كل المعلومات المتاحة عن الفياجرا النسائية: تؤثر على الدماغ وتعالج ضعف الرغبة

26/11/2018

المتعارف عليه إن كلمة "فياجرا" معناها حبوب لزيادة الرغبة أو القدرة الجنسية عند الرجالة، لحد ما ظهرت الفياجرا النسائية، وهي دوا لعلاج ضعف الرغبة الجنسية عند الستات، ظهرت في الأول في دول كتيرة في العالم وكان بيتم تداولها عن طريق الإنترنت مش عن طريق الصيدليات، بس مؤخرا واحدة من شركات الأدوية عملت مؤتمر صحفي عشان تعلن عن موافقة وزارة الصحة والسكان على إطلاق أول دوا لعلاج الضعف الجنسي عند النساء.

الفرق بين "الفياجرا" الرجالية ونظيرتها النسائية هى إن النوع الأول اتصنع في الأساس للرجالة اللي بيعانوا مع الضعف الجنسي، وبيبقوا عايزين يحسنوا حياتهم الجنسية مع شريكة حياتهم يعني عندهم الرغبة لكن القدرة فيها مشاكل، لكن الفياجرا النسائية اتصنعت للستات اللي الرغبة نفسها بتبقى غايبة عندهم، خصوصا إن دراسات كتير أثبتت انخفاض معدل الرغبة الجنسية عند السيدات.

وعموما، العجز الجنسي عند السيدات بيتمثل في عدم وجود رغبة جنسية أو عدم الوصول للنشوة الجنسية، عشان كده اتصنعت الفياجرا النسائية أو الحبة الوردية عشان تحقق التوازن بين المواد الكيميائية المرتبطة بالرغبة الجنسية في الدماغ.

وعشان كده، الفياجرا النسائية بتؤثر على عقل الست وبتساعد على إفراز هرمون الدوبامين والسيروتونين، عشان تخليهمم أكثر سعادة بالعملية الجنسية وأكثر تقبلا ليها، وده بيفسر إنه بيتم تناولها بجرعات محددة ممكن تستمر لأيام، بعكس فياجرا الرجالة اللي بتتاخد قبل ممارسة الجنس بساعة واحدة، عشان بتؤثر بشكل مباشر على الأعضاء التناسلية.

الفياجرا النسائية بدأت كعلاج للاكتئاب، لكن مع الأبحاث، اكتشفوا إنها فعالة في علاج ضعف الرغبة الجنسية عند النساء، عشان كده أقرتها  إدارة الغذاء والدواء الأمريكية (FDA) ووافقت عليها.

من الآثار الجانبية للحبة الوردية، إنها ممكن تسبب اضطرابات في المعدة أو احتقان في الأنف أو صداع في الرأس، وممكن العين تبقى حساسة أكتر، وممكن كمان بعض الأعراض زي زيادة التعرق، والرؤية غير الطبيعية، والقلق وزيادة العطش.


 

Comments: