طبيبة نفسية توضح: لو حد بيفكر في الانتحار تعمل معاه إيه؟

22/11/2018

 الأطباء النفسيين بيخضعوا  للإشراف الطبي الدوري كل فترة وده الحقيقة راجع لسببين أولهم علشان كم الحالات والأمراض النفسية اللى بيقابلوها بطبيعة شغلهم، والسبب التاني علشان تجنب لوم المرضى في حالة إصابة الدكتور بمرض نفسي، وعشان كده الدكتور بيكون واخد استعدادته وعارف يتحكم في تعرضه لأي عدوى نفسية إزاي، ده غير إن سنة 2030 هيبقى الاكتئاب تالت أخطر الأمراض اللي بتصيب البشر في العالم.

لكن على الرغم من الكشف الطبي الدوري اللي بيحصل ده، إلا إنه حصلت حادثة لطبيب نفسي بسبب تعرضه لمرض الاكتئاب واللي انتهت بالانتحار.

ومن النقطة دي كان لازم نتواصل مع طبيب نفسي يقولنا إزاي نتعامل مع حالات الانتحار، أو بمعنى أوضح إزاي نتعامل مع شخص عنده رغبة في الانتحار.. فكلمنا دكتور أسماء عبدالوهاب، استشاري الطب النفسي، وعضو المجلس الأعلى للصحة النفسية.

هم 12 نقطة هنقولك فيهم الحاجات اللى محتاج تعرفها عن التعامل مع شخص راغب في الانتحار

1- اسمع لشكوى الشخص لأن شكوته دي الحاجة الوحيدة التي مانعاه عن الانتحار، و إن فيه شخص بيقدر يسمعه

2- مساعدته على التعبير عن مشاعره لأن حالة الاكتئاب غالبًا بتجيله بسبب كتم مشاعر الغضب والحزن

3- ماينفعش نقول له إن الانتحار حرام أو عيب أو مايصحش  لإن دي طريقة سلبية في التعامل مع الموضوع

4- في حالة تكرار الشكوى أكتر من مرة، لازم برضه نسمع بهدوء واهتمام

5- منحاولش نضحكه أو نخليه يقضي وقت لطيف  بالضحك لأن ده بيكون سخيف جدًا عليه

6- لازم التعرف المبكر على الحالة، علشان نقدر نلحقه من الأول قبل ما يحصله أي ضرر

7- مود العزلة والبعد عن الناس والحزن وإن بقى شخص مش طايق نفسه ولا أي حواليه ده مؤشر الاكتئاب، واللي بيكون مؤشر للانتحار برضه، فلازم نتعرف على الحالة دي وناخد بالنا من الأول

8- المشاعر معدية علشان كده ممكن يكون قرار الشخص بالانتحار نابع من إنه بيقعد مع ناس عندها اكتئاب بس، لكن هو معندهوش رغبة حقيقة في الانتحار أو مشكلة في حياته أو مش بيمر بمرحلة اكتئاب فعلًا

9- لو الشخص عنده رغبة أكيدة في الانتحار لازم توديه لطبيب نفسي، وهنا طبيب نفسي مش معالج بالطاقة أو life coach، ولازم الموضوع يبقى بالإقناع، وإنه معرض لتكرار المرض.

10- نبلغ أهله إنه عنده رغبة في الانتحار، أو إنه بيمر بمشكلة حقيقة في حياته وهو محتاج ليهم، ونقولهم إيه الفرق بين شوية الزعل وإنه بيفكر في الانتحار !

11- نبعد عن التنظير أو توجيه النصيحة ليه

12- الأمراض دي زيها زي أي مرض تاني بتحتاج علاج، يعني مبسطتش المرض ولا أحاول إني أكبر الموضوع وأضخمه

 

Comments: