طبيب نفسي يوضح أنواع الرجالة اللي بيمارسوا العنف على المرأة وطريقة التعامل معاهم

25/11/2018

"العنف تجاه المرأة"، بعد حملات توعية كتير انتشرت في كل مكان في العالم، الجملة دي بقت أساسية ومهمة في حياة البنات والستات لأن العنف تجاه المرأة مابيكونش بالضرب بس، العنف أنواع زي العنف اللفظي (لإهانة والشتيمة في أي مكان في الشارع أو في الشغل)، وعنف جسدي زي الضرب، والعنف الجنسي زي الاعتداء الجنسي على المرأة وإجبارها على أي أفعال جنسية من غير رغبتها في ده، العنف أشكال وأنواع كتير بيمارسها الراجل ضد المرأة سواء كان الراجل ده زوج أو أخ أو أب أو أي راجل له سلطة بشكل ما على الست، العنف ضد المرأة له آثار سلبية كبيرة على المرأة، منها الاجتماعي والصحي والنفسيي، وعشان كده اتعمل يوم عالمي مخصوص للتوعية ضد العنف تجاه المرأة وهو يوم 25 نوفمبر.

بمناسبة اليوم العالمي للمرأة حبينا نقولكوا إيه هي الأبعاد النفسية للشخصية اللي ممكن تمارس العنف تجاه المرأة، وفقا للكلام اللي قاله الدكتور جمال فرويز أستاذ الطب النفسي في جامعة القاهرة، دكتور جمال افتتح كلامه عن الأسباب بإن تعاطي المخدرات هو السبب الرئيسي، عشان الزوج أو الراجل عموما يعتدي لفظيا أو جسديا على المرأة أو على الأطفال كمان حتى لو أولاده، لكن خلينا نبدأ بالشخصية، إيه هى مواصفات الشخصية اللي ممكن تعتدي على المرأة؟

1- الشخصية الشكوكية أو "paranoid personality": وهي الشخصية اللي عندها ثقة عالية في ذاتها، وإحساس دائم إنها على حق، وإن أي حد تاني على خطأ، وبالتالى دايما بيدافع عن فكرة أو عن وجهة نظرة قدام الطرف الأخر سواء بالاعتداء البدني أو اللفظي.

2- الشخصية الدورية: فيه منها جزء متعلق بالأعصاب وهو تحت الضغط النفسي الاكتئابي، ممكن ينفعل على المرأة سواء جسديا أو لفظيا.

3- الشخصية الانفجارية: وهي الشخصية سريعة الغضب على الطرف الآخر اللي معاها سواء لفظيا أو جسديا بسرعة، وبيعتذروا بسرعة شديدة، وبيتكرر منه نفس الأخطاء، وهي الشخصية اللي موجودة أكتر، وده الوحيد اللي ممكن يتغير لو تم عقابه عقاب شديد، لأنه بيراجع نفسه  بعد كده بيفكر 100 مرة قبل ما يعتدي على الطرف الأخر.

4- الشخصية السادية: وهو دايما بيتميز بالعنف الجسدي أو اللفظي مع شريكه أو حتى مع كل الناس، أي حد بيقابله بقي سواء كان راجل أو مرأة، فهو بيتعامل دايما بغلظة سواء جسدية أو لفظية.

دكتور جمال قالنا إن لازم الست عموما تعرف إنها لو قبلت ده مرة تعرف إنها هتقبل ده طول عمرها لإن المعيار الرئيسي هو أول مرة، وإن حالات كتير بتحصل في ليلة الدخلة لإن الراجل وقت ما بيكون هيمارس العملية الجنسية بيكون متعصب أو متوتر شوية، فيطلع الشخصية الحقيقة بتاعته، ومن هنا بيبدأ يعتدي على الست بالضرب أو بالألفاظ الخارجة، ساعتها الست لو مالمتش هدومها وراحت على بيت أهلها تعرف إن ده هيتكرر مدى الحياة.

ولما سألناه عن الطرق اللي المفروض تتعامل بيها الست مع شريكها اللي بيمارس العنف عليها قالنا إن فيه شخصية اسمها الشخصية المازوخية وهي الشخصية اللي بتتلذذ بالعنف، بتتبسط لما تلاقي شريكها بيضربها، زي الشخصيات اللي ممكن يبقى جوزها بيضربها وبتقول "جوزي وماحدش يتدخل بينا"، وغالبا هي بتبقي بتعمل كده عشان بليل هو بيمارس معاها الجنس وفي الأخر بتقول إنه جوزها وله حق عليها إنه يضربها ويهينها، وغالبا نوع الشخصيات دي بيكون منتشر في الطبقات الأكتر فقراً، فهو موجود بشكل أقل في الطبقات المتوسطة والعليا.

ومن النصايح اللي حب دكتور جمال يقدمها للست إنها تقبل الاعتذار لكن ماتقبلش التكرار، لكن فيه حالات لما بيكون العنف فيها من الأب أو الأخ أو كمان من الزوج الحلول بتكون طبقا للظروف الحياتية، لإن فيه ساعات ستات مابيكونش عندها بديل، عشان كده الحلول لمواجهة العنف ضد المرأة ماينفعش تكون ثابتة، بس بيكون فيه أطروحات ممكن يلجأوا ليها وعلى حسب الأهل يعني هل هما متعاونين أو غير متعاونين، هل هما إيجابيين وسلبيين.

Comments: