بسبب التحرش الجنسي.. الحكم على الموسيقي إبراهيم معلوف بالسجن 4 شهور في فرنسا

29/11/2018

إبراهيم معلوف، وهو موسيقي لبناني فرنسي معروف بـ"تراكس" المزيكا العظيمة اللي بيعملها، وإنه بيعمل ميكس بين المزيكا الشرقي والغربي، حكمت عليه محكمة فرنسية، في مدينة كريتاي القريبة من العاصمة باريس حكم بالسجن 4 شهور مع وقف التنفيذ وغرامة 20 ألف يورو.

ابراهيم معلوف وقت الواقعة اللي كانت في 2013 كان عمره 33 سنة وتهمته إنه اعتدى على بنت عندها 14 سنة وقتها، البنت حاليا بقى عمرها 19 سنة، كانت بتدرب في الأستديو بتاعه اللي في واحدة من ضواحي جنوب شرق باريس سنة 2013، وقالت البنت في المحكمة إن معلوف بسها من غير موافقتها.

لكن معلوف طبعا نفى الكلام ده وقال إن هي اللي خدت الخطوة الأول وباسته، وإنه بعدها عنه بهدوء، وقالت البنت كمان إنه رجع وباسها تاني بعدها بيومين وجسمه التصق بجسمها، لكن معلوف نفى الحادثة دي كلياً.

واستندت النيابة لحالة البنت الصحية والنفسية اللي أصاب البنت على إنه دليل لصدق الأحداث، لكن محامية "مود سوبل" معلوف ردت وقالت إن البنت هي اللي كانت بتحبه وقالت إن المحكمة تجاهلت الادلة اللي هما قدموها.

الجدير بالذكر إن معلوف اتولد في لبنان سنة 1980 يعني أثناء الحرب الأهلية اللي بدأت سنة 1975، واتنقل مع عيلته لفرنسا من وقت طفولته يعني، واشتغل معلوف مع أبرز عازفين الجاز اللي منهم عازف البوق وينتون مارساليس، وشارك في أبرز المهرجانات الموسيقية في فرنسا وفي العالم.

Comments: