حوار مع مدرب "صلاح" في "المقاولين": مستواه ماهبطش.. وأنصحه يتخلص من الضغوط

09/12/2018

محمد صلاح إمبارح سجل 3 أهداف في مرمى "بورنموث"، وده كان السبب إن فريق "ليفربول" يوصل للنقطة الـ 42 ويتصدر الدوري الإنجليزي خصوصا بعد خسارة منافسه على الصدارة مانشستر سيتي، وبسبب الهاتريك ده محمد صلاح اتصدر قائمة هدافي البريميرليج، وبمناسبة رجوع "الإيجيبشن كينج" لمستواه، اتكلمنا مع كابتن سعيد الشيشيني اللي درب "صلاح" من سن 15 سنة لسن 18 سنة في الهاتريك.

كابتن سعيد قال لنا إن الفترة اللي فاتت محمد صلاح كان بيمر بمرحلة غريبة شوية، الناس اتعودت إنه لازم كل مبارة ينزل يجيب أهداف على الرغم إنه مابيلعبش مهاجم وبيلعب جناح، ولو ماسجلش الناس بتعتبر مستواه هبط، وهي دي المشكلة، وقال كمان إن محمد صلاح هو هداف الدوري السنة اللي فاتت وبالتالي الجمهور عايزه الهداف كل سنة.

وأكد كابتن سعيد إن "صلاح" لما أحرز الـ 3 أهداف إمبارح كان بيرد على كل المشككين فيه وفي مستواه، وأكد كمان إن مستواه مرتفع جدا لكن الرقابة بقت شديدة عليه من كل الفرق "والناس مابترحمش"، ووصف "صلاح" بإن خبرته بتزيد مع الوقت وإنه بقى يجيب أهداف صعبة جدا "مستواه ماهبطش، بس هو دلوقتي بقى شايل هم إنه مايحرزش أهداف".

ولما سألناه عن الطريقة اللي ممكن تخلي صلاح يحافظ على مستواه قال إنه شخص ملتزم جدا ويعرف ربنا كويس أوي بس زمايله لازم يساعدوه لإن بقى فيه غيرة دلوقتي منه، وإن الأضواء كلها بقت متسلطة عليه لأنه الهداف "المفروض يساعدوه زي ما بيساعدهم".

لما سألنا كابتن سعيد الشيشيني عن رأيه في علاقة صلاح بمدربه "يورجن كلوب" قالنا إن "كلوب" بيحبه جدا وإن أي مدير فني بيحب الراجل اللي بيجيب أهداف وبيتعاون مع زمايله، اللاعب الراجل الملتزم الراجل اللي في أي وقت ممكن يخلصله المباراة، وطبعا الصفات دي كلها موجودة في محمد صلاح وبالتالي "كلوب" بيحبه.

وتابع إن المدير الفني قبل ما يكون مدير فني لازم في الأساس يشتغل كطبيب نفسي لكل اللاعيبة، وإن لو محمد صلاح مستواه هبط شوية لازم يتكلم معاه في جلسات متتالية عشان يخرجه من اللي هو فيه، وأضاف "ماننساش إن محمد صلاح فضل فترة كبيرة جدا الناس فضلت تتكلم عنه وتقول إنه هيتعرض للبيع لإن الناس حاطه في دماغها إن محمد صلاح زي الفرخة اللي بتتباع، فإن ماكنش بيحرز أهداف يبقى ملوش لزمة على الرغم من إن صلاح بيساند زمايله جدا وبيعمل أسيستات كتير".

اتكلمنا مع كابتن سعيد عن ذكرياته مع نجم ليفربول، وقالنا إنه مسك فرقة "صلاح" وهو عنده 15 سنة قعد معاه 3 سنين "محمد كان بيلعب باك شمال وطبعا خلال المبارات لقيت إنه لازم يلعب في مكان أحسن.. مرة كنا بنلعب مع إنبي وهو ضيع 4 أهداف مؤكدة وقعد يبكي.. قعدت معاه وسألته بتبكي ليه قاللي يا كابتن أنا ماجبتش أهداف، فرد عليه وقاله إحنا كسبنا إنبي 4، مين أصلا اللي بيكسب إنبي 4-0، قاله يا كابتن أنا عايز أجيب اجوان، قاله ماتشيلش هم أنا هحطك في مكان كويس وهخليك تسجل كل ماتش، وبالفعل حطيته في المكان اللي بيلعب فيه حاليا".

وعن تجربة صلاح في "المقاولون العرب"، قال كابتن سعيد إن محمد كان بيسافر بلده في الشرقية ويرجع مع كل تدريب أو ماتش، فقرر "الشيشيني" يكلم المهندس إبراهيم محلب وقاله إن عنده موهبتين ممكن يكونوا من أفضل اللاعيبة في مصر وهما محمد صلاح ومحمد  النني، فعايزين نجهزلهم مكان عشان الإقامة، لإنهم كانوا بياخدوا 8 ساعات في اليوم بين سفر وتدريب، ومن هنا كانت أول وأهم خطوة في حياة محمد صلاح وكان عنده وقتها 15 سنة.

وكمل كابتن سعيد ذكرياته مع صلاح "فضل معايا وهو عنده 15 و16 و17 ولما طلعنا الدرجة الأولى خدناه معانا هو النني، وفي نهاية الموسم راح المنتخب الأولمبي وبعدها احترف في بازل وكان عنده وقتها 18 سنة". وقال إن فرصة الاحتراف جاتله عن طريق المهندس شريف حبيب، اللي ساعده لكن نجاح صلاح سببه اجتهاده لإن عنده إصرار وعنده عزيمة إن عايز يعمل لنفسه حاجة.

سألناه كمان عن الطريقة اللي اتعامل بيها مع محمد صلاح لما كان بيدربه، وقالنا إنه زيه زي أي لاعب، لكنه لعيب محترم ومؤدب وملتزم وبيعرف ربنا، فكان طبعا كان له تعامل خاص، ولما نقله لمركز الجناج كان لازم ياخد تدريب معين، فكان بيركز معاه على إنه بقى مهاجم خلاص، لأن مش سهل تدريب لاعب على مركز غير المركز اللي كان بيلعب فيه.

وعن العلاقة بينه وبين صلاح دلوقتي، قال كابتن سعيد إنه بيعتبره أبوه "هو راجل بيحس برضه بالناس اللي وقفوا جنبه، إنما طبعا مش هتبقى زي الأول لإنه بيشوفه كل يوم لكن دلوقتي بشوفه كل سنة أو سنتين مرة، إنما فيه اتصالات وكلام بيننا".

ووجه "الشيشيني" كلمة في آخر الحوار لصلاح "هقوله بس ربنا يكرمك ويقويك وحاول بقى تتخلص من الضغوط اللي عليك دي، والعب لعبك الطبيعي لإن اللعيب لما يتحط تحت ضغط نفسي بيتأثر جدا"، واختتم "لكن ربنا كرمه أهو وابتدأ يجيب أهداف وابتدا يرجع لهداف الدوري تاني فـ 10 أهداف دي هتساعده جدا".


 

Comments: