حاجات بنندم إننا عملناها بعد الساعة 12 بليل

14/11/2018

بعد الساعة 12 بليل فيه حاجات كده بنعملها ونرجع نندم عليها تاني يوم الصبح، منهم مكالمة الكراش، الأسئلة الوجودية وغيرهم وغيرهم، تعالوا نشوف إيه الحاجات اللي بنندم إننا عملناها بعد الساعة 12

1- لما نكلم الكراش ونفتح معاه كلام ونصحى تاني يوم الصبح نندم على اللى قولناه

2- ساعات بنقرر كدة إننا مش هنام بدري ونقعد شوية نفصل مع نفسنا، لا بنفصل ولا بتاع، مبيكونش على لساننا غير سؤال واحد بس كيف بدأ الخلق والقعدة دي لو طولت بتسأل نفسك "طيب أنا جاي هنا أعمل إيه؟"

3- تامر عاشور كان عنده حق لما قال "ذكريات كدابة والأشواق كدابة"، علشان القعدة دي بتقلب علينا كل اللي راح

4- بديهيات .. إنك تكون قاعد إنت والتلاجة والشيطان ثالثكم، علشان نفسنا بتتفتح على آخر الليل وننسى الدايت خالص ونرجع نندم

5- الاستقلال بيبقى حلو أوي بعد الساعة 12 بليل، فنبتدي نحط خطة للاستقلال وندور على شقة على النت ونتخيل شكل حياتنا هيكون إزاي، ونصحى تاني يوم الصبح ناخد من بابا فلوس عادي

6- بنحقق أحلامنا كلها وإحنا قاعدين في بيتنا بعد الساعة 12 بالليل، بنسافر ونلف الدنيا ونقابل شريك حياتنا ونعمل كل اللي نفسنا فيه وإحنا نايمين في السرير

7- النوت بوك اللي هنكتب فيها أي حاجة هتخطر على بالنا بعد الساعة 12 دي، هنصحى تاني يوم الصبح عندنا فصام لا عارفين مين اللى كتب الكلام ده ولا حتى مين اللى هيعمله!

8- خاصية "كيف تنكد على نفسك ذاتيًا" ده يا سيدي بيكون بأنك تفتكر كل اللي عدة وراح، تخيل حد غالي عندك هيموت، تتخيل إنت نفسك هتموت إزاي، وتفتكر كل قصص الحب الفاشلة اللي في حياتك

9- "أنا مش عارفني أنا تهت مني أنا مش أنا" ده جزء تاني غير الأسئلة الوجودية واللي بتسأل فيها إيه هي هواياتك وشخصيتك 

10- أنا لا استرونج إندبندنت وومن ولا نيلة، الست ملهاش غير بيت جوزها ودي أكتر فكرة بتيجي لكل بنت بتشتغل بعد الساعة ١٢ 

Comments: