وظائف هتعملها الروبوتات مكان البشر.. شوف وظيفتك منهم ولا لأ

21/12/2018

مؤخرا بقى يظهر أسماء وظايف جديدة لكن بنفس المنطق بقى يختفي وظايف تانية، وبنفس الطريقة مع التطور والتكنولوجيا اللي بنعيش فيهم في وظايف أكتر هتختفي عن طريق الذكاء الاصطناعي أو الروبوتس اللي هتحل محل الناس اللي بيقدموا الوظايف دي.

فيه تقرير صدر السنة دي من شركة Pricewaterhouse Coopers بيقول إن أغلب الوظايف أو بالظبط 30% منهم هيختفي بحلول سنة 2030 في بريطانيا ومعنى كده إن فيه 15 مليون وظيفة في خطر، دراسة تانية قالت إن 6% من الوظايف اللي موجودة في أمريكا، هتختفي في خلال الـ 5 سنين الجاية بس.

بعيدا عن إنجلترا بقى، كان فيه دراسة اتعملت من جامعة أكسفورد عن احتمالية سيطرة الروبوتس على المهن والوظايف، درسوا 700 وظيفة ولقوا إن فيه احتمالية اختفاء 11 وظيفة بنسبة 99% في المستقبل وهما:

1- مدخلي البيانات

2-  موظفين المكتبات

3- موظفين الحسابات

4- عمال التصوير ومشغلين الكاميرات

5- موظفي الضرايب

6- وكلاء الشحن

7- الساعاتي

8- موظفين التأمينات

9- كتاب ملخصات الأبحاث

10- المسوق عن طريق الهاتف

11- الشخص المسؤول عن تصليح المجاري

المهن دي متوقع إنها هتختفي في السنين الجاية لإن التكنولوجيا هتقدر تعمل نفس اللي الأشخاص بيعملوه، وعلى العكس فيه مهن في الأمان جدا لإن مفيش أي تكنولوجيا هتقدر تتحكم في اللي هما بيعملوه، أو لحد دلوقتي يعني ماكتشفوش التكنولوجيا دي، المهن دي زي:

1- المعالجين الروحيين

2- الميكانيكي واللي بيصلحوا أي حاجة ليها علاقة بالتكنولوجيا

3- مديرين إدارات الطوارئ

4- الدكاترة النفسيين ومعالجين الإدمان

5- دكاترة الودان

6- دكاترة الأطراف الصناعية

7- الأخصائيين النفسيين

فيه وظايف العالم ممكن يستغنى عنها خالص وعمر ما جيه في بالك إنها تختفي زي سواق التاكسي مثلا وده احتمالية اختفاءه تقريبا 89% أو زي طباخين الـ"فاست فوود" المهددين بالاختفاء بنسبة 81% و زي كمان الكاشير اللي احتمالية اختفاء وظيفته 97%، والموديلز ومندوبين مبيعات قطع الغيار ومشغلين الراديو بنسبة 98%، كل الناس دي ممكن تختفي من العالم في أقرب وقت وهيحل مكانهم روبوتس، فلو شغلنتك منهم ممكن تعمل كرير شيفت من دلوقتي أسهلك.

وعلى العكس فيه وظايف تانية نسبة اختفائها قليلة جدا زي مهندسين المبيعات ودول احتمالية اختفائهم 0.4% وزيهم الدكاترة والجراحين ومدرسين المدارس الإبتدائي، والمزارعين نسبة اختفائهم 8% وزيهم رجال الدين وزيهم كمان علماء الآثار والأنثروبولوجيا.

لو عايز تطمن على شغلانتك وتشوف ممكن تنقرض ولا هتفضل موجودة بنسبة قد إيه، تقدر تدخل على محرك البحث ده وتطمن بنفسك من هنا

Comments: