٨ أماكن لخروجات مختلفة في القاهرة 

02/12/2018


لو عايز تغير مود وتتفسح في أماكن جديدة، الليستة دي هتعرفك على أماكن خروجات جديدة في مصر، علشان تتفسح مع صحابك في أماكن حلوة ومختلفة.

High Ropes
في المقطم، في طريق دير سمعان الخراز، هتلاقي المكان ده واللي عبارة عن ألعاب عملها راجل كندي اسمه ماريو، جه مصر وعمل منطقة ألعاب ملحقة بالكنيسة.
المكان عبارة عن ألعاب جديدة جدًا وفيها تسلق ومغامرة، زي لعبة zip line اللى هي عبارة عن برج عالي  بتطلع عليه وتتربط في حبل وتتزحلق، كمان من الألعاب التانية اللى موجودة في المكان هو تسلق الصخور، ودي بتبقى محتاجة لياقة عالية جدًا لأنك هتتسلق مرتفعات عالية جدًا.

Decode Egypt
لو أنت من الناس اللى بتحب أفلام الرعب وجو الأكشن والمغامرة يبقى المكان ده ليك، دي لعبة عبارة عن Escape Room لكن بجو مليان رعب وإثارة، بداية من ديكور المكان اللي بيكون مليان جثث، والموسيقى اللي شغالة في المكان، وكمان الألعاب، وكل الل يكون مطلوب منك هو حل الألغاز اللي بتقابلها.

المكان ده موجود في، ٢٤ ش قمبيز متفرع من مصدق الدقي جيزة، جمع صحابك اللى قلبهم جامد وروحوا.

Bubble Football
كرة الفقاعات، مكان علشان تتخلص من ضغوط الشغل، واللود اللى يكون عليك من الدراسة أو في الحياة عامة، هتلاقيك بتضحك من قلبك في المكان ده، واللي موجود في ميراج مول بالتجمع الأول.

Gravity Code
المكان موجود في التجمع الخامس في سكاي بلازا في شارع التسعين بجوار أمريكانا بلازا، المكان ميزته انك بتعمل رياضة وبتلعب في نفس الوقت.
فكرة اللعبة دي إنك بتقاوم الجاذبية، وتنط من على ألعاب كتيرة ومختلفة وممتعة جدًا.



Smart Camp

المكان مش هتروح فيه ساعة ولا اتنين، ده اليوم كله هتقضيه هناك لأن فيه تزلج على الرمال، وكرة قدم على ملعب الصابون، وكمان كرة قدم أمريكية.
المكان في مدينة العبور، مدخل 5، عند معهد أحمد عرابي، بطريق القاهرة الإسماعيلية الصحراوي، خلف كارفور.

BreakOut Egypt
المكان ده بيوفر تجربة خطف بتحاول تهرب منها وتفك الألغاز وتهرب صحاب معاك، وهو مفتوح من 12 الضهر لغاية 1 بليل، والجو كله رعب وإثارة.




أدرينالين بارك
فريقين بيدخلوا حرب ضد بعض، واللعبة بتبتدي باللبس وتجهيز المسدس والطلقات.
هتلاقي المكان ده موجود في 6 أكتوبر  في الشيخ زايد، بمنطقة الحزام الأخضر.

Airzone
  المكان ده عبارة عن مجموعة نطاطات بالترامبولين اللي بمجرد بما بتلمسه بيرفعك مسافة كبيرة لفوق، الميزة اللى فيه إنه مكان مفتوح ومخصص للأطفال والكبار فلو حابب تروح إنت وعيلتك ومعاك أطفال فالمكان ده هيكون مناسب جدًا ليك ، المكان موجود في مول بوينت 90 في التجمع الخامس  قدام الجامعة الامريكية.

Comments: