٨ أفلام في مهرجان القاهرة السينمائي الدولي لازم تشوفهم

20/11/2018

مهرجان القاهرة السينمائي الدولي هيفتتح دورته الـ 40 يوم الثلاثاء 20/11، و فاعليات المهرجان والعروض هتبدأ من يوم الأربعاء الصبح، دورة مهرجان القاهرة السينمائي الأربعين ناس كتير مستنينها بقالهم فترة، خصوصاً بعد تغيير إدارة المهرجان وإن رئيس المهرجان بقى المنتج والسيناريست "محمد حفظي"، وهو يعتبر أصغر رئيس للمهرجان. هيتعرض في الدورة الأربعين تقريبا 150 فيلم، هنرشحلك منهم 8 أفلام لازم تشوفهم:

1- ليل/ خارجي Ex. night :

هو الفيلم المصري الوحيد في المسابقة السنة دي، إخراج أحمد عبد الله السيد مخرج فيلم "ديكور".

ملخص الفيلم: بتدور أحداث الفيلم عن 3 أفراد بيتجمعوا في ليلة مش عادية وبيكسروا فيها كل المعايير الإجتماعية، وده اللي بيدفعهم لخوض معارك خاصة بيهم واللي بتقودهم لرحلات ماكانوش يتخيلوها في المدينة اللي هم عايشين فيها، وبُتظهر في شخصياتهم جوانب غير متوقعة.
 

2- ليلة الاثنى عشر A twelve year night :

الفيلم مستوحى من قصة حقيقية في فترة الحكم الديكتاتورية والعسكرية لأوروجواي، واللي استمرت 12 سنة، بداية من سنة 1973، وأول مشاركة للفيلم كان في مهرجان "آفاق" واترشح لـ 3 جوايز.

ملخص الفيلم: سنة 1973، أوروجواي كانت تحت الحكم العسكري الديكتاتوري، وفي ليلة تم إطلاق سراح أسرى سجن توبامارو بليل عشان مهمة عسكرية، وبيفضل 3 رجال بس في الحبس الانفرادي لمدة 12 سنة،  من بينهم "بيبي موخيكا" اللي هيبقى رئيس لأوروجواي بعد كده.
 

3- البرج The tower:

بيحكي الفيلم عن عيلة فلسطينية، مقيمة بمخيم لأجئين في لبنان، وبتدور أحداث الفيلم عن جد وحفيدته، وفيها حكايات كتير عن الأرض والوطن والبيت القديم في فلسطين وحلم العودة.

ملخص الفيلم: بتدور أحداث الفيلم عن مدينة بيروت في لبنان، والطفلة الفلسطينية "وردي" اللي عندها 11 سنة وعايشة مع عيلتها في مخيم اللاجئين، وجدها "سيدي" كان من أول اللاجئين اللي عاشوا في المخيم بعد طرده من بيته سنة 1948، في اليوم اللي هيديها جدها مفتاح بيتهم في فلسطين بتخاف إنه يكون فقد الأمل في الرجوع فبتحاول ترجعله الأمل عن طريق إنها تجمع شهادات من عائلات تانية في المخيم.
 

4- بلاكككنسمان Blackkkansman:

أحدث أفلام المخرج السينمائي سبايك لي اللي تاريخ أفلامه بيمتد لـ 30 سنة، واللي اترشح لجايزة الأوسكار مرتين وخد فعلا جايزة الأوسكار الشرفية عن إنجازاته في السينما.

ملخص الفيلم: الفيلم بتدور أحداثه عن"رون ستولورث" أول محقق أمريكي من أصول أفريقية في فترة السبعينات، كان مصمم يعمل اسم لنفسه فبدأ في مهمة خطيرة وهي التسلل في جماعة "كوكلوكس كلان" العنصرية ضد الملونين، وضم زميله للتحقيق السري عشان يشكلوا فريق لتفكيك الجماعة المتطرفة.
 

5- روما Roma :

الفيلم فاز بجايزة الأسد الذهبي لمهرجان فينيسيا السنيمائي الدولي السنة دي، الفيلم هيتعرض بتقنية ال 4K، إخراج "ألفونسو كوران"، وهو أول مخرج مكسيكي يفوز بجايزة الأوسكار عن فيلمه "جاذبية"، وفاز عن نفس الفيلم بجايزة الجولدن جلوب.

ملخص الفيلم: بتدور أحداث الفيلم عن "كليو" بنت من سكان المكسيك الأصليين،  واللي بتشتغل خادمة، وصاحبتها "أديلا" المكسيكية برضه وبتشتغل معاها، بيشتغلوا عند عيلة من طبقة متوسطة في حي روما، و"صوفيا" أم لأربع أطفال عاشت حياتها بعد غياب جوزها، بتواجه بعد كده "كليو" أخبار مدمرة بتخليها ماتقدرش تكمل رعاية أطفال صوفيا اللي بقت تحبهم كأنهم ولادها، وبتحاول تبني إحساس جديد بالحب والتضامن في سياق اجتماعي، وبتتصارع "كليو" و"صوفيا" بهدوء مع التغيرات اللي بتحصل في بلد فيها مواجهات بين ميليشيا بتدعمها الحكومة و بين متظاهرين من الطلاب.
 

6- فَرَاشَة papillon :

الفيلم إخراج  المخرج الدنماركي مايكل نوير، وبطولة تشارلي هونام والنجم المصري رامي مالك، الفيلم يعتبر إعادة تقديم للفيلم اللي بيحمل نفس الأسم اللي تم إنتاجه سنة 1973 وكان بطولة إيقونة السينما الأمريكية ستيف ماكوين، والممثل داستن هوفمان، وتجربة رامي مالك في الفيلم ده تجربة شائكة لإن بيتم مقارنة بـ داستن هوفمان لإنه بيعمل دوره في النسخة الجديدة.

ملخص الفيلم: "هنري" بيتنفي في مستعمرة نائية بسبب جرايم القتل اللي مارتكبهاش أصلا، وهناك بيتعرف على "ديجاس" البائس، وبيشكلوا رابط قوي جدا، بس بيتم إختبار الرابط ده وهما بيخططوا لهروبهم.

7- لا أحد هناك The Giraffe:

الفيلم أول تجربة إخراجية للممثل الشاب أحمد مجدي، والفيلم خد سنين عشان يتعمل، وكان المفروض هيتعرض في مهرجان دبي السينمائي خصوصا بعد ما خد جايزة منحة المهرجان التمويلية، لكن بعد إلغاء المهرجان هيتعرض في مهرجان القاهرة.

ملخص الفيلم: بتدور أحداث الفيلم إن أحمد بيلاقي نفسه تايه في المدينة بالليل من غير إيمان، وبعد كده بيبقى في موقف إنه المفروض يساعد بنت في عملية إجهاض، وعشان يجيب المبلغ المطلوب بيتورط مع مجموعة بيتقودهم بنت تانية بتبقى عايزة تعرف إيه سر الزرافة المستخبية في جنينة الحيوانات!
 

8- شفقة Pity :

من أكتر الأفلام المتميزة  اللي هيتم عرضها في المهرجان على مستوى الإخراج والتمثيل والسيناريو المبتكر، في الأول ممكن تحس الفيلم تقيل وهتفتكر إنك فهمت الفيلم خلاص، لكن بعد كده هيحصل "بلوت تويست" هيخلي للفيلم طبع مختلف وأحلى.

ملخص الفيلم: بتدور أحداث الفيلم عن راجل مابيحسش بالسعادة إلا لو كان تعيس، راجل أدمن الحزن وطول الوقت عنده احتياج للشفقة، ومستعد يعمل أي حاجة عشان اللي حواليه يشفقوا عليه، هي حياة زوج بيشوف إن العالم مش قاسي بالدرجة اللي تكفيه.

Comments: