للاستجمام فقط.. 5 فنادق ومطاعم تمنع التكنولوجيا

12/12/2018

لو جتلك فرصة تبعد عن كل التكنولوجيا اللي محاوطاك وتروح مكان هادي مفيهوش غير الطبيعة والاستجمام، مفيش رنة تليفون هتزعجك ولا سوشيال ميديا أو إنترنت، هتتبسط ولا خلاص أدمنت الحياة دي؟ عموما.. في أماكن قدرت إنها تلبي رغبة الانعزال عند الناس وصممت فنادق ومطاعم من غير أي تكنولوجيا.

- مانتا ريزورت - جزيرة بيمبا - زنجبار
لوكان حلم من أحلام إنك تنام تحت المياه، دي حرفيًا ميزة موجودة في المنتجع ده اللي موجود في جزيرة نائية، البحر بكل مخلوقاته محاوطك من كل الجهات، كمان فيه ميزة إنك ممكن تشغل إضاءة فتنجذب ليك الأسماك والأخطبوط ده.
ولما متكونش حابب إنك تقعد في غرفتك ممكن تطلع على السطح تستمتع بالشمس أو تعمل مساج وممكن كمان تاخد جولة في الجزيرة نفسها يعني المكان مش مقتصر على النوم تحت الماء بس.

- كوخ الإسكيمو - فنلندا
يوفر كوخ الإسكيمو بالسقف الزجاجي لإطلالة بانورامية على مدينة ليفي في فنلندا.
المكان عبارة عن 18 كوخ زجاجي، الكوخ جواه حمام ومطبخ بكل مستلزماته وسرير وموقد صغير وستائر واللي بتخليك تقدر تاخد حمام سخن في الهوا الطلق.

- كوكبليس - المكسيك
المكان ده موجود على ارتفاع 3000 قدم فوق  وادي نهر "لا بلاتا"، وهو كهف مساحته تقريبًا 1700 قدم مربع، الكهف منحوت من قرون عدت تقريبًا من أيام الأمريكان الأصليين،  اتفجر الكهف ده عن طريق شخص اسمه بروس بلاك اللي كان شايف إن المكان هيكون مكتبة لكنه في النهاية أصبح منتجع سياحي.
الغرفة في الكهف ده بتكون عبارة عن مطبخ، والدش فيه من الشلال، وفيه غرفة معيشة ونوم، وغرفة تانية بتطل على مناظر طبيعية في المكان.

- الكتاب والسرير- اليابان
واضح من الاسم إن المكان عبارة عن كتاب وسرير، وطبعًا بعيد عن التكنولوجيا، المكان ده موجود في طوكيو في اليابان، وهو مناسب جدًا للناس اللي بتحب القراية، ومبتعرفش تصفي ذهنها غير بالقراية اللي بتساعدها في التخلص من الضغوط، وبالتالي المكان هو الاختيار الأمثل لو من الفئة اللي هوايتها القراية.
المكان بيشبه لحد كبير المكتب لأن فيه أرفف كتيرة للكتب، وأكتر من أريكة للقراءة عليها، والسراير فيها مريحة وبسيطة جدًا  مع المصابيح الكهربائية.

- مطعم المحادثة - إيطاليا
40 طاولة عليهم مفروشات مطرزة بنقوشات رقيقة جدًا، تحف كلاسيكية بتصحي فيك ذكريات قديمة لبيت الجدة، كل ده موجود في مطعم اسمه "المحادثة" وده اسم أطلقوه الناس عليه مجازًا، المكان ده موجود في مدينة نابولي في إيطاليا، سياسة المكان إنك تقفل التليفون بتاعك وتتكلم مع الناس اللي معاك وتبعد عن أي وسيلة مشتتة.

Comments: