غير الهدوم.. 5 حاجات محتاجين خصومات عليها في "البلاك فرايداي"

22/11/2018

الجمعة السودا أو زي ما بيتقال عليها في مصر والدول العربية "الجمعة البيضا" هو يوم أو حدث ممكن يوصل لأسبوع، بيبقى فيه خصومات وتخفيضات أسعار على كل المنتجات، زي الأجهزة مثلا مش اللبس والهدوم بس اللي بيكون عليهم خصومات.

المهم إن أصل حكاية اليوم ده إيه بقى؟ اليوم ده بيرجع تسميته للقرن الـ 19 لسنة 1869 في أمريكا بعد ما حصلت أزمة اقتصادية وحركة البيع والشراء وقفت والبضاعة كانت بتبوظ عند التجار، فعملوا يوم الجمعة السودا ده عشان يعملوا تخفيضات ويبيعوا البضاعة دي ويقللوا الخساير على قدر المستطاع، ومن وقتها بقت عادة عند الأمريكان، المهم إنها اتسمت بالسودا بسبب الزحمة الكبيرة والفوضى اللي بتكون في البلد يومها.

على جانب آخر مختلف، إحنا كمصريين المفروض يبقى عندنا برضه خصومات وتخفيضات على حاجات تانية غير المنتجات والسلع، وأظن إن احتياجاتنا للتخفيضات دي أكبر بكتير:

1- الألم والوجع: محتاجين الألم والوجع والدموع والشحتفة يختفوا من حياتنا شوية، محتاجين ننزل عليهم خصومات ونبيعهم، عشان عندنا بكميات كبيرة وعايزين نتخلص منهم.

2- الطموحات والأحلام: من كتر الوقوع من فوق الـ "هاي إكسبكتيشنز" طموحاتنا بقت تحت الأرض وبقت غالية في تنفيذها وتحقيقها، محتاجين شوية خصومات على الطموحات عشان نعرف نعيش.

3- السلام الداخلي: الصراعات الداخلية اللي بتقوم علينا بعد الساعة 12 بليل، بتخلى السلام النفسي أوي، محتاجين حد يعملنا خصومات عليه عشان نسكت بيه الصراعات الداخلية شوية.

4- "السيلف ستيم": دي ممكن تبقى عملية مقايدة لطيفة، حد ياخد الـ"Low self- esteem" ويدينا بداله واحد "هاي" نحل بيه شوية مشاكل من اللي بنقابلها.

5- "الإنكزايتي والأوفر ثينكينج": نفس معاملة الألم والوجع برضو عايزين نخصمهم من دماغنا خالص.

ملحوظة: الكلام ده Cheesy أوي وإحنا بنهزر، إحنا محتاجين شوية تخفيضات على الهدوم عشان الشتوي غالي أوي وإحنا في آخر الشهر

Comments: