الكسل مرض ولا صفة؟: 7 نصايح لتجاوز "أنتخة" الشتاء

11/12/2018

الكسل هو سبب تأجيل خطط كتيرة وممكن يكون سبب مشاكل في الشغل وخناقات عائلية، ماتعرفش بقي هو جو الشتا اللي بيخلي الناس مكسلة، ولا الكسل هي صفة من الصفات الشخصية اللي موجودة جوانا وبتبقى على حسب كل شخص، ولا هو وفي الأساس مرض عضوي أو نفسي.

دكتور جمال فرويز، الطبيب النفسي، قال إن فيه نوعين من الكسل وهو الكسل العرضي والكسل السلوكي، بالنسبة للكسل العرضي فهو حالة بتيجي للشخص فترة وتسبب الإحساس بالخمول والضعف وبيكون بسبب مشاكل صحية سواء كانت عضوية زي أمراض الكبد، وأمراض نفسية زي الاكتئاب،.

وقال كمان في تصريحت لصحيفة "اليوم السابع" المصرية إن في الحالات دي الكسل بيختفى مع علاج الأمراض، لكن بالنسبة للكسل المرضي فهو بيكون صفة من صفات الشخص من طفولته والأشخاص دي بتفقد مهارات حل المشاكل والمبادرة وبيميلوا للكسل والخمول وقلة الحركة وعدم تحمل المسؤولية والاعتماد على الآخرين أكبر وقت، وغالبا بيكون مفيش أمل في علاجهم.

وطبعا دخلة الشتا أو الشتا نفسه بتزود كمية الكسل والأكل والنوم والقعدة تحت البطانية أكبر وقت، الموضوع ده بيبقى مستفز جدا عشان خطط الخروج في الجو ده بتبقى كتير بس تلقائي جدا بتلاقي نفسك بتلغيها عشان تنام أو تدفى أو بتصحى متأخر وبيكون النوم خلص وصحابك زهقوا منك، او أصلا إنت وصحابك بتكسلوا ومحدش فيكوا بيكلم التاني والموضوع بيخلص كده.

لما دورنا لقينا إن الكسل في الشتا سببه التغيرات الفيسيولوجية للجسم في الشتا، لإن الإنسان بيتأثر بضوء الشمس اللي بيحدد له دورة النوم والصحيان، وعشان كده الغدة الصنوبرية بتستجيب لقلة الضوء وبتبدأ تنتج هرمون "الميلاتونين" أو هرمون النوم، اللي بيتنقل لكل أعضاء الجسم واللي بيخلينا نحس إننا عايزين ننام.

المهم كمان إن هرمون  "الميلاتونين" بيوصل لذروته بعد نص الليل وده اللي بيخلينا نحس إننا عايزين ننام نوم عميق، لكن في النهار الضوء بيروح للغدة الصنوبرية فبيوقف إنتاج هرمون "الميلاتونين" وعشان كده بنفوق لما بننزل أو بنفتح الشبابيك والشمس تبدأ تدخلنا.

لو إنت بتعاني من أي نوع من أنواع الكسل فممكن تتبع الخطوات دي عشان تقلل من الكسل، إلا طبعا لو الكسل صفة جديدة عليك فإنت لازم تروح لدكتور الأول، وبعدين ممكن تتبع الخطوات دي:

1- حاول تتخلص من التوتر والضغوط اللي عليك

2- اهتم بالأكل الصحي اللي فيه عناصر غذائية متكاملة

3- اشرب كميات مياه كفاية واللي هما تقريبا 8 كوبايات في اليوم

4- نام كمية كفاية من النوم المتواصل، لإن النوم المتقطع ده هيسببلك إحساس بالإرهاق أكتر، وغير إن الكميات القليلة من النوم هتخليك مش قادر تمارس أي نشاط

5- حاول تمارس أي رياضة أو تروح جيم أو تمشي نص ساعة تقريبا يوميا

6- استحمى بمياه باردة لإن ده بيساعد في تنشيط الجسم والأوعية الدموية، وغالبا بعد دش المياه السخنة بتحس إنك عايز تنام أصلا وبتدخل تدفى تحت البطانية

7- حافظ على وزنك على قد ما تقدر لإن زيادة الوزن بتخلى  الشخص مش قادر يمارس أي نشاط وبتسبب الخمول

Comments: