نادي "اللي مش عاجبين تامر أمين": محمد صلاح آخر الأعضاء

20/12/2018

الإعلام عموما لما بيمسك خبر أو حد من المشاهير وينتقده أو يهاجمه، بتقوم الخناقة والله أعلم هتقعد إمتى، عشان غالبا بيكون فيه هجوم من الإعلام والطرف التاني بيرد لأن الوسايل بقت متاحة ولحظية، يعني ممكن يرد في فيديو أو على "فيس بوك" أو "تويتر" أو برنامج تاني أو في تصريحات لأي جريدة، بس من أكتر الإعلامين المشهورين بالهجوم على المشاهير هو الإعلامي تامر أمين، مهما اختلفت برامجه أو القنوات اللي بيظهر عليها، وبيحتفظ لنفسه بفقرة طويلة في أي برنامج بيتكلم فيها بس.

لما عملنا سيرش بكلمة "تامر أمين يهاجم" على "يوتيوب" طلعلنا نتايج كتير هاجم فيها ممثلين وفنانين، وهاجم أحداث، وهاجم أفكار، وهاجم مواقف، وهاجم ملابس، وهاجم الحكومة وهاجم الناس اللي بتقعد على القهوة، ودي كانت نتيجة السيرش.

- تامر أمين يهاجم محمد صلاح

آخر هجمات تامر أمين كانت على آخر سيشن تصوير عملها محمد صلاح لإن الأزياء مادخلتش قلبه، واقترح عليه يتصور ببدل بدل الهدوم الفنكي أو على حد وصفه "هدوم هوبا اللالا"، ووصف كمان "البالطو" اللي كان لابسه صلاح بإنه "بالطو روبابيكيا".

- تامر أمين يهاجم رانيا يوسف

طبعا بسبب فستانها، تامر قال إن الفستان كان بيشف أكتر ما بيغطى ولا يليق ليها الظهور بيه في المهرجان أيا كان السبب.

- تامر أمين يهاجم الراقصات (بشكل عام)

قبل رانيا يوسف، كان في حلقة هاجم فيها الراقصات وقال فيها إن الرقص هو حرام لكن دي مش قصته، الرقص كمهنة فن حقير، والرقاصة اللي بتشتغل رقاصة كمهن في النايت كلابس والديسكوتيكس مهنة مبتذلة ورخيصة، وخص الفنانة فيفي عبده بإنه انتقد اسم البرنامج بتاعها وقال إن 5 مواه هيلاقي بعدها برنامج بقى اسمه 6 إإيه و7 ااه،  والفنانة فيفي عبده قالت إنها رفعت عليه قضية لإنها اتهانت على التلفزيون، ده غير أصلا لما اتوجهلها السؤال في أحد البرامج البرنامج قالت "هو مين تامر أمين ده"

- تامر أمين يهاجم شيرين عبدالوهاب

من سنة لما حصل والفنانة شرين عبد الوهاب اتوقفت بسبب إهانة مصر في حفلة ليها في لبنان، ظهر تامر أمين في برنامجه وانتقدها وقال في آخر كلامه إن دي مش أول سقطة ليها وإن ليها كذا سقطة زي تهجمها على الهضبة عمرو دياب في ذلة لسان، والتانية لما كانت في تونس وقالت لهم إن ابنها سألها رايحة تغني فين "قالتله في تونس" فرد "في بقدونس؟ ههه"، على حد تعبيره يعني، وختم وقال إنها مش عارفة طول الوقت هي بتقول إيه.

- تامر أمين يهاجم مايا دياب

من حوالى 4 سنين، هاجم برضه الفنانة مايا دياب بسبب فستان لبسته، وقال "مش عارف ليه يا فنانات يامحترمات بتتعمدوا التعري"، وقال إن ده بسبب إن الفنان أو الممثل لازم يظهر مختلف، لازم يبقى استثناء وإن ده بيحصل عن طريق اللبس، عشان ماتبقاش الفنانة واحدة من الستات العاديات وتقدر تسحب العين معاها.

- تامر أمين يهاجم سلوى خطاب

وده بسبب إن سلوى ظهرت في برنامج اسمه "من الآخر" وقالت فيه إن السينما باظت من ساعة ما بطلوا بوس، ورد عليها قالها كده بالظبط "لو كنتي إنتي ناقصك بوس دي مش مشكلتنا، دي أرزاق محدش يطلع عقده علينا".

- تامر أمين يهاجم سعد الصغير

هاجم تامر أمين سعد الصغير أو بمعني أصح هما الاتنين هاجموا بعض، وده كان وقت ظهور أخبار جواز سعد الصغير من الراقصة شمس رغم إنهم قالوا إنهم أصدقاء، تامر قرر يدخل في النص بينهم ويقول رأيه بإن الصور دي مش صور اتنين أصدقاء، وقال "يا محلى الصداقة لو كانت كده، دي صداقة جديدة لانج"، واعتبرهم رمز للصداقة "السعداوية الشمساوية".

- تامر أمين يهاجم تامر أمين

اعترف على نفسه بإنه شرب سيجارة "فودو" لكن من غير ما يعرف، الأهم من الاعتراف إنه بلغ الداخلية عن نفسه، عشان يقول لهم إن الفودو كارثة جديدة في المجتمع، وتأثيره أكبر من أي مخدر متاح.
 

Comments: