الحالة الأول أو نعدل جرعة الأدويه أو نوعها و لما الحالة تتحسن اوتوماتك الجسم هيبدأ يخس بدون مشاكل صحية.

٥- عدد السعرات

إنك تقول "أنا ليا ١٢٠٠ سعر حراري أنا هاخد نصهم من الحلويات والسكريات أنا حر بقى طالما في حدود سعراتى"، طبعا غلط لأن فى نظام هرمونات بيتحكم في الجسم، زي الأنسولين (هرمون تخزين الدهون Anabolic) اللي هيُفرز بكثرة نتيجة نوع الأكل ده ومش هتخس Insulin Resistance، لازم السعرات تتوزع صح على العناصر الغذائية كلها من بروتينات وخضار ودهون صحية.

٦- الضحك على الجسم

تفويت الوجبات أو إنك تعمل دايت أقل من ٨٠٠ سعر حراري في اليوم Very Low Caloric Diet اعتقادا منك إنك كده هتخس أسرع، جسمك مش هتعرف تضحك عليه لأنه هيدخل في حالة مجاعة Starvation Mood، ودي معناها إنه هيقلل حرقه ومش هيخس طبعا، لازم تاخد السعرات الحرارية المحسوبة صح لاحتياج جسمك.

٧- الصيام الخاطئ

إنك تاكل وجبة واحدة كبيرة فقط في اليوم وباقي اليوم مقضيها مشروبات بسكر أو لبن أو نقنقة، دي أكتر حاجة تزود الوزن خلال الدايت مش بس تثبته، لأن كل مرة بتشرب حاجة بسكر أو تنقنق بيطلع هرمون الأنسولين اللي بيخزن دهون وخصوصا دهون الأحشاء (الكرش يعني) الحل هنا إنك تعمل "الصيام المتقطع" اللي هنتكلم عليه بالتفصيل في المقالات الجاية، يعنى تاكل خلال فترة زمنية قصيرة خلال اليوم وباقي اليوم صايم عن الأكل (داخل فيهم ساعات النوم) بتشرب مشروبات من غير سكر ولا لبن لأنه بيعلي الـGrowth Hormone.٨- عدم ممارسة أي نوع من أنواع الرياضة، الرياضة مهمة جدا خلال رحله نزول الوزن لأنها بتحافظ على الكتله العضلية، بتقلل ترهل الجلد والسيلوليت ومش لازم نروح چيم، ممكن بس نتمشى نص ساعة في اليوم، ممكن نعد خطواتنا على مدار اليوم (على الأقل 5 آلاف خطوة يوميا)، نرقص، نستخدم السلالم بدل الأسانسير مثلا، أي رياضة بسيطة لكن المهم نستمر عليها يوميا.

٩- وأخيرا، إنك تكون دخلت في فترة ثبات الوزن plateau اللي بتحصل طبيعي خلال رحلة نزول الوزن، ودى بقى هنتكلم عنها في مقال تاني بالتفصيل.

Comments: