١٠مسلسلات نجحت خارج السباق الرمضاني

09/12/2018

مسلسلات كانت خارج السباق الرمضاني، ورغم كده قدرت المسلسلات دي توصل للجمهور وتحقق نجاح كبير، هل السبب هو روح العمل الجماعي وإن البطولة في الأعمال دي كانت جماعية مش فردية ولا فيه سبب تاني.

رصدنا أهم الأعمال الدرامية اللي نجحت بره موسم رمضان:

- أبو العروسة

من المسلسلات اللى كان ليها حظ النجاح خارج السباق الرمضاني، وكان بيتفرج عليه الأسرة كلها متجمعة، ودة علشان جوه المسلسل نفسه كان عائلي.
المسلسل اللي اتعرض على فضائية DMC، شارك فيه سيد رجب وسوسن بدر  ومدحت صالح بالاشتراك مع محمد عادل وولاء الشريف ومحمد حاتم.

- سابع جار

أثار المسلسل ده لما اتعرض  جدل كبير وخلاف بسبب إنه كان بيعرض قضايا جريئة، زي الزواج لغرض الأطفال وبعدها الطلاق.
بتدور أحداث المسلسل بين عدد من الجيران في عمارة سكنية، وبتحصل مشاكل اجتماعية وحياتية يتناولها المسلسل.

- كأنه امبارح

بيتكلم المسلسل عن معاناة بتعيشها أسرة لسنوات بعد خطف ابنهم وهما بيقضوا عطلة صيفية على الشاطئ، وبمرور السنوات بيلاقوا ابنهم وبيدخلوا في صراع، هل اللي لقوه ده ابنهم فعلا؟

- نصيبي وقسمتك

نصيبي وقسمتك مسلسل بيصنف  على إنه كوميدي ودراما اتعرض الجزء الأول منه في 2016 والجزء التاني منه 2018، المسلسل عمل نجاح كبير خصوصًا إنه كان  بيتكلم في مشكلات عاطفية واجتماعية، الميزة في المسلسل ده إن كل حلقة بتعرض موضوع مختلف عن الموضوع التاني، وأحيانا بتعرض موضوع في أكتر من حلقة.

- الأب الروحي

مسلسل تلفزيوني درامي اتعرض على قناة DMC، بتدور أحداث المسلسل عن عائلة كبيرة جدًا يسيطر عليها الأب زين العطار واللي بيقوم بدوره الفنان محمود حميدة، يعتبر العمل ده برضو مزيج بين نجوم كبار وأسماء شابة جديدة.

- الطوفان

المسلسل بيتكلم عن أسرة ميسورة الحالة مكونة من الأم صفية وأبنائها، تحدث صدفة في حياة العائلة وهو الميراث اللى يكون عبارة عن أرض يصادف إنها من أراضي مشروع قناة السويس والذي يصل ثمنها إلى 300 مليون جنية، من بعدها تحدث المشكلات خصوصًا بعد محاولة الأبناء في قتل أمهم.


- عائلة زيزو

مسلسل كوميدي عائلي، بتقابل الأسرة عدد كبير من المشكلات الحياتية، المسلسل جمع عدد من الفنانين منهم أشرف عبد الباقي، ونسرين أمين، ولطفي لبيب، إبرام سمير، وهايدي رفعت.

- بين عالمين

بيتكلم المسلسل دة عن الصراع بين المال والسلطة، بتدور أحداث المسلسل حوالين مروان وهو رجل يمتلك شركة عقارات، وعلى الرغم من كونه ملتزم دينيًا إلا إنه بيقدم مصلحته والمال على أي شيء تاني، شارك في بطولة العمل طارق لطفي، هشام سليم، ولقاء الخميسي، وتامر شلتوت، ومها نصار.

- الكبريت الأحمر

اتعرض مسلسل الكبريت الأحمر لأول مرة  في 2 أكتوبر 2016، بيتكلم المسلسل عن القدرات الخارقة وما وراء الطبيعة.
بتبدأ الحكاية  مع اندلاع حريق ضخم في حي شعبي، أهالي الحي ده يعتقدوا في الخرافات والخزعبلات والشعوذة.


- أنا شهيرة أنا الخائن

حكاية من فصلين بنشوف من خلالها علاقة زوجية ناجحة تتحول لمأساة، القصة بتتحكي على جزئين كل جزء 30 حلقة، في الجزء الأول بنتفرج على الأحداث من وجه نظر شهيرة وفي الجزء التاني وجهة نظر رؤوف (الخاين).

وقال طارق الشناوي في تصريح لـ"the glocal" أن نجاح الأعمال الدرامية التي تعرض خارج السباق الرمضاني، سببه قوة العمل نفسه من حيث الفكرة ومعالجتها.

"الشناوي" نفى إن العمل الجماعي هو سبب نجاح المسلسلات خارج السباق الرمضاني وذلك لأن العمل الجماعي أو الفردي مش سبة أو ميزة، الفكرة هي الأهم هي فكرة المسلسل نفسه.

وعبر في نهاية مكالمته عن سعادته في التنوع في توقيت عرض المسلسلات، فمنهم اللي بيتيعرض خارج التنافس الرمضاني وآخر داخال الموسم، وده بيوفر المتعة والتنوع للمشاهد.

Comments: