ملخص الهجوم على لعبة "PUBG".. تحريم ديني وجرائم قتل

28/11/2018

لعبة "PUBG" هي تطور طبيعي للـ Shooter Game اللي ظهرت من أيام الأتاري، انتشرت أخر فترة وبقيت إدمان بالنسبة لأي حد بيلعبها خصوصا إن ممكن الشخص يلعبها مع صحابه اللي على الفيسبوك، لكن مش دي الأسباب الوحيدة اللي شهرت لعبة "PUBG"، من الأسباب التانية اللي شهرت اللعبة هي الهجوم الكبير اللي حصل على اللعبة.

الهجوم على لعبة "PUBG" بيفكرنا بالهجوم اللي حصل على ألعاب كتير زي بوكيمون جو، وكاندي كراش، ولعبة كونكارد، وزيهم من الألعاب القديمة زي ألعاب بوكيمون اللي كانت بتطلع في الشيبسي مثلا لما قالوا إنها ألعاب مسرطنة وغيرهم اتهاجم من المجتمع من غير أسباب واضحة أو بسبب الاشاعات اللي بنصدقها.

جمعنا الهجوم اللي حصل مؤخراً على لعبة "PUBG" زي:

1- لعبة "PUBG" بتتسبب في قتل طالب لمدرسته في الإسكندرية:

موقع مصراوي نشر خبر عن طالب في أولى ثانوي قتل مدرسة الكيمياء بتاعته بسبب لعبة "PUBG"، أثناء ما كان بياخد درس خصوصي في بيتها، بعد ما اتولدت عنده فكرة القتل من لعبة"PUBG".

2-  ممارسة لعبة "PUBG"حرام شرعاً:

في خبر اتنشر على اليوم السابع صرح الدكتور أحمد كريمة أستاذ الشريعة الإسلامية في جامعة الأزهر إن ممارسة لعبة "PUBG"حرام شرعا، استناداً للقاعدة الفقهية "ما أدى إلى الحرام فهو حرام"، ولعبة "PUBG"بتسبب العدونيات وبينتج عنها أذى سواء كان بالقتل أو بالجرح عشان كده هي حرام شرعا.

3- لجنة الاتصالات والتكنولوجيا في البرلمان تتواصل مع الجهاز القومي لحذف لعبة "PUBG" من متجر جوجل:

في خبر اتنشر على اليوم السابع أكد النائب أحمد بدوي رئيس لجنة  الاتصالات وتكنولوجيا المعلومات في البرلمان إن اللجنة هتعقد لبحث إمكانية مواجهة لعبة "PUBG" لإنها بتعبر عن العنف وبتعتبر من ضمن حروب الجيل الرابع، وبتمثل خطر على الأطفال.

4- حذر الاعلامي رامي رضوان من لعبة"PUBG":

حذر رامي رضوان في برنامجه "8 الصبح" من إدمان لعبة "PUBG"خصوصا بعد حالة قتل الطالب لمدرسته اللي في إسكندرية، وقال كمان إن فيه 200 حالة طلاق في أوروبا حصلت بسبب لعبة "PUBG" وقال إن اللعبة خطر على مستخدمينها، وإنها بتولد العنف عند الأطفال والشباب.

5- لعبة "PUBG"بوابة خلفية لتنظيم داعش لإستقطاب الشباب العربي:

اليوم السابع نشرت خبر بيقول إن  لعبة "PUBG" بوابة خلفية لتنظيم داعش لاستقطاب الشباب العربي وده بسبب إن التنظيم بيستغل الفضاء الإلكتروني لنشر أفكاره بين الشباب في العالم، خصوصا إن تنظيم داعش بقى معتمد على تكتيك جديد للدخول لقلب العالم بهدف جمع عدد أكبر من الشباب، وقالوا كمان إن تنظيم داعش استغل اللعبة دي عشان يشغل النشيد الوطني للتنظيم في الطيارة اللي بتجمع شباب من بلاد مختلفة.


 

Comments: