طريقة استخدام خريطة "مصر الخير" التفاعلية لتسقيف المنازل: التبرع في 3 خطوات فقط

16/12/2018

تطور التكنولوجيا خلى الدنيا أسهل وخلى الوصول للمعلومات واتخاذ القرارات أدق وفعال أكتر، ولما الموضوع بيبقى ليه علاقة بالتبرع لفعل الخير، بيبقى المتبرع مهتم يشوف أثر تبرعه على أرض الواقع ومهتم يختار بدقة هو بيتبرع فين ولمين، وده اللي قدرت "مصر الخير" توفره في خريطة تفاعية بتسهل عملية التبرع في حملة تسقيف المنازل، وبتوفر قدر كبير من الشفافية في متابعة عملية التسقيف لنهايتها.. النقط الجاية فيها تفاصيل الخريطة وحملة "مصر الخير" وطريقة التبرع.

- الخدمة عبارة عن خريطة تفاعلية على موقع مصر الخير، بتمكن المستخدم من التبرع لبناء أسقف للمنازل في 3 خطوات بس وبشكل تفاعلي وسهل، الخطوة الأولى هي اختيار المستخدم للمحافظة اللي عايز يتبرع فيها لواحد من البيوت، وبعد اختيار المحافظة بتظهر نقط حمرا وخضرا فوق كل بيت داخل ضمن الحملة، والنقط الخضرا هي البيوت اللي تم تسقيفها بالفعل، أما البيوت الحمرا فهي اللي محتاجة تسقيف، وبعد اختيار المكان بيدوس المستخدم على كلمة "تبرع" عشان يكمل العملية للآخر.

- الخريطة التفاعلية هتمكن المتبرعين إنهم يتابعوا عملية التسقيف من أولها لآخرها، وهيبقى في إمكانهم يشوفوا صور للمنازل قبل وبعد تسقيفها كشكل من أشكال الشفافية.

- مصر الخير قالت إن التقنية الجديدة هتسهل التواصل بين المتبرعين و"مصر الخير" من ناحية وبين المتبرع والمكان اللي عايز يتبرع ليه من ناحية تانية، وإن المتبرع هيقدر يشوف المنزل بعد التسقيف.

- الخريطة التفاعلية لـ"مصر الخير"، هي واحدة من ضمن خطوات كتيرة بتاخدها المؤسسة في إطار "حملة الشتاء" للسنة الرابعة على التوالي لدعم ومساعدة الأسر الأكثر استحقاقا لحمايتهم من برد الشتاء.

- حملة "مصر الخير" للشتاء الحالي بتستهدف تدفئة ألف أسرة يوميا قبل نهاية الشتاء تحت حملة "سكن ودفا"

Comments: