٢٥ حاجة مريبة كلنا بنعملها وإحنا مش واخدين بالنا

13/12/2018

الطبيعي إنك مش هتركز مع كل الحركات ولا الكلام اللي بتقوله إلا لما حد يقلدك مثلا أو حد يشاورلك على الحركة أو الكلام ده، بس موقع Buzzfeed  جمع أكتر الحركات الغريبة اللي بنعملها، شوف كده إيه الحركة اللي بتعملها وإنت مش واخد بالك:

1- بتاخد حركة وش الشخص اللي بتتكلم معاه وبتتكلم معاه بيها، إنت تقريبا مابتكنش قاصد تتريق عليه بس إنت حرفياً بتاخد الحركة منه تلقائي من غير ما تقصد

2- بتبص في ورقة أو كتاب الشخص اللي قاعد جنبك في وسيلة مواصلات أو حتى في الشارع، وبتضايق لو الشخص ده قلب الصفحة من غير ما تخلص إنت قرايتها

3- لو إنتي بنت أو ولد شعره طويل، تلقائي هتلاقي نفسك بتشم شعرك من وقت للتاني

4- بتشم شعر الشخص اللي واقف جنبك حتى لو بشكل غير مقصود أو غير مباشر

5- بتبقى بتكلم صاحبك ومرة واحدة تلاقي اللي واقف جنبك واحد غريب ماتعرفهوش أصلا

6- بتيجي تمسك إيد الشخص اللي معاك، ويطلع حد غريب ماتعرفوش أصلا، وغالبا الأطفال اللي بيقعوا في الموقف ده أكتر

7- بتحضن حد لفترة طويلة، وغالبا بتبقى مش عارف الحضن ده ممكن يخلص امتى.

8- بتبقى جاي تبوس حد من خده وغصب عنك تلاقي البوسه جايه في شفايفه

9- بتفضل تبص لشخص غريب ماتعرفهوش وتشبه عليه، أو لما تروح تسلم عليه وتكتشف إن مش ده الشخص اللي إنت بتشبه عليه

10- بتبقى سرحان ومرة واحدة تلاقي إنك بتبص على شخص ماتعرفهوش

11- تبقى بتمثل إنك بتتصور سيلفي الحقيقة إنك بتصور واحد أو واحدة حلوة جنبك

12- لما حد بيبقى عامل لواحد صاحبك "تاج" في صورة على الفيسبوك  تلقائي جدا هتلاقي نفسك بتدخل تقلب في صور الشخص ده وتعرف عيلته كلها

13- تبقى بتلف حوالين ناس بتتكلم ومش عارف تدخل في الكلام إزاي

14- لما تسمع غصب عنك نكتة أو إيفيه من حد بيتكلم مع صحابه فتضحك بصوت عالي

15- لما تفتكر حاجة بتضحك بينك وبين نفسك فتضحك في الشارع عادي

16- لما تعمل صوت غريب من الكرسي الجلد اللي انت قاعد عليه، وتفضل تكرر الحركة  كذا مرة

17- وإنت بتتفرج حد على حاجة في موبايلك، بتفضل مركز في الموبايل ومابتعرفش تشيل عينك من عليه

18- لما تقول لحد إن شعره حلو مثلا وإنت عايز شعرك يبقى شبهه

19- بتبص على شباك جيرانك أول ما تشوفهم يولعوا النور بليل

20- تبقى بتكلم حد وقبل ما يديك جرس أصلا ترجع في كلامك وتقفل السكة

21- لما تقع في دوامة فيديوهات على اليوتيوب وإنت أصلا داخل تتفرج على صاحبة السعادة فجأة تلاقي نفسك بتشوفف "ثدييات عملاقة" على ناشونال جيوجرافيك

22- تبقى مركز أوي في حياة واحد مشهور وتعرف أصغر التفاصيل في حياته

23- تبقى بتتكلم مع حد غريب وتبقى هتقول تفصيلة معينة عن حياته، وبعدين تفتكر إنك عرفته لما "ستوكيت" عليه على الفيسبوك

24- تعمل لايك بالغلط لصورة قديمة عند حد على إنستجرام وإنت "بتستوك" عليه

25- تفتح لينك أو أكونت حد عارف إنك هتندم لما تعمل كده أو هتضايق بس برضه بتعمل كده

Comments: