الحساسية الغذائية.. سببها الجهاز المناعي وقد تؤدي للموت

03/12/2018

في العالم كله الأطفال بتعاني من الحساسية من أكلات معينة، وده ظهر مؤخرا أكتر من أي وقت قبل كده، لدرجة إن فيه طفلين بريطانيين ماتوا بسبب إنهم كلوا سمسم وفول سوداني وفقاً لموقع BBC، وبنت تانية في أستراليا في شهر أغسطس اللي فات عندها 6 سنين ماتت برضه بسبب إن كان عندها حساسية من منتجات الألبان.

لكن عموما، في علاقة بين جسم البشر والحساسية من بعض المواد، والعلاقة بتؤدي لنتايج مخيفة في بعض الأوقات، وفي آخر كام سنة زادت نسبة الحساسية بالذات في الدول الغربية، لدرجة إن وصلت النسبة لإن 7% من الأطفال في أمريكا بيعانوا من الحساسية من أنواع أكل مختلفة، وفي أستراليا وصلت النسبة لـ 9%، وفي أوروبا 2% من البالغين بيعانوا من الحساسية الغذائية، وده معناه إن فيه أسر لازم تتبع قواعد معينة في أكلاتها واختيارها لأنواع الأكل لإنهم عايشين أغلب الوقت مع قلق وخوف من مكونات الأكل، وبالرغم إن مفيش معلومات تقول أسباب لزيادة معدلات الحساسية الغذائية إلا إن الباحثين في العالم بيحاولوا يلاقوا طرق لمكافحة الظاهرة دي.

إيه اللي ممكن يسبب الحساسية الغذائية دي؟ الحساسية بتحصل بسبب إن جهاز المناعة بيقوم برد فعل بعد أكل معين لإن جهاز المناعة مابيقدرش يتعرف على نوع معين من الأكل أو واحد من مكونات الأكل ده، وبيتعرف عليها على أساس إنها شيء مؤذي، وبعد كده جهاز المناعة بيحفز الخلايا عشان تفرز مادة اسمها "الجلوبيولين المناعي E" عشان تبطل مفعول وتأثير المادة المسببة للحساسية، وبعد كده لو كلت نفس الأكل تاني فالأجسام المضادة اللي هي "الجلوبيولين المناعي E" بترسل إشارة للجهاز المناعي عشان يفرز مادة "الهيستامين" ومواد كيميائية تانية بتسبب أعراض الحساسية.

أكتر الأعراض اللي بتوضح الحساسية هي: احمرار الجلد ، والتورم، و في الحالات الشديدة بيوصل الموضوع للقيء والإسهال وصعوبة في التنفس.

أكتر الأكلات اللي ممكن تسبب حساسية للأطفال زي:

1- حليب

2- بيض

3- الفول السوداني

4- المكسرات (زي الجوز، اللوز، الصنوبر)

5- سمسم

6- السمك

7- المحار (زي الجمبري، الكابوريا)

في التلاتين سنة اللي فاتت زاد القلق من ناحية الحساسية الغذائية، وبالذات في المجتمعات الصناعية، الحساسية بتزيد في بعض البلاد وبتتوقف على نوعية الأكل والمكان اللي بيعيش فيه مريض الحساسية دي، يعني على سبيل المثال فنسبة الحساسية من الفول السوداني زادت 5 أضعاف في أمريكا من سنة 1995 لحد سنة 2016.

عملوا دراسة على 1300 طفل في عمر الـ 3 سنين في جامعة "كينجز كوليدج" في لندن، واكتشفوا إن 2.5% من الأطفال بيعانوا من حساسية الفول السوداني.

وأعلى نسبة للحساسية الغذائية موجودة في أستراليا، لإن فيه دراسة أثبتت إن 9% من الأطفال الأستراليين في سن سنة عندهم حساسية من البيض، في حين إن 3% من الأطفال عندهم حساسية من الفول السوداني.

في البلاد النامية نسبة الحساسية الغذائية أقل، ونسبة الحساسية الغذائية في الأماكن الحضرية أكتر من الأماكن الريفية، وده ممكن يكون بسبب حاجات كتير منها التلوث والتغيرات الغذائية والتعرض الأقل للميكروبات وده اللي بيغير استجابة جهاز المناعة.

وعموما، مهم إن كل شخص يعرف هل عنده أي نوع من الحساسية ولا لأ، لأن في أنواع حساسية مابتبقاش معروفة وتأثيرها على الجسم بيبقى كبير، زي حساسية منتجات القمح مثلا اللي بتأثر على المعدة والهضم.


 

Comments: