سلسلة جيهان رسلان على "ذا جلوكال": (2) إزاي نتجاوز ثبات الوزن أثناء الدايت؟

21/11/2018

* الموضوع ده جزء من سلسلة مقالات بتكتبها الدكتورة جيهان رسلان لـ"ذا جلوكال" كل يوم أربع، عن طرق الدايت والتغذية السليمة

قبل ما نقول إزاى نقدر نحل مشكلة ثبات الوزن تعالوا نعرف الأول يعنى إيه بلاتوه؟

معنى البلاتوه هو إن الوزن يثبت تماما لمدة أسبوعين أو تلاته رغم إننا عاملين كل اللي علينا مظبوط من حيث الدايت والرياضة، ولازم نعرف إن ده سيناريو طبيعي جدا إنه يحصل خلال رحلة نزول الوزن لأن جسمنا متأقلم بطبعه وذكي كمان.

ولازم نعرف برضه إن الرقم اللي بتخسه كل أسبوع ده مش حساب في البنك بتسحب منه زي ما إنت عايز، يعنى عادي جدا إنك كنت بتخس ٢ كيلو في الأسبوع وعادى برضه تلاقي نفسك مش عارف تخس غير ٢٠٠ جرام بس في أسبوع تاني، بس ماتقولش على الـ ٢٠٠ جرام دول ثبات وزن.

تعالوا نعرف إزا ممكن نحل مشكلة البلاتوه:

أولا:

لازم نغير روتين الدايت من حيث الكم والكيف وتوزيع الوجبات، يعني مثلا، اللي مش بيفطر يبدأ يفطر ولو مش بتاخد وجبات خفيفة ابدأ خد وجبات خفيفة، ولو بتاخد وجبات خفيفة فعلا، راجعها كويس علشان ممكن تكون فيها نشويات أو فاكهة كتير.

ثانيا:

بعد ما نظبط عدد السعرات الحرارية اللي المفروض تاخدها لازم برضه نراجع مصادرها، يعنى مثلا نقلل السعرات اللي بتيجى من النشويات الكتيرة أو الفاكهة وتاخدها أفضل من البروتينات والخضار والدهون الصحية.

ثالثا:

اللحوم المصنعة / الأغذية المحفوظة/ الملح الزيادة/ الزيوت المهدرجة/ استهلاك كمية عالية من السكر الدايت، دول من الحاجات اللي فعلا ممكن تثبت الوزن، ياريت نحاول نقللها والأفضل نمنعها تماما.

رابعا:

الرياضة، لو مش بتلعب رياضة لازم تلعب رياضة، ولو بتلعب رياضة يبقى لازم تغير روتين الرياضة من حيث عدد أيّام التمرين ونوعها سواء كارديو ولا مقاومة/ حديد، وهنا لازم ألفت نظركم لحاجة مهمة جدا، في ثبات في الوزن بيحصل على الميزان مع الناس اللي بتمارس رياضة، لأنهم بيفقدوا دهون ويزودوا عضلات، عشان كده ده ثبات مش حقيقي والجسم بينزل فعلا، لكن في مرحلة البلاتوه الثبات بيحصل في الوزن ومقاسات الهدوم كمان، يعني مفيش أي نزول في الوزن.

خامسا:

اليوم الفري، لو مش بتاخد يوم فري، ابدأ اعمل كده، ولو بتاخد اليوم ده فعلا ابدأ غير في مدة الفري يعني لو كنت بتاخد وجبة خد يوم كامل ولو يوم كامل خد وجبة فقط وبعد كده ارجع على دايت مظبوط جدا.

سادسا:

الصيام المتقطع، ودي من الحاجات العظيمة اللي ممكن تكسر ثبات الوزن وبتنزل جدا في المقاسات، ياريت لو تبدأ تعمل صيام متقطع علشان ترجع تاني تخس (وده هنتكلم عنه بالتفصيل في مقالات لاحقة)

سابعا:

لازم نراجع حاجتين فى غاية الأهمية وناس كتير بتنساهم، هما شرب المياه الكافية للجسم والنوم الجيد بالليل، لو حاجة من دول مش بتعملها أبدأ اعملها واستمر عليها علشان يرجع جسمك يخس.

ثامنا:

لازم نستشير الطبيب المتخصص في الحالات دي، سواء للعلاج أو لتغيير خطة العلاج (نقص فيتامين د/ الأنيميا / تكيس المبايض/ أدوية الاكتئاب/ حبوب منع الحمل)، لأن الحالات دى ممكن جدا تعمل مشكلة ثبات الوزن كذا مرة خلال رحلة نزول الوزن

تاسعا:

إننا نحاول نقلل التوتر stress لأنه من الحاجات اللي بتعمل ثبات الوزن، يعنى نحاول نعمل رياضة.. يوجا.. نتأمل.. نحمد ربنا على نعمه، ونعرف إننا بنعمل دايت علشان إحنا بنحب جسمنا مش بنكرهه

وأخيرا.. نصيحة: بلاش تخلوا حاجه طبيعية جدا زي مرحلة البلاتوه بتحصل خلال الدايت إنها تحبطكم وتسيبوا الدايت، وافتكروا "اللي بينجح هو اللي بيستمر"، كملوا اللي بدأتوه وربنا يقوينا جميعا.

سلسلة جيهان رسلان على "ذا جلوكال": (1) "ليه مش بنخس رغم الدايت؟"

Comments: