أغرب 10 أكلات في العالم: من غير صور عشان مشاعركم

15/11/2018

ثقافة الأكل بتختلف من بلد للتانية وعلى أساسها ممكن يطلع الكشري والملوخية والبصارة والفتة أكل غريب ومقرف للأجانب اللي ثقافتهم في الأكل مختلفة، زي ما إحنا برضه كمصريين ممكن نشوف الأكل الأسيوي غريب ومانحبش ندوقه أصلا، للسبب ده جمعنا أكتر أكلات غريبة ومقرفة في كل الثقافات والبلاد، لكن ماقدرناش نحط صور للأكلات دي لأنها شكلها غير محبب إطلاقا.

1- شيراكو - اليابان:

شيراكو هي كلمة يابانية معناها "الأطفال البيض"، لكن معناها "الحيوانات المنوية" لسمك القد، أو السمك المنتفخ، أو السمك الصياد، وبيتقال إن طعمها شبه الكسترد.

2- عيون سمك التونة - اليابان:

عيون السمك بنعتبرها من الفضلات وبنرميها، لكن في اليابان بيجمعوا عيون سمك التونة، وبتتباع في السوبر ماركت عشان بتتعمل أكل، بيغلوها أو بيعملوها بالبخار وبعد كده بيحطوا عليها توابل وثوم وصويا صوص، وتقريبا هي مش حاجة غريبة أوي بيقولوا غن طعمها زي الحبار.

3- بلوت - الفليبين:

وهي عبارة عن بيضة مخصبة والجنين بيكون بدأ يتكون فيها، البيضة بتتغلى بعد كده بيقشروها وبتتاكل بالملح والفلفل والخل.

4- شوربة بيض النمل الأبيض - لاوس:

ده واحد من أغرب أنواع الشرب اللي موجودة في الدنيا، بيبقى عبارة عن ميكس بين بيض النمل والأجنة الجزئية من النمل وعدد قليل كمان من النمل الصغير عشان تضيف مرارة للطعم، لو معدتك قدرت تتعامل معاها فغالبا هتعجبك عشان شوية طعمها زي شوربة الجمبري.

5- جيلي مناخير الغزال الأمريكي - كندا

أكيد المناخير مش القطعية الصح خالص اللي حد يختار إنه يطبخها وياكلها، بس الطباخين في كندا قرروا إنهم يعملوا كده، بيغلوا قطعية المناخير وينضفوها من الشعر وبعدها يغلوها مرة كمان، وبعدين يقطعوها ويحطوا عليها مرقة ويتعمل زي جيلي، وأكيد زي ما هو واضح إنها أكلة سيئة ووحشة جدا.

6- هوتلاكوكا - المكسيك

وهي عبارة عن أكلة في المكسيك، من الذرة، بس الذرة اللي عفن، وغطاه اللون الأسود و الأزرق، بالنسبة لمعظم الناس الذرة دي المفروض تترمي بس للمكسيكين دي أكله لذيذة عشان بيعجبهم الطعم الترابي والخشبي.

7- آيرج - منغوليا:

عبارة عن بيرة معمولة من لبن الحصان، بياخدوا لبن الفرس ويسبوه يتخمر لحد ما يبقى مشروب كحلي، وبيتقدم في شكل غير عادي في طبق.

8- كاسو مارزو - إيطاليا:

وهو عبارة عن جبن فاسد، وبتتعمل من الجبن البيكورنيو، الجبنة دي بيبقى فيها ديدان زي الجبنة القديمة "المش" عندنا هنا كده، وممكن برضو تاكلها بالديدان أو من غير زي في مصر بالظبط.

9- موكتوك - غرينلاند:

وجبة من جلد الحوت المجمد، بيتقال إن الجلد له طعم البندق شوية، والدهون بتكون مطاطية، والطبقة الواقية بينهم بتبقى مطاطية أكتر، ولازم تبقى سنانك كويسة لو هتاكلها.

10- بيضة القرن - الصين:

هتاكل بيض بايظ؟، في الصين بيدفنوا البيض في ملح وطين ورماد لمدة شهور، وبيتحول صفار البيض وقتها للون أخضر داكن، وريحة وحشة.

Comments: