هل القضاء هيمنع غناء "هابي بيرث داي" في أعياد الميلاد؟

15/11/2018


في كل أعياد الميلاد الطبيعي والمعتاد، إن التورتة بتنزل والناس كلها بتبدأ تغني "هابي بيرثداي تو يو" وبعدها "يلا حالا بالا حيوا أبو الفصاد" مسلمات يعني ماينفعش نخالفها، بس فيه سؤال بقى تقريبا عمره ما خطر على بالنا هو مين بقى اللي ألف موسيقى وكلمات الأغاني دي، وبالذات أغنية "هابي بيرثداي تو يو" العالمية.

في الثمانينات اشترت شركة وارنر / تشابيل الأغنية بمبلغ 16 مليون جنيه إسترليني يعني 25 مليون دولار، عشان كده كان في الأفلام والمسلسلات قليل جدا لما حد بيغنيها لإن حقوق الملكية الفكرية بقت مملوكة لـ"وارنر / تشابيل، وبتخلي صناع الأفلام والمسلسلات يدفعوا فلوس لمؤلف الأغنية أو للشركة اللي اشترت الأغنية بمعنى أصح، ونفس القاعدة برضه المفروض بتتطبق على غنى الأغنية دي في المطاعم، على الرغم من إن ماحصلش أي محاولات توقف الناس من غنى الأغنية دي، ووفقا لدراسة استقصائية اتعملت على 2000 بريطاني فـ 48% من الناس انتهكوا حقوق ملكية الأغنية دي.

أصل الأغنية بيرجع لبداية القرن الـ 20، الأخوات باتي وميلدريد جيه هيل، كتبوا اللحن الأيقوني ده سنة 1901 والأغنية في الأصل كان اسمها "صباح الخير"، وحقوق ملكية اللحن انتهت سنة 1949، لكن بالنسبة للكلمات فالموضوع معقد ولافف شوية.

مؤخرا، أعلن قاضي محكمة اتحادية في لوس أنجلوس، إن أغنية "هابي بيرث داي" هي ملكية عامة، ومابتخضعش لحقوق النشر والطبع، والحكم ده وجه ضربة لشركة النشر الموسيقي "وارنر/ تشابيل"، اللي بتجمع فلوس كتير من الأغنية دي بقالها سنين، بس كده خلاص اتأكدنا إننا نقدر نغني "هابي بيرثداي" في أي وقت، لكن في شائعات بتقول إن "وارنر/ تشابيل" مش هتسكت وهيبقى في جولات قضائية تانية للاحتفاظ بملكية "هابي بيرث داي".

Comments: