اعرف إزاي كيمياء جسمك بتحدد نوع العطر المناسب ليك

29/11/2018

اختيار العطور بيختلف من شخص للتاني والسبب مش بس اختلاف الأذواق بين الناس، فيه سبب تاني مهم في اختيارك للعطر المناسب ليك، وهو كيمياء جسمك!

علميًا لكل جسم كيمياء بتتفاعل مع العطر اللي بيستخدمه، وبتختلف من شخص للتاني، والكيمياء دي بتتأثر بدرجة حرارة جسم الإنسان ونسبة الماء والدهون الموجودة فيه، ده بالإضافة للبروتينات وطبيعة مسامات الجلد.

كل ده بيخلق ريحة معينة للجسم أو كيمياء معينة واللي بتتفاعل مع العطر اللى بتستخدمه وفي النهاية بتتكون الريحة، محمد عبيد، الرئيس التنفيذي لشركة "برامبل" للعطور، كان ليه  تعليق على الموضوع ده وقال في تصريح لموقع "عين الرياض" السعودي، إننا لما بنرش العطر يتفاعل مع رائحة الجسم وبيخلق ريحة  لا تتكرر، وده شبيه ببصمة إيد كل شخص.

كمان موقع اليوم السابع نشر نقلا عن موقع  "houseofcaress" إن العطر الواحد بيختلف ريحته من شخص للتاني، وده بسبب تفاعل كيمياء الجسم مع العطر، واللي بيرجع للنظام الغذائي الخاص بيك والعوامل الوراثية.

وفي 2001 اتعملت دراسة في مجلة اسمها "سلوك البيئة" على حسب موقع "how stuff works"، واللي أظهرت إنه بيحصل عمليات كيميائية كتيرة تحت سطح جلد الإنسان لما بيستخدم العطر.

السؤال المهم دلوقتي، إزاي أحدد نوع البرفان المناسب ليا؟، نشر موقع "lifestyle asia" مقالة بيحدد فيها أنواع العطور المناسبة لكل جسم.. مثلًا البشرة الدهنية بتساعد إن العطر يفضل موجود أطول فترة ممكنة في جسمك، والتفسير هو إن الزيوت بتعمل تفاعل قوي جدًا مع العطور، علشان كدة العطور اللي عبارة عن رائحة زهور خفيفة أو الحمضيات مناسبة جدًا لأصحاب البشرة الدهنية.

أما أصحاب البشرة الجافة فالعطور القوية النفاذة بتكون مناسبة ليهم زي الروائح الخشبية اللى يتكون مثالية على بشرة زي دي، أما إذا كنت بتفضل روائح الزهور فترطيب البشرة بيكون مهم جدًا.

وبناء على الكلام ده، اختار العطر المناسب ليك مش اللي شميت ريحته على صديق ليك لأنك ممكن ريحته عليك ماتبقاش نفس الريحة اللي عجبتك عند صديقك.

Comments: