رحلات مدرسية كلنا طلعناها في ابتدائي 

18/11/2018


فيه رحلات كده كلنا روحناها في ابتدائي فلازم تكون عديت على رحلة منهم.
أحلى حاجة في الرحلات دي بقى إنها كانت أيام البراءة، وأول الأماكن اللى كنا بنروحها وإحنا صغيرين من غير بابا أو ماما فكنا بنحس كدة أننا كبرنا خلاص ونقدر نعتمد على نفسنا.

- رحلة الأهرامات
رحلة الاهرامات التلاتة اللى كانت في ابتدائي، أولًا إحنا مبروحش هناك علشان نشوف أثار مصر ولا علشان نشوف اللى خدناه في درس الدراسات الاجتماعية ده، بنروج علشان نركب الحصان والجمل بس.

- السيرك القومي
كنا بنروحه علشان نشوف القرد، وفقرة الأسد والبلياتشو، والساحر اللي كان مجننا ومخوفنا في نفس الوقت

- مسرح العرائس
"ايه ده بقى الصوت ده جاي منين"  كان بالنسبة لنا العرايس اللى بترقص وتتكلم دي معجزة و ننبهر بها لحد ما عرفنا إن فيه بني آدم بيحركهم بس مستخبي.

- حديقة الحيوانات
رحلة المدرسة لحديقة الحيوانات دي كنا بنحبها علشان بنتفرج ونأكل الحيوانات ونتصور كمان جنبها، ده غير سندوتشات الهمبرجر والبانية اللى مكناش بنشوفها غير في الرحلات دي وبس

- القلعة
رحلة القلعة والسلطان حسن وكام حاجة كدة تانين دول كانوا رحلة واحدة بس بنطلعها تقريبًا كل سنة في ابتدائي

- السينما
مكنش  بيبقى فيه مدارس كتيرة بتودي رحلات للأطفال في السينما بس لو حصل بندخل أفلام كرتون أو أفلام أحمد حلمي

- الملاهي
دي كانت بتبقى من أحلى رحلات المدرسة، اللى كنا بنروح فيها ماجيك لاند أو وندر لاند وساعات جيرو لاند المهم حاجة فيها لاند

Comments: