٩ فنانين وصلوا لجيل الألفينات عن طريق السوشيال ميديا

05/12/2018


من مميزات السوشيال ميديا إنها ساعدت ناس كتير تحقق شهرة كبيرة، سواء كان عشان إنجازاتهم في مجال معين أو عشان هما اتعرفوا للناس كـ"إنفلونسرز"، أو عشان هما فنانين ومشهورين بالفعل ودي الحسابات الشخصية بتاعتهم، لكن مش كل الفنانين اللي محققين انتشار على السوشيال ميديا شباب، فيه فنانين كتير كانوا مشهورين عند أجيال التمانينات والتسعينات بعد ما اختفوا رجعوا تاني للجمهور عن طريق السوشيال ميديا، وبقى ليهم شعبيه أكبر عن طريقها، ده غير الفنانين اللي حققوا تواجد أكبر عند جمهور وأجيال مختلفة عن الجمهور اللي متعود عليهم وبيشوفهم على الشاشات، وده لإن السوشيال ميديا مجمعة فئات عمرية متباينة، ومن أهم الفنانين اللي عملوا كده:

1- فيفي عبده:

فيفي عبده ظهرت كراقصة وممثلة في السبعينات والأجيال من السبعينات للتسعينات عارفينها كويس خصوصا وإن آخر 8 سنين تواجدها في التلفزيون كان بأعمال ماحققتش شهرة كبيرة زي "يا أنا يا إنتي" و"طوق نجاة"، وآخر ظهور حقق نجاح كبير ليها كان في الجزأين بتوع مسلسل "كيد النسا" سنة 2011 و2012، ومسلسلات "الست أصيلة" وسوق الخضار"، اللي كانوا في أول 5 سنين من الألفية الجديدة وبالتالي الجيل ده ماشفهاش فيهم برضه.

لكن حاليا، فيفي عبده من أهم أيقونات السوشيال ميديا وعرفت تكسب جمهور الألفينات ليها رغم إن الشباب في السن ده ماعصروش فترة انتشارها في المسلسلات، واكتسبت اسم شهرة جديد بقت معروفة بيه عند شباب نهاية التسعينات وأوائل الألفينات وهو "فوفا".. و"فوفا" دلوقتي عندها على إنستجرام 3.7 مليون فلورز، بسبب الفيديوهات اللي الناس بتشوف إنها بتنشر البهجة والسعادة، فيديوهات رقص ليها.

التيمة اللي بتظهر بيها فيفي عبده في فيديوهاتها تقريبا واحدة، في بداية الفيديو بتقول جملة بقت أيقونية جدا لدرجة إنها بقت "إيفيه" متبادل بين الشباب، زي "سكوز مي" و"خمسة امواه"، و"إشطات فلات عسلات من مصر أم الدنيا".

2- محمد هنيدي:

أشهر أفلام لمحمد هنيدي كانت في وقت التسعينات زي "صعيدي في الجامعة الأمريكية" و"بلية ودماغه العالية"، و"إسماعيلية رايح جاي"، وحتى أفلامه اللي علمت مع الجمهور بعد كده، زي "عسكر في المعسكر" ويا "أنا يا خالتي" كانت في أول 5 سنين من الألفية، لكن محمد هنيدي بعيدا عن شاشة السينما والتلفزيون، قدر يبقى "ترند" دائم على السوشيال ميديا بالأكونت بتاعه على "تويتر" مهما عدت سنين من غير ما يعمل فيلم أو مسلسل.

3- محمود البزاوي:

محمود البزاوي من النجوم اللي اتشهروا جدا بأدوارهم الثانوية في التسعينات وبداية الألفينات، لكنه اتشهر جدا على السوشيال ميديا وخصوصا "تويتر" وبقى عنده حوالي 624 ألف فولور، ودايما وجوده على السوشيال ميديا مرتبط بخناقاته مع ابنه على الهدوم والتريقة المتبادلة بينهم.. "البزاوي" قدر يصنع لنفسه شهرة من نوع جديد وعند جمهور جديد عن الجمهور اللي متعود يشوفه على الشاشات.

4- فتحي عبد الوهاب:

صور فتحي عبد الوهاب السيلفي اللي بمناخيره هي سبب شهرته على السوشيال ميديا، بعد تريقة الناس عليها، ومن بعدها نجوم كتير بقوا يتصوروا نفس الصورة دي معاه، وصور تانية مختلفة بشنبه كانت سبب في شهرته كـ"ميم" على السوشيال ميديا.

5- سميرة سعيد:

من أشهر المغنيين في فترة التسعينات بصوتها وطريقة غناها المختلفة، لكنها رجعت بكذا ألبوم في آخر فترة ولعبت على "تيمة" الست القوية الجريئة اللي بتهاجم الراجل، ورجعت كمان عن طريق "إنستجرام"، وده بسبب صورها اللي الناس بيشوفوا دايما إنها أصغر منها بـ 30 سنة، سميرة سعيد عندها على أكونت إنستجرام 1.9 مليون متابع، وحريصة على التواصل مع الجمهور دايما على "تويتر".

6- رجاء الجداوي:

من نجوم الزمن الجميل، رجعت للواجهة تاني بتفاعلها مع الجمعور على السوشيال ميديا، ومؤخرا بقى عندها أكونت على إنستجرام عليه 448 ألف فلور، وبتتفاعل مع الناس عليه باستمرار وبترد عليهم كمان أول بأول.

7- غادة عبد الرازق:

غادة عبد الرازق معروفة عند جيل التسعينات والألفينات لأنها موجودة بمسلسل سنوي في موسم دراما رمضان، زي "حكاية حياة" و"مع سبق الإصرار"، بس ماكتفتش غادة عبد الرازق بمسلسلات عشان تظهر لجمهورها بيها، لأنها منتشرة جدا على "إنستجرام"، وتحط صور كتير ليها ولأحداث حياتها بشكل يومي مع صحابها وبناتها.

8- صلاح عبد الله:

صلاح عبدالله كاتب الـ Bio بتاعه كده بالظبط على أكونت "تويتر": "ممثل وكان مخرج زمان وزجال في بعض الأحيان"، عنده تقريبا حوالي 646 ألف فلور على الأكونت ده، بينزل "تويتس" كتير فيها شعر، وهو من الجيل اللي يعتبر قديم نسبيا وكان كل تواصله مع الجمهور من خلال برامج التلفزيون والصحافة، ورغم وجوده على "تويتر" من 2012، إلا أن نشاطه وتفاعله زاد خلال السنة اللي فاتت.

9- نبيل الحلفاوي:

نبيل الحلفاوي غالبا فكرة جيل الألفينات عنه هو التريقة اللي على مشهد العسلية في فيلم "الطريق إلى إيلات" وده ليه علاقة بفروق الأجيال لأن نبيل الحلفاوي ممثل كبير جدا ومن أهم فنانين جيله، بخلاف الحكايات الكتيرة اللي بتتقال عن كونه شخصية رائعة على المستوى الإنساني.

وبعيدا عن الشاشة، واقترابا من أجيال الشباب وخصوصا الألفينات، نبيل الحلفاوي شخص مؤثر ومشهور على "تويتر" عنده 4.9 مليون فولور، ودايما حاضر وموجود بآرائه في أي نقاش سياسي أو اجتماعي، وطبعا في الأحداث الرياضية لأنه أهلاوي قديم، ودايما "الحلفاوي" بيحظى بحب واحترام الشباب وفي علاقة أبوة بينه وبينهم، ودايما بينادوه بلقبه الشهير "القبطان".

Comments: