٦ مميزات بتخلي الجواز التاني أحسن من الأول

15/11/2018


أي حد اتجوز مرة وانفصل بيقول إنه عمره ما هيعمل كده تاني، عشان بيخاف يكرر نفس الفكرة تاني أو يغلط نفس الغلط، بس الغلط مابيكونش في الفكرة "الجواز" نفسه، غالبا الغلط بيكون في اختيار شخص غير مناسب ليك، عشان كده اكتشفو إن الجواز التاني (بعد الطلاق/ الانفصال) بيبقى له مميزات أحسن من الجواز الأولاني زي:

1- إنت بتختار باختلاف:

واحدة من أهم مميزات الجواز التاني إنك بتختار شخص مختلف عن اللي اختارته قبل كده، لكن فيه ناس بتختار نفس اختيارها عادي جدا، بس عموما الطبيعي إن الناس بتبقى اتعلمت الدرس وهتختار حد بطريقة منطقية أكتر، آه هيكون فيه مشاعر عندك ناحيته بس هتحكم عقلك شوية برضه.

2- هتبقى عرفت نفسك أحسن:

واحدة من مميزات الجواز في المطلق إنه بيخليك شخص عارف نفسه وقادر تواجهها، هتبقى عارف قيمة نفسك وهتعرف إيه الحاجات اللي بتهمك، وده اللي هيخليك تعرف تتناقش مع شريكك أكتر وهيخلي جوازكم أقوى.

3- هتبقى أكتر تفاهم لمشاعرك:

من مميزات الانفصال هو إنه بيخلي الشخص يواجه مشاعره عن قرب أكتر، وبالنسبة للناس اللي مروا بتجربة الطلاق فهما بيقدروا يتعرفوا على مشاعرهم بسهولة أكتر لإنهم بيكونوا خلاص قضوا وقت كبير في الصراع الداخلي مع مشاعرهم أو مروا بالمشاعر دي قبل كده، وده شيء إيجابي جدا لجوازك التاني عشان بتقدر تتجاهل الحاجات الصغيرة اللي ممكن تضايقك وماتكبرهاش، وهتقدر تتعامل مع الحاجات الصغيرة دي بمرونة أكتر، وهتبقى متوقع المشاكل اللي ممكن تحصل لأنك فهمت نفسك وفهمت الجنس الآخر بشكل أكبر.

4- إنت وشريك حياتك هتقدروا بعض أكتر

بعد ما تمر بتجربة فاشلة مع حد وتنفصلوا وتتجوز تاني، هتبقى مبسوط جدا إنك لقيت شخص مناسب، وده هيعلمك حاجة مهمة جدا إنك تقدر الشخص اللي معاك لإن التفاصيل الصغيرة هتبقى ليها معنى كبير عندك وهو كمان هيقدرك بناء على معاملتك له، فتحسوا إن ياريتكوا كنتوا قابلتوا بعض من زمان.

5- مش هيكون فيه أي عوامل للصدمة:

في الجواز الأول هتبقى لسه بتتنقل من العيشة في بيت أهلك لإنك تعيش مع حد لأول مرة وهتكتشف إن الجواز مش شهر عسل طويل زي ما بيظهر في الأفلام والمسلسلات، مش هيكون فيه مجال للصدمة في الجواز التاني، إنت بالفعل خلاص اصطدمت بأرض الواقع مرة خلاص.

6- هتبقى أكتر نضج:

الشخص اللي اخترته في العشرينات هيكون غير الشخص اللي اختارته في الـ 25، غير اللي اختارته في الـ 30، وهتقدر تتعامل مع أي حاجة بشكل أنضج مما كنت بتتعامل معاه في سنك الأصغر.

Comments: