٦ حاجات غير قانونية أغلبنا بنعملها كل يوم

12/11/2018

دايما المساءلة القانونية حاجة بنعملها ألف حساب، لكن مش كل الحاجات غير القانونية بتعرض الشخص اللي قام بيها لسجن وحبس أو غرامات حتى، لأن فيه حاجات كتيرة غير قانونية تقريبا كلنا بنعملها ومابناخدش بالنا منها، تعالى نقولك زي إيه:

1- الفرجة على المسلسلات والأفلام أونلاين:

مواقع كتير بتعرض مسلسلات وبرامج وأفلام أونلاين، بعد ميعاد عرضها في السينما أو التلفزيون بأوقات قليلة من نزولها أو حتى أثناء عرضها، وده اللي بيؤدي لإن منتجين الأفلام والمسلسلات دي تخسر فلوس كتير، والطبيعي إن المواد ليها حقوق ملكية فكونك بتتفرج عليهم فإنت بتشجع المواقع دي وبتاخد خدمة بلاش رغم إنها مفروض إنها بتتقدم بفلوس في أماكن تانية، لكن طبعا كلنا بنريح دماغنا وبنتفرج عادي.

2- داونلود صور ليها حقوق ملكية:

ساعات كتير المصممين بياخدوا صور من على جوجل عادي ويشتغلوا بيها، أو أي حد بيحمل صور عموما ويستخدمها في أي غرض فده شيء غير قانوني، إلا لو احتفظ بالـ "لوجو" اللي على الصورة عشان حقوق ملكية الصورة دي للمصور أو مصممها، وعلى الجانب الآخر فيه ناس بتشترك في مواقع ممكن تحمل من عليها الصور وتستخدمها وده بقى القانوني.

3- التنمر الإلكتروني:

زي إن حد يستخدم الإنترنت عشان يؤذي شخص تاني عن طريق الرسايل أو نشر معلومات أو صور بهدف إيذاء الشخص ده عن عمد، وممكن كمان بيشمل التحرش عن طريق الإنترنت.

4- تداول الألعاب أو البرامج الإلكترونية من غير شراءها:

فيه ناس كتير بتستخدم حيل عشان تعمل تحمل برامج وألعاب من غير ماتشتريها، أو بينقلوها عن طريق فلاشة أو هارد ديسك والحيل دي غير قانونية وبتعرض الشركات أو المبرمجين لخساير كتير وفي الأول والآخر بتعتبر سرقة، والقانون المصري بيعاقب عليها.

5- استخدام مقاطع اليوتيوب ليها حقوق ملكية:

فيه ناس بتعيد نشر مقاطع يوتيوب ليها حقوق ملكية يعني مملوكة لمؤسسات أو لأشخاص تانية، عشان تجمع أكبر عدد من المشاهدات والاشتراكات في القناة، لكن يوتيوب بيقفلها في الآخر.

6- التورنت:

هو عبارة عن طريقة من طرق تحميل الملفات، مابيعتمدش على خادم سيرفر معين زي طرق التحميل العادية، لكن بيتم التحميل من أجهزة كومبيوتر عادية فيها نفس الملفات اللي إنت بتحاول تحملها، وبيبقى محتاج الشخص اللي بيعمله يبقى عنده شوية خبرة وتمكن منه، ومن مشاكله إن بيعرض شركات إنتاج الأفلام لخساير كبيرة لإنه المصدر الأول لكل البرامج والأفلام المقرصنة قبل ما تكون موجودة على الإنترنت بالطرق العادية.


 

Comments: