٧ نصايح للتعامل مع شخص يعاني من الـ Panic Attacks

18/12/2018

رجالة كتير بيبقوا فاكرين إن عندهم القدرة إنهم يتعاملوا مع صاحبتهم أو شريكة حياتهم في المطلق اللي ممكن تبقى بتعاني من شوية اضطرابات نفسية زي القلق أو نوبات القلق المعروفة باسم "البانك أتاك"، عموما التعامل مع الاضطرابات دي مش سهل خالص خصوصا لو مش دارس بتتعامل معاه إزاي أو لو ماتعملتش مع حد بيعاني منهم قبل كده، مؤخرا موقع BoredPanda نشر نصايح كتبها شخص قدر يتعامل مع صاحبته اللي كانت بتعاني من نوبات القلق.

ووفقا لجمعية القلق والاكتئاب في أمريكا، اضطرابات القلق هي أكتر الاضطرابات شيوعا في الولايات المتحدة، لكن 36.9% بس هما اللي بيتعالجوا منه، الناس اللي بتقاوم القلق والاكتئاب وبتتعالج منه أو فيه ناس بيحبوهم في حياتهم وبيتعالجوا منه بيقدروا يحكوا قصصهم أكتر والحكايات دي بتساعد غيرهم على التعافي والتعامل مع القلق والاكتئاب، وفقا لموقع BoredPanda هنعرضلك الخطوات أو النصايح اللي الولد كتابها وهو بيتعامل مع صاحبته:

الحاجات اللي اتعلمتها من نوبات القلق (Panic attacks):

1- ماتحضنش الشخص اللي بيعاني من نوبات القلق على طول، ممكن يكون واضح لك إن الشخص اللي بيعاني منها محتاج حضن، لكن الحقيقة إن الحضن بيخليه يحس إنه مقيد.

2- مش معني إنهم مابيردوش إنهم كده بيتجاهلوك، ساعات بيكونوا مش قادرين يتكلموا، أوقات نوبات القلق بتيجي من كتر الجدال أو الكلام، وساعات برضه بيكون السكوت خالص غلط، اتعلمت طريقة جديدة وهي إن ممكن ترفع أو تشاور بصباعك قبل ما تتكلم.

3- اتنفس بصوت أعلى، لو حاضن حد بيعاني من نوبة قلق أو إنت جنبه اتنفس بصوت أعلى وبراحة أكتر لإنه هيعمل زيك تلقائي، لإن لو فيه اتنفس جنبك بعمق هيخليك محتاج تتنفس بعمق زيه، ممكن وإنت بتقرأ الجملة دي تلاقي نفسك بتتنفس بعمق وبالراحة، عشان كده لو فيه حد حصله "بانك أتاك" جنبك حاول تتنفس بعمق وبراحة وبصوت عالى جنبه وهو تلقائي جدا هيعمل كده.

4- حرك إيدك ببطء، ممكن على دراعهم أو على ضهرهم عشان تساعدهم يتنفسوا أحسن

5- ممكن تقولهم يهدوا لكن اعمل ده صح، ماتقولهمش يسكتوا أو يبطلوا، لو عرفت إنهم داخلين في نوبة القلق بدري قبل ما يدخلوا فيها حاول تهديهم من الأول عن طريق إنك تقولهم " كله كويس".. "اهدا"، وممكن تهديه عن طريق الطبطبة مثلا أو حركات إيدك

6- ساعات ممكن توصل نوبات القلق إنهم يقعدوا أو ينهاروا على الأرض، اقعد جنبهم على الأرض أو نام جنبهم وفاكرهم إنهم مش لوحدهم

7- بلاش تنفعل عليهم، لإن ساعات نوبات القلق ممكن تحصل لأتفه أو أغبى الأسباب، ممكن لو حد ضحك على نكتة أو إيفيه هما قالوه بصوت عالى فترة طويلة ممكن يجيلهم "بانك أتاك"، كمان نوبات القلق ممكن تحصل في حالات الجدال، ممكن تقولهم إنهم مش في جدال ولا حاجة ومحدش بيكسب يعني في الآخر.

Comments: