صور: تطور الجسم المثالي للمرأة من بداية القرن الـ 20 لحد دلوقتي

26/11/2018

هوس الجسم المثالي خلى البنات تبقى في حالة مقارنة مستمرة مع "الموديلز" بدل ما يحبوا جسمهم ويتصالحوا معاه، وده اللي خلاهم يلجأوا للدايت والأدوية أو غيرهم عشان يفضل جسمهم مظبوط، بين القرن الـ 20 والـ 21 فكرة جسم الست المثالي للستات اتغيرت كذا مرة مع اختلاف اتجاهات الموضة.

موقع Science people قال إن فكرة الجسم المثالي للست اتطورت على مر السنين بالترتيب ده:

1- في الفترة بين 1400 لـ 1700م:

اتعرفت مقاييس جمال البنت في الفترة دي إنها تبقى ببطن مدورة والفخدين مكتملين وجلدها ناعم ومنطقة الصدر كبيرة، وكان في العصر ده من أهم مواصفات الجمال إن البنت يكون شعرها خفيف، وبشرتها فاتحة.

2- في الفترة بين 1837 لـ 1901:

في الفترة اتعرفت إن الست تبقى جميلة لما يكون فيها المواصفات دي: يستحسن تبقى مليانة، يكون عندها وسط، وفي الفترة دي الستات كانوا بيتعمدوا يلبسوا "كورسيهات" أو ملابس داخلية ضيقة عشان يبان إن عندهم وسط أو إنهم شبه الساعة الرملية أكتر.

3- في الفترة من 1920 لـ 1930:

من مواصفات جمال الست في الفترة دي هي إن تبقى منطقة الصدر صغيرة، وسطها صغير، والشعر بيكون قصير، وشكلها يكون صغير في السن، في الفترة دي كان مظهر الستات أنثوي جدا، فكانت الستات بتلبس حمالات الصدر اللي بتبينهم بصدر مسطح، وكانوا بيلبسوا هدوم تخليهم مش "كيرفي".

4- في الفترة بين 1930 لـ 1950:

اتعرفت الست الجميلة أو المثالية في الجمال في الفترة دي بإنها تكون "كيرفي"، جسمها شبه الساعة الرملية، وسط نحيف ومنطقة صدر كبيرة، معنى كده إن رجع الإهتمام تاني يكون لشكل الجسم اللي شبه الساعة الرملية تاني وكان وقتها الجسم المثالي لكل الستات هو جسم "مارلين مونرو".

5- الفترة من 1960:

الست اللي جسمها مثالي في الفترة دي مواصفاته كانت إنه يبقى ممشوق القوام، رفيع جدا، رجلها رفيعة، أشبه بجسم المراهقين، وكان واضح إن الحب والسلام والنحافة هما شعار الجمال المثالي للست في الستينيات، ومصطلح “Swinging London" هو كان مصطلح لوصف الموضة المنتشرة في لندن في الستينيات، والموضة دي اللي أثرت على لبس وأسلوب الستات في أمريكا في نفس الفترة.

6- فترة 1980:

في الوقت ده بدأت موصفات الجسم المثالي تتغير شوية وتبقي الجسم الرياضي، ممشوق لكن "كيرفي" في نفس الوقت، فيه تناغم بين الدراعين، في الفترة دي الناس بدأ يبقى فيه ظاهرة الهوس بالرياضة، فيديوهات التمارين والرياضة للستات بدأت تعملهم هوس بالجسم المثالي والرياضة وتأثيرها على الجسم المثالي، وده كان بيشجع الست على إنها تخس، وفي نفس الفترة بدأ يظهر طفرة فقدان الشهية واللي بيعتقد الناس إنه بسبب الهوس بالرياضة والنحافة وقتها.

7- فترة 1990:

مواصفات الجسم المثالي والجمال للست في الفترة دي كانت إن البنت تبقى شاحبة ورفيعة جدا وشبه الشخص اللي من غير مأوى أو المدمن، الست اللي كانت بتمثل الجسم المثالي للفترة دي هى  Kate Moss

8- فترة الـ 2000

من مواصفات جمال فترة الألفينات اللي كلنا بنعيشها دلوقتي والمفروض إن أغلب البنات بتحاول توصل للجسم المثالي ده هي، البطن "الفلات"، تكون رفيعة بس بطريقة صحية، وإن منطقة الصدر تكون كبيرة، وفجوة بين الفخدين، من أهم الممثلين لجسم المرأة المثالي لفترة الألفينات هي كيم كارديشيان، لكن للأسف بدأت بنات وستات كتير تعمل عمليات جراحية وتجملية عشان توصل للجسم ده.

Comments: