هيتكلم في التليفون مكانك.. اعرف مميزات مساعد "جوجل" وطريقة استخدامه

27/11/2018

شركة "جوجل" أعلنت من كام شهر، عن تقنية جديدة وهي Google Duplex، لكن الفترة دي بدأت التقنية تدخل حيز التنفيذ، وهي باختصار "مساعد جوجل"، وهو عبارة عن "روبوت" بنظام آلي بيعمل مكالمات تليفونية بدل المستخدم، عشان تساعده في تنظيم حياته، النقط الجاية بتشرح يعني إيه "جوجل دوبلكس"

"جوجل دوبلكس" هو مساعد جوجل اللي بيعمل المكالمات التليفونية المهمة مكان الشخص، زي إنها يحجز له معاد دكتور أو معاد مقابلة مهمة

التقنية دي بتسمح للمستخدم إنه يغير صوت الروبوت ويبقي شبه صوت المستخدم أثناء المكالمات

ممكن كمان الروبوت ده يفهم الجمل الطويلة والصعبة والمعقدة في المكالمات الطويلة

"جوجل" قالت إنها هتعمل شرط إن الأشخاص اللي خاصية Google Duplex بتكلمهم هتعرفهم إنه روبوت عشان الشفافية.

ظهرت الخاصية في أول مرة في مؤتمر في الصيف اللي فات، وأبهرت الحضور وقتها بإنها ممكن تقول "آه" و"مممم"، وطريقة كلامها بشرية جدا

الخدمة معمول مخصوص للأشخاص اللي بيتكسفوا مثلا يردوا على التليفونات أو الأشخاص اللي عايزين يحجزوا في أي مكان وماعندهمش وقت يتكلموا في التليفون.

كل اللي عليك بس عشان تستخدم الخاصية دي إنك تطلب من مساعد جوجل يحجزلك في المكان اللي عايزة.

بالنسبة لبعض المطاعم، Google Duplex مش هينفع يحجز فيها، وده بسبب إن المطعم بيكون لاغي الحجوزات عن طريق التليفون أو موقف خدمة Google Duplex .

فيه بعض الأماكن اللي مش متوافر فيها خدمة Google Duplex، مساعد جوجل هيفتحلك OpenTable بدل  Google Duplex، وممكن تحجز أونلاين بدل ما تكلم المطعم.

بعد ما  Google Duplex بيحجز في المطعم، بيجيلك إيميل بيأكد الحجز بتاعك.

ودي طريقة استخدام "جوجل دوبلكس" زي ما وضحها موقع "بيزنس إنسايدر"

Comments: