سلسلة جيهان رسلان: اعرف المشروبات المسموح بيها في دايت الصيام المتقطع

27/11/2018


* الموضوع ده جزء من سلسلة مقالات بتكتبها الدكتورة جيهان رسلان لـ"ذا جلوكال" كل يوم أربع، عن طرق الدايت والتغذية السليمة

سؤال مهم بيجيلي كتير من الناس اللي بتتابع معايا فى العيادة، "هو إيه المشروبات المسموحة في فترة الصيام المتقطع؟

ولأهمية السؤال ده حبيت اشاركم الإجابة، وعلشان نستفيد من الإجابة كلنا لازم الأول أقول لكم كلمتين عن الصيام المتقطع.

فكره الصيام المتقطع ببساطة هي إننا بناكل كل اللي إحنا عايزينه في فترة محددة من اليوم (window of eating) طالما بقية اليوم مش بناكل حاجه خالص، لكن الحلو في الموضوع إننا نقدر نشرب في فترة الصيام حاجات كتيرة.

والمشروبات اللي تنفع في فترة الصيام، لازم تكون بدون سعرات حرارية ولا أي عناصر غذائية (No calories No nutrients) زى طبعا المياه، الشاي، القهوة، القهوه سريعة الذوبان، شاي أخضر، نعناع، ينسون، لكن ممنوع إضافة سكر أو لبن حتى حتى لو كان خالي الدسم لأن اللبن فيه سعرات حرارية وكمان ده وجبة كاملة!.

لكن ممكن نضيف سكر دايت (خالي من مادة الأسبرتام)، للمشروبات لكن كمية قليلة جدا ولو عايزين جسمنا يشتغل في أفضل حالاته خلال فترة الصيام أنصحكم إضافه ليمون للمياه (عصر نص ليمونة على المياه) أو خل تفاح (ملعقة صغيرة) أو ملح بحر (مش الملح العادي بتاعتنا) علشان نعوض الأملاح اللي الجسم بيفقدها خلال الصيام.

أنا جمعت لكم المشروبات في صوره علشان تخلوها على الموبايل علشان تساعدكم تقرروا لما تحبوا تشربوا في فترة الصيام،

و للحديث عن الصيام المتقطع بقية في المقالات الجاية.

Comments: